بالصور: تسريحات للشعر الخشن للأطفال

في ثقافة سائدة عندنا، إن الشعر الخشن أو المجعد مش حلو، وإن الشعر الناعم هو اللي بيخلي البنت أجمل، لكن في الحقيقة إن الشعر الخشن هو مجرد نوع شعر مش أكتر، وبيكون لايق على صاحبته جدًا، خصوصًا في الأطفال، لدرجة إنها لما بتفرد شعرها بنحس إن شكلها مختلف، وبناخد وقت على أما بنتعود على شكلها بالشعر الناعم، الشعر الخشن مش وحش، الشعر الخشن للأطفال محتاج عناية وتسريحات مناسبة، وده اللي هنقولك عليه، أهم النصائح للشعر الخشن والمجعد وكمان أفكار تسريحات للشعر الخشن للأطفال سلهة وسريعة.

نصائح للعناية بالشعر الخشن للأطفال

الترطيب المستمر هيفرق جدًا في الهيشان.
استخدمي شامبوهات طبيعية قدر الإمكان، لإن المواد الكيميائية بتبوظ مظهر الشعر.
ابعدي عن الفرد تمامًا، سواء بالحرارة أو بالمواد الكيميائية.
اعملي ماسكات طبيعية لتغذية الشعر، على الأقل مرتين في الشهر.
حافظي على شعر طفلتك من مياه حمامات السباحة والبحر، ولبسيها بونيه مخصوص.
مهم جدًا إنك ما تحسيش إنك متضايقة من شعرها، علشان الإحساس ده هيتنقل لها، وهيقلل ثقتها بنفسها.
تفهمي إنها طبيعة شعر مش أكتر، فلو هاش أو هندامه اتأثر خلال اليوم ماتلوميش بنتك.
ماتقارنيش شعر بنتك بحد تاني، حتى لو أختها.
ما تتكلميش على شعر بنتك بطريقة وحشة قدام حد، بالعكس شجعيها واتكلمي عن قد لإيه هي مهتمة بمظهرها وجميلة.
ماتحطيش لها إكسسوارت كتيرة في شعرها، اعتمدي على القطع الراقية والرقيقة والمناسبة للتسريحة.
ما تشديش لها شعرها جامد، علشان ما يتراجعش من عند قورتها فيضعف ويهيش أكتر.
ما تجازفيش وتقصي لها قصات مش مناسبة لشعرها.
لو عندك مناسبة او مشوار، جهزي شعر طفلتك من بدري، علشان ما تتوتريش وتوتريها.