2021 سنة مختلفة وغير متوقعة الأحداث تقريبًا من أولها بعد ما عدينا بسنة صعبة. بس على الرغم من كده، احنا أخيرًا وصلنا لشهر نوفمبر واللي هو معناه الـ بلاك فرايداي Black Friday يوم 27 نوفمبر. كان زمان بيكون يوم واحد في الشهر، وكان حرفيًا ممكن يتحول لمعركة غير عادية على مستوى أسواق العالم. لكن من فترة قريبة بقى تقريبًا كل أيام الجمعة في الشهر. وفي مواقع بيع ومحلات بتعمل تخفيض كبير جدًا طول الشهر. تنوع الأوضاع في التخفيضات مختلف. بس خلينا دلوقتي نعرف ازاي نقدر نشتري صح ونقدر نحقق صفقات رابحة في المناسبة دي. وقبل ما نقول لك ازاي فيه شوية نصائح مهمة، اعتبريها الأساس اللي هتنطلقي منه.
نصائح للتسوق في البلاك فرايداي Black Friday 2021
نصيحة أساسية إن في الفترة دي الشراء بتقسم ما بين الأونلاين، وبين النزول للمحلات نفسها وتلفي وتدوري فيها. بس في الفترة اللي احنا فيها ومع زيادة أعداد المصابين بفيروس كورونا، فعلى قد ما تقدري، حاولي تبعدي عن الزحمة وتتعاملي مع خيار الأون لاين بشكل أكبر.
- لو فيه أي آثار اقتصادية مترتبة عندك بسبب أيام الحظر، لازم تحددي الميزانية الشراء بتاعتك. ما ينفعش تكون مفتوحة.
- حددي المناسبات اللي بتحتاجي فيها هدايا خلال الفترة اللي جاية، واللي هيعتبر التسوق في اليوم ده فرصة تجيبي فيها اللي عايزاه بسعر كويس وموفر.
إزاي تشتري صح في الــ بلاك فرايداي 2021؟
خلاص عرفتي النقط دي؟ تعالي نعرف نشتري صح إزاي يوم الــ بلاك فرايداي Black Friday
- دوري على اللي عايزاه قبل ما يبتدي الــ بلاك فرايداي Black Friday:
قبل ما المناسبة دي تبتدي، تقدري تنزلي تلفي في المحلات وتحددي إيه اللي عايزاه والأسعار بتاعتها كام. ساعتها لما تعرفي، هتقدري تعرفي الشراء في اليوم ده مربح ولا لأ. لإن فيه محلات بتزود في السعر جدًا في الفترة دي، وتكتب تخفيض وهمي غير حقيقي. معرفتك السابقة هتخليكي ما تقعيش في الفخ ده.
- انتبهي للماركات المجهولة:
من الحاجات الملحوظة جدًا في الفترة بتاعت التخفيضات هو ظهور أسماء لماركات غريبة ما سمعتيش عنها قبل كده. وبتحسي إن اسمها شبه أسماء كبيرة ومشهورة. صحيح مش معنى إنك ما سمعتيش عن الماركة إنها وحشة، بس إنك تعرفي المنشأ وتعملي سيرش بسيط عنها هيخليكي تعرفي إن كانت هي جيدة بحيث تدفعي فيها، ولا هي منتج رخيص رديء، فالسعر ده أكيد وراه سبب.
- تحققي من تاريخ سعر المنتج:
لو عجبتك منتجات في المحلات أو أونلاين، اعملي سيرش عليها على مواقع بتكون كاتبة المنتجات دي أسعار بيعها إيه، ساعتها هتكوني عارفة حجم التخفيض اللي هتحصلي عليه في يوم الــ بلاك فرايداي Black Friday.
- حددي أسماء المحلات اللي بتبيع المنتج اللي عايزاه:
لو كنتي هتشتري أونلاين، ممكن تلاقي إن الموقع من كتر الضغط عليه بيقع أو حتى المنتج بيخلص قبل ما تشتريه. فمع الليستة بتاعتك، تقدري تنزلي واحد من المحلات اللي انتي محدداها قبل كده، وتجيبي المنتج اللي نفسك فيه. والعكس صحيح على فكرة، ممكن تروحي المحل وتلاقي اللي عايزاه خلص، لكن تقدري تنقذي الموقف من خلال الشراء أونلاين من قائمة المواقع اللي بتبيع اللي عايزه.
- لو كنتي من النوع اللي ما جربش الشراء أونلاين، يبقى هو ده الوقت المناسب:
فيه ناس كتير بتقلق أو مش بتفضل الشراء أونلاين، اللي بقى دلوقتي شائع جدًا. سواق من صفحات على الفيسبوك أو من أسماء الماركات الكبيرة أو حتى المواقع المتخصصة للتسوق. دلوقتي هتحتاجي تنزلي كذا أبلكيشن/تطبيق على الموبايل للمحلات وأماكن البيع وتعملي لنفسك أكاونت/حساب شخصي مجانًا تكوني مسجلة فيه اسمك وعنوانك وحتى وسيلة الدفع المفضلة عندك سواء كانت دفع عند الاستلام في البيت. أو الدفع عند الاستلام في أقرب نقطة توزيع، أو الدفع عن طريق الكريدت كارد. ده هيساعدك تختصري سرعة الشراء. البيانات هتكون مسجلة، وبالتالي الوقت مش هيضيع في كتابتهم والصفقة مش هتروح منك.
التسوق عبر الإنترنت: إزاي تتسوقي أون لاين زي المحترفين؟
- جهزي قائمة بأمنياتك:
أغلب مواقع الشراء دلوقتي بتيح ليكي فرصة إنك تجهزي ليستة بالمنتجات اللي عايزاه بحيث تقدري ترجعي ليها في أي وقت، وتختاري إتمام الصفقة بتاعتك بمجرد ما تلاقي إن سعرها نزل بالشكل المرضي ليكي واللي يخليكي تشتريه.
إزاي تحمي نفسك من النصب والاحتيال وانتي بتشتري أونلاين؟
- ابدأي يوم الشراء في الـ Black Friday بدري:
كل ما روحتي بدري أو بدأتي على الموقع اللي اختارتيه بدري كل ما هتقدري تجيبي اللي عايزاه. التأخير بيضيع عليكي فرص كبيرة ومهمة.
- اكسبي على قد ما هتصرفي:
يعني إيه الكلمة دي؟ تقريبًا كلنا عندنا كريدت كارد بنشيل فيه مرتبنا ومدخراتنا. قبل ما تبدأي التسوق، راجعي مع البنك بتاعك عروض الـ Cash back بتاعته في موسم الـ Black Friday. لإن انتي ممكن تلاقي نفسك مش بس واخدة تخفيض من المحل، لا كمان فيه فلوس هترجع لك وده شيء رائع جدًا.
دليلك لفهم كروت الدفع الإلكترونية في مصر
- لما تكوني في المحل، استخدمي موبايلك:
الكلام ده معناه إنك في عز ما انتي بتشتري تقدري تقارني بين الأسعار. علشان محتمل يكون المنتج اللي قدامك ده بيتباع أونلاين أرخص من اللي قدامك دلوقتي. فاللحظة دي، اشتري طبعًا بالسعر الأقل.
- بصي على السعر مش على نسبة التخفيض:
انتي ممكن تلاقي إن مكتوب تخفيض 80% لكن هو في الحقيقة غالي جدًا. أوقات النسب دي بتكون عملية خداع للمستهلك ووسيلة جذب ناس كتير بتوقع ضحية لها. فخلي بالك.
- اتأكدي من سياسة الاسترجاع:
من المواقف اللي تكاد تكون اعتيادية وتقريبًا كلنا وقعنا فيها. إنك تشتري منتج وتلاقي فيه عيب، فتكوني عايزة ترجعيه. في أماكن كتير بترفض ترجع المنتج اللي تم شرائه في موسم تخفيض زي بتاع الـ Black Friday، فلازم تتأكدي إن المكان بيسترجع المنتج، وفي نفس الوقت، اتأكدي من النقطة دي لو هتشتري أونلاين.
- اشتري دلوقتي واستلمي بعدين:
من النقاط الذكية جدًا والموفرة لمصاريف الشحن جدًا، في وقت الشراء أونلاين تقدري تشتري في لحظتها وتختاري إنك تستلمي من نقطة توزيع، وفيه أماكن تقدر تسيب لك فرصة زمنية توصل لـ7 أيام، والحلو في النقطة دي مش بس التوفير، وإنما كمان مريحة للأعصاب لإن الزحمة هتكون خلصت، وصحية أكتر خصوصًا في فترة الكورونا.
تقدري تقولي إن الـ12 نصيحة دول هم خلاصة خبرة المحترفين في الشراء مش بس على فكرة في فترة الـبلاك فرايداي 2021 Black Friday لكن في كل موسم تخفيض، فجهزي نفسك من دلوقتي، الفرصة مستنياكي.
التعليق باستخدام حساب فيس بوك