ازاي نعلّم أولادنا التعبير عن المشاعر

من أهم عناصر النمو العاطفي: التعبير عن المشاعر وكيفية إدارتها والتعامل معاها. كتير بنشوف ناس كبيرة شباب أو أكبر مش عارفين يعبّروا عن مشاعرهم ولا يتعاملوا معاها بشكل سليم. ومن أهم الأسباب في ده إنهم وهم اطفال ما كانش مسموح لهم يحسّوا بمشاعرهم ويعبروا عنها وخصوصًا المشاعر السلبية. كتير من الآباء و الأمهات بيكون صعب عليهم يشوفوا أولادهم بيعانوا، وده بيخليهم في مواقف كتير إما بينكروا المشاعر اللي بيحسها الطفل ظنًا منهم إن ده هيخفف عنه، أو إنهم يحاولوا يصلّحوا الموقف على أمل إن الطفل يحس إنه أحسن.

كمان الأطفال بيكون عندهم صعوبة في إنهم يقولوا هم حاسين بإيه، إنهم مش عارفين يسمّوا مشاعرهم، وفي الأغلب بيوصلوا لنا مشاعرهم بالتصرفات زي نوبات الغضب مثلًا. عشان كده، محتاجين كأب وأم ولمصلحة الطفل ولصحته النفسية إني أسمح له إنه يحس بإللي هو حاسس بيه، وده لأسباب كتير وفوائد بتعود على الطفل.

فوائد تعليم الأطفال التعبير عن المشاعر

• إنه هيقدر يكون متعاطف وداعم للآخرين.
• هيساهم إنه يكون أداؤه أفضل في المدرسة وحياته المهنية.
• هيساعده إنه يتمتع بعلاقات أكثر إيجابية واستقرار
• هيساعده إنه يتمتع بصحة نفسية كويسة ومشاكل سلوكية أقل.
• هيساعده إنه يطوّر مهارات المرونة والتكيف.
• هيساعد الطفل إنه يشعر بمزيد من الكفاءة والقدرة والثقة ويكون عنده شعور إيجابي بالذات.

المشاعر مؤشر مهم بيساعد إننا نتعرف على نفسنا ونعرف إيه هو المهم بالنسبة لنا. عشان كده، مهم أعرف ازاي أتعامل مع مشاعر طفلي من خلال مجموعة خطوات هتساعده بشكل سليم.

خطوات التعامل مع مشاعر طفلي

• إني أقبل مشاعره زي ما هي. ده بيساعد إنه يحس إنه مسموع وإن فيه حد فاهمه.
• إني أقدّر مشاعره وأسمعه وأتعاطف معاه.
• إني أسأله انت حاسس بايه دلوقتي؟ السؤال تقدير واهتمام بمشاعره.
• إني أعبّر عن مشاعره إللي قالها بشكل أوضح زي مثلًا “أنا شايف إنك متضايق/محبط/حزين/ وهكذا”
• أوصّل للطفل إن أي شعور مسموح بيه حتى المشاعر السلبية. لكن فيه فرق بين الشعور والتصرف. يعني مثلًا مسموح إني أحس إني متغاظ أو متضايق من حد، لكن ده ما ينفعش يكون مبرر إني أضربه أو أؤذيه، وهو ده الفرق: الشعور حق مشروع، أما التصرف محتاجين نفكر فيه.
• أساعد طفلي أنه يعرف مشاعر الآخرين وأقدم له فرص بإني أسأله عن شعور الآخر ممكن تكون أفلام الكارتون أو القصص المصورة طريقة كويسة إننا نناقش معاه ونشوف تعبيرات الوش المختلفة إللي بتعبر عن مشاعر مختلفة.
• أكون مثال ونموذج بإني أشارك ابني مشاعري وأعبر عنها وازاي باتعامل معاه ازاي، باكون عامل ازاي وأنا زعلان؟ باكون ازاي وأنا سعيد؟ وهكذا.
• أدرب ابني من خلال الكلام عن المشاعر خلال الأنشطة المختلفة: الأكل، اللعب، ركوب العربية، والمواقف المختلفة إللي بتحصل. كل ما أدرّبه، كل ما بقى قادر على التعبير والتعامل مع المشاعر.
• أساعد ابني إنه يخرج بحلول وأفكار ازاي يتعامل مع مشاعره، واتناقش معاه إذا كانت طرق مناسبة ولا لأ. لما ابني يعبر بطريقة مناسبة عن مشاعره، أشجّعه وأعزز ثقته بالثناء عشان يكرر التصرف، ويعرف إنه مقبول إنه يتكلم عن مشاعره.
  أشجع ابني إنه يحترم مشاعر واحتياجات الآخرين.

كل الخطوات إللي فاتت هتساعده خطوة بخطوة يفهم نفسه ويفهم مشاعره. وده هيأثر بشكل إيجابي جدًا في تصرفاته وثقته في نفسه.