عشان تعرفي الشهور اللي قبل كده، ادخلي هنا.
خلاص رحلة طفلك في عامه الأول قربت تخلص، وبدأت تظهر عنده مجموعة من المهارات اللي هتساعده في التعامل مع العالم الخارجي بشكل أكبر وأفضل. وده طبعًا بدعمك وتشجيعك ومتابعتك له في الفترة دي. لاحظي إن السن ده لسه مش مدرك خالص معنى الخطر، وبيكون فيهم اندفاع وقوة بسبب الفضول والرغبة في اكتشاف العالم. رحلته الحقيقية في الحياة هتبتدي فعليًا بعد السنة الأولى. وده هيشكل عليكي ضغط المراقبة المستمرة لحمايته والحفاظ عليه. تعالي نشوف ملامح تطور مهاراته من خلال النقط دي.
- المهارات الحركية
في الشهر ده، هتلاقي إنه أتقن بشكل كبير التحكم في جسمه وبقى يعمل حركات بثبات وقوة من غير ما يتهز أو يقع، زي الوقوف والجلوس وحتى الانحناء علشان يوصل لحاجة بعيدة عنه. وابتدى يساعدك خلال عملية تجهيزه للخروج زي إنه يمد رجله علشان تلبسيه جزمته، ويمد دراعه علشان تلبسيه هدومه. ويقدر برضه في الفترة دي إنه يقوم بشوية حاجات بشكل مستقل، زي إنه ياكل بنفسه، ويشرب بنفسه، عن طريق إنه يمسك الكوباية المخصصة له. ويجمع اللعب بتاعته في الصندوق المخصص لها.
- اللعب
في الفترة دي، الطفل بيكون منجذب جدًا للأشياء المتحركة، وبرضه يحب يتعامل مع الحيوانات الأليفة. لو انتي من النوع اللي بيربي حيوان أليف، علميه إزاي يطبطب عليه ويلعب معاه من غير ما يشد ديله، لأن ده بيسبب للحيوان ألم شديد جدًا. وعمومًا لما تحبي توجّهي أمر لطفلك، يفضل إنك تنزلي لمستوى نظره، أو ترفعيه ليكي وتبصي لعينه علشان يقدر يفهم طلبك من خلال ملامحك.
- الحواس
في الشهر ده، دورك في تنمية مهارات طفلك الحسية ما زال مستمر. بس الحلو في الفترة دي إن تجاوب طفلك معاكي واضح. التجاوب ده عمومًا بيقوّي روابط التواصل بينك وبين طفلك، وبيخليكي تتابعي مدى التقدم اللي هو بيحققه. هتحتاجي تستعيني بالكتب الكبيرة الملونة المخصصة للأطفال في الفترة دي. هتساعدك وطفلك هيحبها. كمان في الفترة دي، بيستمتع جدًا بالأغاني والأناشيد والحكايات بصوتك. هو بيحب صوتك وبيحاول يتجاوب معاكي عن طريق محاولته لتقليدك. فاستمري في الإتجاه ده معاه. هتلاقي تطور ممتاز في الجانب الخاص بالحواس.
- التواصل
طفلك دلوقتي بيفهمك أكتر من أي وقت فات. يعني هو بيفهم معنى بعض الكلمات اللي انتي بتقوليها له زي “لا”. هو هنا عارف معنى إنك رافضة الشيء المعين اللي هو بيعمله. بس نصيحة: ما تكتريش من الكلمة دي معاه، لأنها مع الوقت هتفقد معناها بالنسبة له، وهيوصل لمرحلة إنها مش بتشكل أهمية عنده. استخدميها في أوقات التهديد بالخطر اللي هو ممكن يتعرض له. علشان الكلمة تفضل محافظة على معناها عنده وتساعدك على حمايته.
عمومًا هتلاحظي إن حركة طفلك بقت حرة دلوقتى. التحكم فيه أصعب من الأول بعد ما اكتسب شبه تحكم في مهاراته الحركية. العالم مثير للفضول بالنسبة له. العالم واسع وكبير وكله حاجات جديدة عليه. انتي هنا وقع عليكي عبء حمايته، لأنه فعلا مش مدرك خطورة أو فايدة اللي حواليه. علشان كده، استمري في حمايته، وفي نفس الوقت تشجيعه وانتي عينك عليه. وشجعيه على الإرتباط بالكتب عن طريق إنك تمارسي معاه قبل النوم وقت القراءة والفرجة على الكتب الملونة الجميلة. ده هيساعده إنه لما يكبر يحبها. وهيكون له مردود كويس جدًا على مستقبله.
التعليق باستخدام حساب فيس بوك