محتويات المقال
كلنا سمعنا قبل كده القصص اللي انتشرت للأطفال اللي بيعذبوا قطة وحابسينها وبيضربوها، وغيرها كتير من القصص الحزينة بجد. الدراسات بتقول إن تعذيب الأطفال للحيوانات ارتبط دايمًا بوجود مشاكل عاطفية أو نفسية عند الأطفال دي، زي إنهم بيتعرضوا لسوء معاملة في البيت أو لاكتئاب أو رغبة في الانتقام من الأضعف منهم عشان يثبتوا قوتهم، وإن 30% من الأطفال اللي بيتعرضوا للعنف المنزلي بيلجؤوا لمعاملة الحيوانات بعنف.
وبناءً على كلام الجمعية الأمريكية للرفق بالحيوان، تعذيب الحيوانات بيشمل أي سلوك يضر الحيوان بقصد أو من غير قصد زي حرمانه من الأكل أو المياه أو إيذاؤه جسديًا. لكن في نفس الوقت، ممكن جدًا يكون تعذيب الحيوان أو سوء معاملته هو مجرد عدم فهم كفاية من الطفل، وإنه لسة مش مدرك إن الحيوان كائن حي بيحس زينا عادي، عشان كده دايمًا نتعامل مع سوء معاملة الحيوانات مع الطفل على حسب عمره.
-
الأطفال من سنة لـ 5 سنين:
بيكونوا لسة مش مستوعبين طريقة التعامل الصح مع الحيوانات وأوقات نشوف طفل بيشد قطة من ديلها أو يقعد على ضهر الكلب بتاعه وبيتعامل إن الحيوانات اللعبة بتاعته. في الحالة دي، مهم تدخل وتوجيه الأهل لطريقة التعامل مع الحيوانات وتشجيع الطفل على رعايتها والاهتمام بيها وتواجدهم مع الطفل طول الوقت لحد ما يتأكدوا إنه مش هيؤذي الحيوان ده.
-
من 6 سنين لـ 12 سنة:
في السن ده، خلاص مفروض يكون الطفل فاهم ومستوعب كويس إن الحيوانات دي أرواح ويعرف يفرّق بين الصح والغلط في التعامل معاهم، لكن لو لاحظتي تعمد من الطفل لأي نوع إساءة معاملة للحيوانات، فلازم وقتها نتدخل ونفهم من الطفل أسباب عنفه مع الحيوانات. أوقات بيكون تقليد لمشهد شافه في التلفزيون أو بيجرب ومش متخيل نتيجة التجربة، وممكن في بعض الحالات يكون علامة لتعرض الطفل لعنف جسدي أو جنسي، اللي بتحتاج اللجوء للمتخصصين.
يا ترى لو الحضانات فتحت، هيبقى شكلها كده؟
-
فوق 12 سنة:
المراهقين اللي بيكون عندهم رغبة لتعذيب الحيوانات بيكون جواهم طاقة غضب كبيرة، بتبان كمان في شكل سلوك عدواني وعنيف ناحية الأشخاص مش الحيوانات بس، وبيكون لازم في الحالات دي استشارة أخصائي نفسي في أسرع وقت.
تربية الطفل علي الرحمة بالحيوان والتعامل معاهم والاهتمام بيهم له فوايد كتير جدًا لشخصيته. عشان كده، لازم ما نتجاهلش أي سلوك عنيف من الطفل ناحية الحيوانات عشان ما يتطورش ويكبر معاه.
المصادر:
spcala
psychology today
التعليق باستخدام حساب فيس بوك