أنا فاكرة أول مرة شفت فيها كلمة “أطفال قوس قزح” والكرسي اللي رجع لورا: إيه ده في إيه؟ وبعدين رجعت ركزت قراءة في المعلومة ولقيت إنه بيتكلم عن حاجة بتمسني بشكل شخصي، حاجة كنت موجودة وهي بتحصل لناس قريبة مني جدًا.
أطفال قوس قزح هو مصطلح بيطلق على الأطفال اللي بييجوا بعد تجربة فقدان طفل في المهد أو إجهاض، التجربة اللي بتبقى مؤلمة جدًا على الأم وعلى اللي حواليها، تجربة بتبقى من أصعب التجارب اللي الإنسان ممكن يعدي بيها.
بيسموهم أطفال قوس قزح عشان قوس قزح هو علامة الأمل والفرح والبهجة اللي بتيجي بعد عاصفة شديدة ومطر ورعد مش بيقف، لحظة النور والرضا اللي بتنور قلب الأم لما تشيل في إيدها الفرح من أول وجديد، الفرح اللي بيكون عبارة عن طفل صغير منمنم وجميل.
مشاعرك اتلخبطت لما عرفتي إنك حامل بعد تجربة فقد؟
طبيعي جدًا ومش لازم تكون كلها مشاعر إيجابية مليانة فرح وبهجة، هتلاقي نفسك مبسوطة وفي لحظة تانية زعلانة وبتفكري في طفلك السابق اللي ما قدرش يكمل في الدنيا.
ممكن تحسي بالشك في نفسك ومشاعرك والذنب كمان أحيانًا وتفكري هو الناس هتفكر إني أنا نسيت ابني الأولاني؟ أو خلاص بطلت أكون زعلانة عليه؟ وهو أنا أصلا كنت زعلانة كفاية في أول مرة؟
المشاعر المتلخبطة دي طبيعية جدًا وهتلاقي نفسك إنتي وجوزك في وقت مبسوطين أوي وفي وقت خايفين تجربة الفقد تتكرر.
أنتي أم جميلة وإنك تخوضي تجربة الإنجاب التاني وتتشافي من التجربة المؤلمة مش معناه أبدًا إنك نسيتي خسارتك، بالعكس إنتي هتتعلمي إزاي تحبي ابنك اللي ربنا مقدرش إنه يعيش مع ابنك التاني، هتقدري تفرحي بالتجربة وتحطي إيدك على قلبك في نفس الوقت.
“حبيب ماما ” اللي ما أخدش وقت كفاية معاكي في الدنيا هيخليكي أم عندك عطاء وصدق أكتر وهتكوني ممتنة لنعمة الأولاد أكتر من قبل كده، ده جزء طبيعي من التجربة.
طفلك الجديد ” طفل قوس قزح ” هو ضوء في نهاية نفق طويل من الآلام ومن نعمة ربنا علينا إن الألم في أوقات كتير بيخلينا أشخاص أفضل، أكثر رحمة وأقل غرورا، إنتي هتكوني عارفة ده وهتفتحي باب قلبك من جديد لتجربة أمومة تستاهليها، وطفل هيكون محظوظ جدًا إنك أمه، هتشمي ريحته وتحسيها أحسن ريحة في العالم، وتلمسي وشه وتشوفي النور اللي هيرجع حياتك تاني بإذن الله.
تمنياتي لكل أمهات ” قوس قزح ” بالتشافي من التجربة والبداية الجديدة والسعيدة كمان.
المصادر:
bumpboxes
2 تعليقان
What you wrote is very very true
أنا حبيت إحساسك انه حقيقي :)) أتمنى إنه يكون لمسة لطيفة لأي حد مر بالتجربة ..