المرض النفسي مش حاجة نخجل منها ونخبيها ولا حاجة تعيب صاحبها. المرض النفسي زيه زي أي مرض له أعراض وله علاج ومحدش كبير عليه! ولكن المهم إننا نكتشفه ونطلب المساعدة سواءً لنا أو للي حوالينا. في المقال ده، هنقول لك على تصرفات تعرفي بيها إنك إنتي أو الشخص اللي قدامك ممكن يكون بيعاني من مرض نفسي ومحتاج مساعدة.
دلائل المرض النفسي
-
القلق المستمر
المخاوف الشديدة أو القلق المرضي أو إن الشخص يكون طول الوقت حاسس بالذنب والتقصير بدون سبب.
-
تقلبات المزاج
بيكون في تغيرات حادة في الحالة المزاجية بصورة واضحة جدًا وبدون أسباب أو مواقف تستدعي التغيرات ده.
-
الانسحاب
قرار بالعزلة والبعد والانسحاب عن الناس القريبة والبعيدة والانسحاب من النشاطات الإجتماعية وعدم الرغبة في المشاركة في حاجات كانت مهمة بالنسبة له قبل كده.
-
التفكير في الانتحار
الأفكار الانتحارية وإظهار الرغبة المستمرة في الموت والتفكير في طرق له، من الدلائل القوية للمرض النفسي زي الاكتئاب ومن العلامات اللي ما ينفعش نستهون بيها أو نعديها من غير طلب مساعدة فورية.
عندي اكتئاب ومش عايزة آخد مضاد اكتئاب
-
تغيرات في عادات الأكل والنوم
وبتختلف من مريض للتاني، فيه مريض ممكن شهيته تتفتح أوي على الأكل، وفيه مريض يبقى عنده فقدان تام للشهية. وفيه اللي ييجي له أرق وما ينامش غير بمنومات وفي اللي بيفضل نايم طول اليوم ويفقد الرغبة إنه يقوم من السرير خالص.
-
هلوسة وأوهام:
زي إنه يبدأ الشخص يتوهم بإن اللي حواليه عايزين يؤذوه أو بيكرهوه أو يبدأ يتخيل إنه بيشوف ويكلم ناس وهم مش موجودين في الحقيقة.
لو واحدة من العلامات دي أو أكتر ملاحظاها عليكي أو على شخص قريب منك بصورة واضحة يبقي محتاجة تقدمي له الدعم وتتوجهي لاستشارة طبيب نفسي يساعدك على معرفة التشخيص الصح وعلاجه بصورة مناسبة.
1 comment
انا بعاني من كل دا انا محتاجه مساعده انا بفكر في الإنتحار