محتويات المقال
حمد الله على سلامتك من الولادة. أول سنة في عمر طفلك من أهم السنين في تأسيس جسمه، وعشان كده مهم جدًا تكوني عارفة أهم معلومات عن مراحل تطور الرضيع شهر بشهر في عامه الأول. عملنا لك سلسلة بتتناول نمو الطفل في العام الأول بعد الولادة، وجمعنا لك أبرز المعلومات هنا وهتلاقي تحت كل شهر رابط لمقالة مفصلة عن الشهر.
مراحل تطور الرضيع: الشهر الأول
أول شهر بعد الولادة، أكتر حاجة هتلاحظيها إن وزن طفلك بيقل في أيامه الأولى. مافيش داعي لأي قلق، لأن في الوقت ده جسمه بيكون بيتخلص من السوائل الزيادة واللي غالبا بتكون 10% من وزنه. بس بعد كده، هتلاقي إن وزنه بيزيد بين 420 إلى 850 جرام خلال الشهر ده. عمومًا طبيب طفلك هيكون مسجل وزنه علشان يتابعه كل شهر علشان يتأكد إن نموه ماشي بالشكل الصحيح.
اعرفي كل تفاصيل تطور الرضيع في الشهر الأول من هنا.
تطور الرضيع: الشهر التاني
هتلاقي الوضع دلوقتي اتحسن كتير عن بداية الشهر الأول. استعدتي صحتك بشكل كبير، اتعرفتي عليه أكتر، بقى عندك قدرة تميزي صوت عياطه ده زعل ولا جوع ولا معاد تغيير ولا دلع ولا مغص. وكمان عندك قدرة أعلى على السيطرة،
اعرفي تفاصيل أكتر عن النمو والحركة والنوم وأكتر بكتير هنا.
مراحل نمو الطفل الرضيع: الشهر التالت
طفلك في الشهر ده شبه متحكم بالكامل في حركة رأسه ورقبته، حتى لما تشيليه، هتلاحظى إن معدل ميل رأسه تقريبًا اختفي. في الشهر ده، عضلات الجزء العلوي من جسمه بقت قوية بشكل كافي إنه يقدر يتحكم في حركة الرأس بحيث إنه لو نام على بطنه يقدر يحرك رأسه يمين وشمال بسهولة من غير صعوبات.
اعرفي كل تفاصيل تطور الرضيع في الشهر التالت من هنا.
مراحل تطور الطفل الرضيع: الشهر الرابع
الشهر الرابع هو الشهر الرسمي للضحك والشقاوة وكل التجارب الجميلة مع طفلك. في الشهر ده هيبتدي نوع جديد من التواصل عن طريق إنه يتعرف على العالم الخارجي من خلال فمه، هتلاقيه حرفيًا أي حاجة توصل لإيده بيحطها في بوئه، ودي فرصة إنك تبتدي تعرضيه لأشكال مختلفة من الأسطح بهدف تطوير حسه الإدراكي. زي مثلًا قماش ناعم، كتاب، لعبة قطنية، أو بلاستيكية دول هيوفوا الغرض.
لكل التفاصيل عن الشهر الرابع، ادخلي المقالة دي.
الشهر الخامس
الطفل من نفسه في الشهر ده بيبدأ يطور مهاراته وقدراته اللغوية عن طريق إصدار أصوات مختلفة وتكرارها. وهتلاقي إنه بدأ يلاحظ بشكل أفضل وأقوى من الفترة السابقة. الموضوع بيوصل كمان إنه قادر على ملاحظة الأجزاء الصغيرة زي الخرز. وكمان هتلاقيه بيحب جدًا يتابع العصافير والفراشات لما يخرج بره البيت.
اعرفي تفاصيل أكتر عن الشهر ده من هنا.
الشهر السادس
وصلنا لنص رحلة عام طفلك الأول. حاجتين هيعتبروا سمة أساسية في الشهر ده من هنا ورايح: إدخال الأكل الأصلب في تغذيته ومراقبته الشديدة علشان حركته زادت وهو بيحط كل حاجة – بمعنى كل حاجة – في بقه، وده ممكن يعرضه للخطر.
اعرفي تفاصيل أكتر عن الشهر السادس هنا.
الشهر السابع
في الشهر ده، مهارات طفلك في استخدام إيده بقت أفضل من أي وقت فات. بقى ينبسط جدًا لما يلعب وحد يغني له، وبيغضب ويزعل جدًا لو اختفيتي من قدامه. هتلاحظي في الشهر ده بداية القريفة اللي بتيجي مع التسنين اللي عادة بتبدأ مع الشهر ده. وهتلاحظي إن اللعاب زاد عنده أكتر من قبل كده.
اعرفي باقي التفاصيل عن نمو الرضيع في الشهر السابع هنا.
الشهر التامن
في الشهر ده، طفلك بيتعرض للوقوع كتير لأنه دخل مرحلة الحبو والتدحرج استعدادًا لتعلم المشي. هتلاقيه قادر يتسند على عفش البيت ويمسك فيه بإيديه الإتنين والوقوف لمدة دقايق وهو ماسك بإيده الإتنين. انتي دورك لما تشوفيه كده إنك تسندي ظهره بإيدك لحمايته من الوقوع، وعلشان تحسسيه بالأمان، وتدعمي عملية تدريبه وتطوره الحركي والجسدي. استمتعي بالمرحلة دي وما توصّليش لطفلك أي قلق أو خوف وهو بيقوم بالتصرف ده.
لكل التفاصيل عن الشهر التامن، ادخلي هنا.
الشهر التاسع
في الشهر ده طفلك ابتدى يتعرف على ملامح بيتكم كويس بما إنه إبتدى يتحرك حركة مستقلة عنك. وده شيء جميل ليك، لكن دورك إنك تأمني المكان ليه بحيث تبعدي عنه أي قطعة أثاث حادة، أو غير مستقرة، أو قابلة للكسر لحمايته من أي حوادث. لإن قدرتهم على تميز الخطورة مش موجودة. غير إن فضولهم لإكتشاف عالمهم الكبير أكبر من أي إحساس بالحذر.
عشان تشوفي شكل تطور طفلك في الشهر التاسع عامل إزاي، ادخلي هنا.
الشهر العاشر
الشهر العاشر في عمر طفلك أكتر سمة بتميزه هو التطور المذهل والسريع جدًا في مهاراته الحركية أكتر من أي مهارة تانية في طفلك. خلينا نستعرض مع بعض إيه هي التطورات دي، بس بكرر اللي قولته لك قبل كده. دي مجرد سمات عامة لكل الأطفال. بس في الحقيقة، كل طفل مختلف عن غيره أوقات في سمات بتظهر بشكل مبكر وأوقات بتتأخر.
اعرفي كل حاجة عن تطور الطفل الرضيع في الشهر العاشر.
الشهر الحادي عشر
خلاص رحلة طفلك في عامه الأول قربت تخلص، وبدأت تظهر عنده مجموعة من المهارات اللي هتساعده في التعامل مع العالم الخارجي بشكل أكبر وأفضل. وده طبعًا بدعمك وتشجيعك ومتابعتك له في الفترة دي. لاحظي إن السن ده لسه مش مدرك خالص معنى الخطر، وبيكون فيهم اندفاع وقوة بسبب الفضول والرغبة في اكتشاف العالم. رحلته الحقيقية في الحياة هتبتدي فعليًا بعد السنة الأولى.
اعرفي من هنا كل تفاصيل تطور الرضيغ في الشهر 11.
الشهر الثاني عشر
في الفترة دي، حركة طفلك ونتيجة الشهور اللي فاتت بتكون واضحة وجميلة. ما تنسيش في الفترة دي إنك تستمتعي معاه وتصوريه صور كتير لأنها مرحلة شقاوة رائعة وأيام مش بتتكرر.
اعرفي كل المعلومات عن الشهر ده ومهارات طفلك الرضيع فيه هنا.
التعليق باستخدام حساب فيس بوك