محتويات المقال
بقى لنا سنين بنسمع عن تطعيم الإنفلونزا الموسمية. بس السنة دي، التوصيات بقت أكتر عن أهميته في ظروف فيروس كورونا. طيب ليه تطعيم الإنفلونزا الموسمية مهم؟ وهل له علاقة فعلًا بفيروس كورونا؟ وإيه هو أنسب وقت للتطعيم؟
-
أهمية تطعيم الإنفلونزا وعلاقته بفيروس كورونا
تطعيم الإنفلونزا مهم جدًا لإنه تطعيم وقائي بيقلل من نسبة الإصابة بفيروس الإنفلونزا، فنتيجة ده هيقلل كمان النزول للدكاترة والمستشفيات في الظروف الحالية، بالذات للأطفال اللي عندهم حساسية الصدر، وما أكترهم دلوقتي. ده غير إن تطعيم الإنفلونزا بيخلّي أعراض الإصابة بالبرد أبسط بكتير، وده هيساعد الجهاز المناعي إنه يكون بصورة أفضل لمواجهة فيروس كورونا في حال التعرض له لا قدر الله. وكل ما نحمي نفسنا ومناعتنا ومناعة ولادنا، كل ما بنقلل نسبة العدوى لغيرنا اللي ممكن تكون مناعتهم أضعف بكتير. التطعيم كمان ضروري في تخفيف العبء على المستشفيات والأنظمة الصحية من الانهيار في حال استقبال حالات إنفلونزا إضافةً إلى حالات فيروس كورونا المستجد.
-
هل تطعيم الإنفلونزا أمان؟
فيه أقاويل كتير منتشرة بإن تطعيم الإنفلونزا خطر على كبار السن، أو بعد ما بناخده بييجي لنا دور برد قوي، لكن الكلام ده الدراسات أثبتت عدم صحته وإن ده غالبًا مجرد صدف. لإن مفيش لحد دلوقتي دراسة أو بحث بيثبت ده، لكن التطعيم له بعض الأعراض الجانبية زي احمرار ووجع مكان التطعيم في الدراع وارتفاع بسيط في الحرارة بعض الأوقات.
-
أنسب وقت لأخذ تطعيم الإنفلونزا
انتشر السنة دي كلام إن التطعيم لازم يتاخد من بدري، من شهر أغسطس، لكن اتضح إن ده كمان كلام ما لوش أساس من الصحة. بالعكس، منظمة الصحة العالمية بتنصح إنه سبتمبر وأكتوبر ونوفمبر أنسب الشهور، فهو مناسب جدًا وحتى لو اتأخرنا لشهر يناير وفبراير، فهو هيفضل برده مفيد في الوقاية طول ما موسم الإنفلونزا شغال.
-
أشهر أماكن تطعيم الإنفلونزا الموسمية
تقدري تلاقي التطعيم في أي فرع من فروع المصل واللقاح، وكمان موجود في معظم الصيدليات الكبيرة، وبيكون تمنه في حدود 170 جنيه.
وفي النهاية، مهم نعرف إن لقاح الإنفلونزا الموسمية مش عشان يحمي أو يمنع البرد تمامًا، أو يمنع الإصابة بفيروس كورونا، ولكنه بيقلل الحِمل علي الجهاز المناعي وبيحمي بطريقة غير مباشرة من مضاعفات الإصابة بفيروس كورونا.
التعليق باستخدام حساب فيس بوك