موقع شي إن Shein واحد من أكتر المواقع اللي اسمها بيتم تداوله في عالم الشراء الإلكتروني في الفترة الأخيرة، مش في مصر بس، إنما كمان على مستوى العالم. هو موقع صيني بيتميز إنه بيقدم خامات جيدة بأسعار مناسبة جدًا مع توصيل على مستوى العالم، بس هنا في مصر، أكتر حاجة بنفكر فيها هي جزئية الجمارك، لإن بطبيعة الحال لو الحاجة تم شحنها من بره مصر، بتكون الجمارك عالية وفي أوقات بتكون الجمارك أكتر من سعر المنتج اللي اشترتيه. علشان كده، النهارده هنقول لك على كذا طريقة تجيبي بيها منتجات شي إن shein من غير جمارك أو على أقل التقدير بجمارك قليلة جدًا، مع العلم إن معدل وصول المنتج لمصر بياخد حوالي من 8 لحد 20 يوم عمل.
اشتركي مع أصحابك
واحدة من أسهل الطرق للحصول على شحن مجاني وتخفيض عالي في الجمارك إن يكون الأوردر كبير أو مشترك فيه كذا حد، اللي بيحصل إن موقع شي إن shein بيقدم شحن مجاني لمصر لو الأوردر أكتر من 129 دولار يعني تقريبا 2000 جنيه، فلو إنتي وأصحابك اشتركتوا مع بعض هتوفروا كتير.
صفحات أو جروبات السوشيال ميديا
حاليًا هتلاقي على السوشيال ميديا سواء فيسبوك أو انستاجرام صفحات كتير بتعرض منتجات شي إن Shein بهامش زيادة بسيط وبيكون كل اللي عليكي تدفعيه فقط زيادة هو رسوم التوصيل ليكي داخل مصر، لكن مهم جدًا جدًا قبل ما تاخدي الخطوة دي إنك تسألي على سعر المنتج بتاعك على كذا جروب علشان تشوفي أقل سعر ممكن تاخديه، وبالتالي صفقتك تكون رابحة.
هنا التسوق عبر الأنترنت: ازاي تتسوقي زي المحترفين
موقع جوميا
جوميا يعتبر واحد من أفضل مواقع الشراء إن ما كانش أفضلها في مصر، الحلو فيه إن المنتجات مش مصر بس إنما فعلًا من كل أنحاء العالم، ومن ضمن اللي بيعرضه هو منتجات شي إن Shein. وكل الزيادة اللي بياخدها هو رسوم التوصيل يعني إنتي بتشتري المنتج بنفس السعر المكتوب وبس. رسوم التوصيل والشحن لحد باب بيتك مع وجود إمكانية إرجاع المنتج.
yashry.com
واحد من المواقع الوسيطة اللي تقدري تشتري منها اللي إنتي عايزاه ومش بس من شي إن Shein، لا هم عندهم تنوع كبير جدًا والتوصيل عندهم بيكون من 3 لحد 5 أيام. مش بتدفعي أي جمارك، هو مجرد رسوم التوصيل لحد عندك وبتدفعي سعر المنتج زي ما هو مكتوب على الموقع، عندهم التزام والحاجة بتيجي مضبوطة على حسب اختيارك.
edfa3ly.com
من المواقع الوسيطة اللي بتوفر لك شحن لحد باب البيت، بس الفرق إنك على الموقع ده بتحطي لينك المنتج اللي عايزة تشتريه وهو بيحسب لك كل المصاريف الزيادة واللي بتكون بسيطة، وزي ما قلت لك في أول نقطة كل ما كانت الشحنة كبيرة ومتقسمة بينك وبين أصحابك كل ما كانت الرسوم عليكي أقل.
دي كانت ترشيحاتنا ليكي، وفي الآخر بننصحك إنك تقرأي كويس اللي مكتوب على المنتج سواء الخامة أو المقاس علشان تتجنبي حدوث الصدمة لما المنتج يوصل، ولو ليكي تجربة مختلفة، شاركيها معانا في الكومنتات تحت.
التعليق باستخدام حساب فيس بوك