محتويات المقال
أعلنت وزيرة الصحة والسكان الدكتورة هالة زايد عن حملة هتبدأها وزارة الصحة ضد مرض شلل الأطفال بدءًا من يوم 16 فبراير المقبل لمدة 4 أيام. نقلا عن جريدة الأهرام، الحملة هتستهدف المصريين وغير المصريين “المقيمين على أرض مصر” من أول عمر يوم وحتى 5 سنوات بالمجان لرفع الحالة المناعية للأطفال وكمان رفع الحالة المناعية للأطفال غير المصريين الوافدين من البلاد اللي بينتشر فيها المرض للحفاظ على مصر خالية من مرض شلل الأطفال.. لو عندك أطفال في السن ده متنسيش ميعاد الحملة عشان تقدري تروحي تدي أولادك التطعيم.
إيه هو مرض شلل الأطفال؟
شلل الأطفال هو مرض فيروسي شديد العدوى وبالرغم من الجهود اللي بتحصل حول العالم عشان يقضوا على المرض وتصريحات منظمة الصحة العالمية بإنخفاض المرض بنسبة كبيرة حول العالم تصل الى 99% ، لكن فيه بعض الأماكن في أفريقيا وآسيا بيظهر فيها حالات عدوى.
أعراض شلل الأطفال
شلل الأطفال بيهاجم الجهاز العصبي وبيسبب شلل تام وفي بعض الأوقات ممكن يسبب الوفاة، معظم الأشخاص بنسبة 90% بتظهر عليهم أعراض خفيفة زي الحمى والصداع والقىء وتصلب الرقبة والآم الأطراف وللأسف ملوش علاج غير تخفيف من حدة الأعراض زي العلاج الطبيعي والأدوية المضادة للتشنجات للعمل على التحسين من القدرة على الحركة.
طرق انتشار شلل الأطفال
المرض بينتشر عن طريق الإتصال بالأشخاص المصابة، لما بيصاب الشخص بالمرض، الفيروس بيدخل عن طريق الفم وبينتشر في الأمعاء وبيخرج في البيئة المحيطة عن طريق البراز وبينتشر في حالات سوء النظافة والصرف الصحي.
طرق الوقاية من شلل الأطفال
الوقاية من المرض بتكون عن طريق التطعيم اللي بيدي أجسام مضادة للمرض وبيزود مناعة الطفل منه، التطعيم بيتاخد على فترات مختلفة في سنوات الطفل الأولى في التطعيمات الروتينية الخاصة بالصحة وكمان بيتاخد في أوقات الحملات الوقائية لزيادة المناعة لمنع انتشار المرض بين الأطفال زي حملة وزارة الصحة الشهر القادم.
متنسيش ميعاد الحملة ولو طعمتي طفلك مؤخرًا أو طفلك بيعاني من مشكلة صحية استشيري طبيبك بخصوص الحملة وبنتمنى ليكم دوام الصحة والسلامة.
التعليق باستخدام حساب فيس بوك