الإنترنت والأون لاين جيمز Online Games واللي بيجيلنا من وراهم! ولادنا بقوا يقضوا وقت كبير للأسف من وقت فراغهم على الإنترنت. وبالتالي بقوا معرضين جدا لخطورة التعرض لمحتوي مش مناسب ليهم وأكبر من سنهم، ممكن الطفل يشوف مشهد إباحي بالصدفة وممكن كمان فضوله يخليه بعد كده إنه يدور على المشاهد دي بنفسه لو ما لحقناهاش من الأول. طيب هل فيه حاجة ممكن عن طريقها نمنع ده؟ أكيد آه. علشان كده، جمعنا لك أفضل تطبيقات لحماية الطفل من الإنترنت.
أفضل تطبيقات لحماية الطفل من الإنترنت
- Secure Teen Parental Control
- ESET Parental Control
- kaspersky safe kids
- YouTube Kids
- التصفح الآمن
Secure Teen Parental Control
الأبلكيشن ده مفيد في إنه بيدينا فرصة نعرف نخصص مواقع معينة بس الطفل يقدر يوصل لها ونقدر نمنع مواقع تانية تمامًا إنها تظهر قدامهم.
ESET Parental Control
الأبلكيشن ده كمان هايل في إنه بيمنع ظهور أي محتوى حساس مش بس إباحي لكن أي محتوي فيه عنف أو قتل أو مشاهد فيها خمور، وكمان بيقدر يورينا ريبورت لأكتر مواقع الطفل بيدخل عليها. وكمان نقدر من خلاله نحدد فترة زمنية معينة اللي متفقين مع الطفل عليها إنه يستخدم فيها الموبايل بس، والمختلف اللي فيه إنه كمان فيه gps نقدر نحدد عن طريقه لوكيشن الطفل في أي مكان.
kaspersky safe kids
الأبلكيشن ده عشان نستفيد من كامل المميزات اللي فيه هنضطر نشتريه لأنه مش مجاني بالكامل، ولكنه رائع في حجب المواقع والمشاهد الإباحية بالكامل، وكمان بيمنع ظهور أي صورة محتواها مش مناسب لسن الطفل، وبيساعدنا كمان نحط كلمات معينة لو موجودة في أي فيديو يمنع ظهوره تمامًا. وفيه كمان خاصية تحديد موقع الطفل وربط اللوكيشن بتاعه بمكان معين، لو بعد عنه، يبعت لنا رسالة فورًا. وبنحدد من خلاله المدة الزمنية اللي الطفل هيفتح اليوتيوب فيها، ومن خلال الأبلكيشن ده كمان نقدر نعرف كل حاجة بيعملها الطفل على الموبايل بتاعه وبيسجل اللي بيكتبه. ولو إني مش مع مراقبة الطفل من غير ما يعرف، يعني نحط قوانين وما يكونش فيه حاجات نخبيها لكن ما نراقبش ولادنا من وراهم.
YouTube Kids
وده بالنسبة لنا أسهل بديل أمان للطفل بدل اليوتيوب العادي، لأن أوقات مهما ظبطنا نوع الفيديوز اللي بتظهر للولاد فهو في أوقات كتير بيظهر إعلانات في النص مش مناسبة لسنهم. والميزة إن أبلكيشن يوتيوب كيدز فيه خاصية الحظر الكامل لأي قناة أو فيديو نحس فيه إنه مش مناسب للطفل أو أكبر من سنه أو حتي مش مناسب لينا كأسرة.
التصفح الآمن
وده طبعًا الأساس اللي محتاجين نعمله قبل ما ولادنا يستخدموا الشاشات. وهو عن طريق جوجل كروم، بنقدر نحدد بيه المحتوي المسموح للبحث، والخدمة ده بتمنع ظهور أي نتايج غير مناسبة على محرك البحث أو اليوتيوب كمان. فحتي لو الطفل عمل سيرش بنفسه عن كلمة مثلًا سمعها بس مش مناسبة، فمش هيطلع له نتايج في البحث. وهو ده اللي محتاجينه إن الطفل يلجأ لنا احنا يسألنا ويفهم مننا مهما كان السؤال محرج بدل ما يعمل سيرش ويا عالم إيه اللي هيطلع له.
التعليق باستخدام حساب فيس بوك