الصلاة من أهم وأصعب الحاجات اللي لازم نعوّد ولادنا عليها، صعوبتها في إننا لازم ناخد بالنا جدًا عشان ما تقلبش بيننا لتحدي أو لحِمل على الولاد أو عِند أو يضطروا يكذبوا علينا عشان يخلصوا من كلامنا، أو عقاب مثلًا. صعوبتها إنها لازم تيجي بالهداوة وبالصبر وبحبهم للصلاة وارتباطهم بيها مش بخوفهم مننا. في المقال ده، هاقول لك 5 أفكار لتشجيع الأطفال على الصلاة وتعويدهم عليها بالتدريج.
طرق تشجيع الأطفال على الصلاة
- بالتدريج مش مرة واحدة:
الرسول عليه الصلاة والسلام قال لنا نعلم الولاد الصلاة على 3 سنين، مش فجأة ولا بسرعة نستني نتيجة. فلما نبدأ على سن 7 سنين ممكن نبدأ الأول بفرض واحد لمدة طويلة من الوقت لحد ما يتعود إنه كل يوم في الوقت ده بيكون وراه حاجة ويبدأ يفتكر لوحده، فنزوّد بعدها فرض أو اتنين كمان.
- حفلة الصلاة:
لما الطفل يتم 7 سنين، ممكن تعملي له احتفال بسيط كده إنه كبر وهيبدأ يتعود على الصلاة، ممكن كمان بعد كده عادي، ممكن من عيد ميلاده التاسع مثلًا يلتزم خلاص في الصلاة، وممكن مسؤولية الصلاة يكون معاه ميزات تانية إنه كبر وهيبقى إنسان مسؤول أكتر، الفكرة في الأول إن الطفل مش مطلوب منه الكيفية أو الإتقان أو الروحانيات، الفكرة كلها فكرة تعود على الفكرة.
ممكن هنا تشوفي ازاي نعلم أطفالنا الصيام في رمضان
- شجرة الصلاة:
من الأنشطة اللذيذة اللي ممكن نعملها مع الطفل وتكون مرتبطة بالصلاة بس هي إننا نرسم أو نطبع شجرة الصلاة الأسبوعية أو الشهرية أو حتي اليومية، ونلوّن كل فرع لما نخلص فرض (بس بشرط ما نعملش لون أسود أو نشخبط أو علامة إكس على الفرض اللي ما تصلاش) احنا مجرد نسيبه فاضي لما يلوّن عدد معين مثلًا أو نكمل أسبوع ملتزم، نفاجئه بمكافئة. طبعًا في الطبيعي مش بنربط الفروض والواجبات بالمكافئات المادية، لكن في موضوع الصلاة والصوم، احنا محتاجين الطفل يتعود على “عادة الصلاة” نفسها من ناحية ومن الناحية التانية وبالتدريج وكل ما يكبر، نعلّي الروحانيات وارتباطها بالصلاة.
تشجيع الأطفال على الصلاة – المصدر: pinterest
- خليه يفكّرك:
من أكتر الحاجات اللي جابت نتيجة مع ابني هي إننا بنتفق إن كل واحد فينا يفكّر باقي البيت بالصلاة في يوم، وتبقى دي المهمة بتاعته طول اليوم، الأطفال بتحب إحساس المسؤولية ده وبيتحمسوا ويركزوا مع وقت الصلاة وفي نفس الوقت بيتقبّلوا لما احنا نفكّرهم بالصلاة في الأيام بتاعتنا.
- روتين للصلاة:
من أجمل الحاجات اللي بتشجعنا احنا شخصيًا ككبار على الالتزام بالصلاة هي تجهيز مكان جميل ولبس نضيف للصلاة، روتين الصلاة عمومًا للأطفال بيحببهم فيها وبيشجعهم: نجيب سجادة جديدة لكل طفل وإسدال ريحته حلوة ومكان هادي مرتب مخصص للصلاة.
- الصلاة جماعة:
رمضان قرب خلاص وفرصة اليوم بيبقى مرتب ومرتبط بصلاة المغرب والفجر وصلاة التراويح كمان، فسهل إننا في البيت نكون سوا ونجهز للصلاة سوا ونقعد ندعي مع بعض بعد الصلاة، صلاتنا معاهم والمناسك اللي بيشوفونا بنعملها باستمرار هي اللي هتثبت في تفكيرهم لحد ما يكبروا.
وأخيرًا ما ننساش نكون احنا القدوة اللي نحببهم في الصلاة ونعوّدهم إنها وقت راحة لقلبنا وعقلنا مش وقت زعيق ولا خناق لو فوتنا فرض، فنتجنب العقاب تمامًا لإننا مش عاوزين نوصل ليوم يضطروا يكذبوا علينا في الصلاة عشان يهربوا من عقابنا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك