مشكلة تسوس أسنان الأطفال من المشاكل الشائعة اللي بتواجهنا، وأمهات كتير بيفتكروا إن الحل الوحيد هو منع الحلويات. وده طبعًا مش عملي خالص مع الطفل الصغير. لكن الحقيقة إن فيه أسباب تانية للتسوس غير أكل السكريات. وبرضه فيه حلول للوقاية والعلاج غير منع الحلويات. هنقول لك في المقال ده إجابات كل الأسئلة اللي في بالك عن تسوس أسنان الأطفال ونصائح للوقاية والعلاج.
-
إيه هو تسوس الأسنان؟
هو مرض بيصيب الأنسجة الصلبة للسن، واللي بيتميز بإذابة الأنسجة الصلبة للسن وظهور الثقوب في الأسنان. والتسوس مرض تلوثي، يعني بتسببه البكتيريا الموجودة على سطح السن واللي بتحلل الكربوهيدرات الموجودة في معظم أنواع الأغذية اللي بناكلها. ونتيجة لده، تنتج أحماض بتسبب ذوبان معادن العاج والمينا وظهور التسوس.
هنا ممكن تشوفي معدل ظهور ونمو أسنان الأطفال في السنة الأولى
-
إيه هي أسباب تسوس أسنان الأطفال؟
- العنصر الوراثي: وده من الأسباب المهمة جدًا، لإن ده اللي بيفرق ما بين طفل والتاني في مدى استعداده لتسوس الأسنان.
- الكربوهيدرات: لإنها بتتحول لسكريات، ودي أخطر من السكريات الصريحة، لإن الأم مش بتكون خايفة منها، فمش بتديها اهتمام زي الحلويات.
- أكل البينيات: علشان كده بينصح أكل وجبات محددة وتقليل البينيات قدر الإمكان، علشان ندي فرصة للعاب يعادل مستوى الحموضة في فم الطفل.
- السكريات: كل ما يحتوى على مُحليات طبيعية أو صناعية، سواء أكل أو شرب.
-
إيه هي طرق الوقاية من تسوس الأسنان؟
- تقليل كمية الطعام المُحلى المقدم للطفل.
- الإسراع باستبدال كوب للشرب بدل الببرونة، واللي ثبت إنها بتزيد من مشاكل وتسوس الأسنان.
- تنظيف الأسنان يوميًا بشكل روتيني، يعني بعد الصحيان من النوم، وقبل النوم، وبعد كل وجبة، ولو الطفل أكل في النص حاجة مسكرة لازم يغسل سنانه بعدها.
-
الوقاية من تسوس أسنان الطفل الرضيع
أول لما يظهر سن واحد للبيبي، يبقى لازم ناخد بالنا من مشكلة تسوس الأسنان، وهتكون طريقة الوقاية كالتالي:
- الصبح بعد وجبة الإفطار، لأنها غالبًا بتحتوي على الأطعمة الغنية بالكربوهيدرات، زي: الحبوب، والساندوتشات والمعجنات، والفواكه.
- بالليل قبل النوم.
- الفرك بيتم بواسطة الشاش أو فرشاة أسنان ناعمة جدًا وكمية صغيرة قوي من المعجون اللي بيحتوي على الفلورايد بمستوى يناسب عمر الطفل.
-
علاج تسوس أسنان الأطفال
العلاج التقليدي عند طبيب الأسنان، وبيكون عن طريق حشو الثقوب الناتجة عن التسوس، وفايدة العلاج إنه يمنع أي ألم للطفل، وبيمنع انتشار الثقوب دي في بقية الأسنان والضروس، وطبعًا لازم نرجع لطرق الوقاية تاني بعد العلاج.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
webteb.com
التعليق باستخدام حساب فيس بوك