تربية طفل وحيد مسؤولية كبيرة، ورغم كدا، في اعتقاد ناس كتير، هي أسهل من تربية عدد من الأطفال. لكن الحقيقة مختلفة؛ فالطفل الوحيد تربيته بتواجه من التحديات والصعوبات والمسؤوليات على الأب والأم أكتر بكتير من البيت اللي فيه أكتر من طفل.
ومن أكبر التحديات اللي والدين الطفل الوحيد بيقابلوها هي إنهم إزاي يربوا طفل مش متدلع ومش أناني. في المقال دا، هنقول لك بعض الخطوات التربوية المهمة اللي تقدري تعمليها مع طفلك الوحيد تساعد إنه يكبر متحمل للمسؤولية ومش أناني ولا متدلع.
نصائح لتربية الطفل الوحيد
• طلباتهم مش أوامر: مهم جدًا إنك ما تستجيبيش لكل طلبات طفلك عشان يحس بقيمة الأشياء وما يصطدمش بعد كدا بالحياة ويحس إن من حقه أي حاجة يطلبها من أي حد تتنفذ. الأحسن إن تحقيق رغباته يكون بالمعقول ويكون عارف إن مش كل رغباته مجابة.
• المسؤولية: خلّي ابنك يشترك معاكي في مهام ومسؤوليات البيت. ممكن تبدأي من سن 3 أو 4 سنين. شجعي الطفل يساعدك في شغل البيت ونظمي له جدول بالأعمال المنزلية المناسبة لسنه. عوّدي الطفل يهتم بكل الناس اللي عايشين في البيت وبعيلته الكبيرة عشان يعرف إنه مش محور الكون وإن الاهتمام والحب بين الناس لازم يكون متبادل.
• الحياة الاجتماعية: اهتمي دايمًا بإن طفلك تكون علاقته قوية بعيلته الكبيرة، لأن في معظم الحالات ارتباطه بالقرايب بيعوضه عن إحساس إنه محتاج أخ أو أخت وبيعرّضه للخبرات اللي محتاجها في وجود إخوات. شجعي طفلك على تكوين صداقات وخليه يشارك في الأنشطة الجماعية في النوادى والمكتبات.
• التشجيع: التشجيع مهم جدًا لأي طفل ومفيد لزيادة ثقته بنفسه. بس أوقات في حالة الطفل الوحيد من كتر تركيز الأب والأم معاه ومدحه على كل حاجة زي: “أنت أجمل طفل في الدنيا” أو “أنت أحسن من كل الأطفال” ممكن تخلق بني آدم أناني وهتوصل له إحساس إنه متفرد في إبداعه وذكائه وما لوش مثيل، ودا له آثاره السلبية على مستقبله. فخلّي بالك إنك تمدحي الفعل نفسه مش الطفل وعلى حاجات حقيقية وملموسة ومن غير مبالغة.
• الأنشطة التطوعية: حاولى تخلّيه يساعدك في أي نوع من الأعمال التطوعية زي مشاركة اللعب مع أطفال أيتام أو توزيع وجبات أو ملابس على المحتاجين عشان تعززي عنده المشاركة والشعور بالغير والتعاطف معاهم.
• الاستقلالية: بمعنى إنك تسيبي للطفل مساحة كافية يجرب بنفسه من غير الخوف الزايد عليه وتسيبي له المساحة للاعتماد على نفسه من غير تدخل وتشجعيه على اتخاذ قراراته من غير أخذ القرارعنه. لأن الحماية الزائدة للطفل خوفًا عليه وأوقات إحساس الوالدين بالذنب كونه طفل وحيد ممكن ينقل المشاعر السلبية للطفل وتأثر عليه. دا غير أن تعلق الأب والأم الشديد به ومرافقته في كل مكان والخوف الزايد عليه ممكن يكبر إنسان معتمد عليهم في كل حاجة. دا غير الخوف من الانفصال عنهم اللي ممكن يأثر على تفاعله مع الحياة الاجتماعية.
• الرياضة: الرياضة وبالأخص الرياضات الجماعية شيء مهم لأنها هتنمي روح الجماعة جوا الطفل والتعاون والإيثار.
وفي النهاية، فريق راحة بالك بيفكرك إن كون الطفل وحيد ما لوش إخوات، دا ممكن يكون ميزة كبيرة للطفل تقدري تستغليها بالشكل الصح لو بعدتي عن الدلع الزايد اللي نتايجه هتضر طفلك الوحيد قبل أي حد تاني.
التعليق باستخدام حساب فيس بوك