تربية الحيوانات في البيت قرار مش سهل لأي أم، لأسباب كتير. فيه أمهات بتخاف على أولادهم من الحساسية والأمراض اللي ممكن تتنقل للأولاد من الحيوانات. وفيه أمهات بتخاف إن ولادها ما يقدروش يتحملوا مسؤولية حيوان أليف في البيت وينتهي بها الحال وهي اللي شايلة مسؤولية إضافية غير البيت والأولاد. وفيه أمهات بتخاف من حيوانات معينة. لكن الحقيقة إن تربية حيوان أليف في البيت بيساعد جدًا إن الطفل/ة تفهم مفاهيم زي المسؤولية عن كائن تاني وزي الرعاية والاهتمام والالنزام. حاجات ممكن نقعد فترة طويلة بنحاول نعلمها له/ا لكن هيكون أسهل بكتير إنهم يتعملوها بمجرد إننا نتبنى حيوان أليف في البيت. في المقال ده، هنشارك معاكي تجارب أمهات قررت تسمح لأولادها يربوا حيوانات أليفة وإزاي اتعامل الأولاد مع الحيوانات.
نهى بتقول إن عندها في البيت قطتين وكلب و5 سمكات. ولما سألناها إزاي الأولاد بيتعاملوا معاهم، قالت إنهم في البداية كانوا خايفين شوية لكن بعد كده، بقوا بيحبوهم جدًا وبيلعبوا مع القطط والكلب وإنهم دلوقتي عارفين بالتجربة إيه هو القطة وإيه هو الكلب وكمان لما شافوا السمك وهو عايم وبياكل كان سهل عليهم إنهم يفهموه.
نشوى بتحكي تجربة مختلفة. بتقول إن كان فيه شد وجذب كتير في البيت حوالين موضوع الحيوانات. جوزها كان عايز كلب، أما والدته المقيمة معاهم كانت عايزة قطة. لكن نشوى حسمت الجدل واشترت سلحفتين لابنها. بتقول إن ابنها بيحبهم جدًا لكن السلاحف بعادتها مش كائنات اجتماعية أو تفاعلية قوي فهو مش بالظبط بيلعب معاهم.
أما منى فبتقول لنا إن عندها قط وبنتها بتحبه جدًا جدًا، وإنها مهما بتجيب لبنتها ألعاب، البنت بتحب القط ده أكتر من أي حاجة، وهو كمان بيحبها جدًا. بتحكي لنا إنها بتاخده معاها في صندوق العجلة وبيتفسحوا مع بعض وإنهم أصحاب قوي وبيلعبوا مع بعض دايمًا.
وانتي قولي لنا إيه رأيك في تربية حيوانات في البيت ولو لكي تجارب في تربية الحيوانات، إيه قصص أولادك معاهم؟ هل بيغيروا من بعض؟ ولا أصحاب؟ وإزاي تربيتهم لحيوانات أليفة أثرت أو غيرت فيهم.
التعليق باستخدام حساب فيس بوك