هو احنا بنصوم ليه؟ سؤال مفيش أب وأم ما اتسألهوش من ولادهم الصغيرين. لما أنس ابني سالني “هو احنا ليه ربنا قالنا نصوم؟” أول رد افتكرته هو الرد التقليدي بتاع “عشان نحس بالفقرا” واللي هو في الحقيقة رد مش منطقي واستحالة يدخل عقل العيال الصغيرة نهائي في الزمن ده! يعني أبسط رد كان ممكن ابني يرده عليا: ما هو عادي أنا باحس بيهم طول السنة وباديهم هدية لعب ومن مصروفي كمان اشمعنى لازم ما ناكلش؟ هو الفقرا يعني مش هيصوموا معانا؟ فالأسهل والأوقع إننا نرد ردود حقيقية وسهلة وتدخل مخ الولاد فعلًا من غير ما نحور عليهم. في المقال ده، هاقول لكم أبسط أربع إجابات نقولها ببساطة للولاد لما يسألونا “احنا بنصوم ليه؟”
اعرفي ازاي أصلًا تعودي الأطفال على الصيام.
إجابات سؤال بنصوم ليه؟
- الصيام ركن من أركان الإسلام وأمر من ربنا وفرض لازم ننفذه ونتمرن عليه واحنا صغيرين
- الصيام من أكتر العبادات اللي ربنا بيحبها وبيحب يشوفنا بنعملها.
- بنصوم عشان نعوّد نفسنا وجسمنا إن مش كل اللي نفسنا فيه نقدر نجيبه في أوقات هيبقي ما ينفعش نعمل اللي احنا عايزينه
- بنصوم عشان ربنا يعلمنا ازاي نسمع كلامه حتى لو مش شايفه وحتى لو محدش في الدنيا شايفني (معني مبسط لتقوي ربنا)
يعني مثلًا كان ممكن ربنا يشيل كل الأكل والمياه من الدنيا لحد ما نفطر، وممكن ناكل ونشرب من غير ما حد يشوفنا. بس ربنا سايب قدامنا كل الحاجات اللي نفسنا فيها واحنا ممكن نكسر صيامنا ومحدش شايف. لكن الصيام يعودنا إننا نبقى أقويا ونسيطر على نفسنا عشان ننفذ أمر ربنا.
أسئلة الأطفال عن ربنا مش بس وقت الصيام. اعرفوا تردوا عليها ازاي
مهم كمان إننا نعرّفهم إنهم مش مكلفين بالصيام دلوقتي وإنهم مش مجبرين في سنهم ده. مجرد تمرين عشان يتعودوا ويفرحوا معانا بالشهر الكريم. ونتوقع إنهم في أول ما يتمرنوا على الصيام. ممكن جدًا ياكلوا أو يشربوا في وقت صيامهم، فبلاش زعيق خالص ولا تخويف إن ربنا هيزعل أو مش هيحبهم أو اللي بيعمل كده بيدخل النار!
ولادنا بيبنوا علاقتهم بربنا وحبهم له من خلالنا في أول حياتهم واللي هتدوم طول العمر. فدورنا إننا نأكد إن علاقتهم الروحانية بربنا ده علاقة حب غير مشروط وسند ليهم وباب مفتوح طول الوقت مهما غلطنا في فرصة دايمًا.
رمضان كريم قوي إن شاء الله 🙂
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك