محتويات المقال
عارف أنا الخناقة المشهورة بين الراجل والست في البيت، وعارف اللحظة اللي بتبص فيها الست لجوزها وتقول له: “انت طول اليوم ماسك الموبايل ومش مركز معانا خالص.” بس خلاص! من هنا ورايح محدش هيقدر يقول لك كده، علشان هيكون معاك مجموعة تطبيقات موبايل مهمة لكل أب، تجمع بين المرح والتسلية، وفي نفس الوقت، الفايدة للبيت والزوجة والأبناء… ماتيجي نشوف.
تطبيقات موبايل مهمة لكل أب
- Quick Tips for New Dads
- Alfred Camera
- Trello
- حكايات قبل النوم
- Chess
Quick tips for new dads
الأبليكيشن ده لا غني عنه لكل أب جديد، وواضح من العنوان هو بيعمل إيه. الأبليكيشن فيه سلسلة رائعة من النصائح المفيدة للأب الجديد علشان يعرف يساعد مراته في العناية بالبيبي. بداية من تسكيت الطفل لما يعيط ونهاية بطرق عمل الأكل له ومئات النصايح التانيه العملية والمهمة جدًا.
Alfred Camera
الأبليكيشن ده مش مخصص للآباء بشكل خاص. لكن من خلال تجربتي له لفترة طويلة، اكتشفت أنه أكتر من رائع لكل أب. خصوصًا اللي بيسيبوا الأولاد يلعبوا في أوضتهم، وفي نفس الوقت، عاوزين يتابعوهم علشان لو حصل لهم مشكلة، يتدخلوا بسرعة. الأبليكيشن ببساطة بيحوّل أي تليفون عندك لكاميرا مراقبة. كل اللي عليك تعمله هو إنك تنزل الأبليكيشن على التليفونين وتوصلهم ببعض في دقايق. من بعدها تقدر تتابع اللي بيحصل مع أولادك في أوضتهم وانت قاعد في مكانك. فيه أسهل من كده؟!
Trello
الميزة الأساسية في Trello إنه متاح للتحميل على كل الأجهزة تقريبًا، بدايةً من الكمبيوتر وحتى التليفون اللي بيشتغل بنظام iOS أو أندرويد. يعني ممكن تدخل عليه من أي مكان وفي أي وقت. بيعمل إيه بقى Trello؟ الأبليكيشن بينظم كل حاجة في حياتك لمجموعة من القوائم. أنا شخصيًا كنت باستعمله في شراء الطلبات للبيت. وكنت أقدر أدخّل أي شخص معايا من خلال الدعوات Invitation علشان يضيف طلبات البيت اللي هو عاوزها. ولما أبقى في السوبر ماركت باشوف إيه المطلوب وأجيبه. وداعًا للخبطة والنسيان. خاصةً لما تستعمل Trello علشان تنظم طلبات البيبي الجديد وتضمن أنك مش هتنسى حاجة منها.
حكايات قبل النوم
اللطيف في أبليكيشن (حكايات قبل النوم) أنه أبليكيشن عربي بسيط وخفيف وسهل الاستخدام. وله ميزة رائعة: إنه بيوفر للمستخدمين عدد كبير من قصص قبل النوم. علشان كده، لما حد من الأولاد يقول لك “احكي لي حدوتة يا بابا”. مش هتقعد تضرب أخماس في أسداس. علشان كل مرة هيكون عندك قصة جديدة وشيقة ومع صور لطيفة كمان.
Chess.com
النصيحة اللي باقولها دايمًا لكل أب لما يوصل ابنه لسن مناسب إنه لازم يعلّمه ازاي يلعب شطرنج. الشطرنج مش بس رياضة جميلة جدًا لتنشيط المخ والذاكرة، لكن كمان بيعلّم الابن التفكير المنطقي والصبر وعدم الاستسلام والتكتيك الصحيح.
تطبيق Chess.com مش بس بيعلم الأطفال والكبار على حد سواء ازاي يلعبوا شطرنج. لكنه كمان بيقدم كل يوم مجموعة ألغاز لكافة مستويات اللاعبين. والأحلى إنك تقدر تلعب مع لاعبين من كل مكان في العالم.
الجميل في تطبيق Chess.com إنه مش بس مناسب للصغار، لكن للكبار كمان. وأوعدك هتقضي وقت لطيف عليه مع أولادك.
تابعوا المزيد من مقالات الآباء هنا.
التعليق باستخدام حساب فيس بوك