رمضان 2020 خلاص على الأبواب، ومع كل سنة جديدة ولادنا بيكبروها وكل رمضان يعدي عليهم، بيكبر معاها مسؤوليات جديدة علينا، وأهمها صيام الأطفال في رمضان. بنبدأ نفكّر نعوّدهم على الصيام ازاي؟ طيب نكلّمهم ونشرح لهم إيه؟ ونبدأ امتى؟ ونحببهم فيه ازاي؟ في مقال النهارده، هاجاوبك على كل الأسئلة دي وهنتكلم ازاي نحبب ولادنا في الصيام ونعوّدهم عليه بطريقة بسيطة. أول حاجة مهم نبقى متفقين عليها إن لازم العبادات والقرب من ربنا يبقى مرتبط بذكريات حلوة وحب مش خوف، عشان ما يضطروش في يوم يكذبوا أو يرفضوا إنهم يصوموا ويقربوا لربنا لو وقت تعويدهم دخل فيه أي نوع من أنواع التخويف أو الغصب أو العقاب، فيرتبط معاهم بمشاعر سلبية، صعب نشيل أثرها من نفسهم بعد كده. عشان كده مهم إننا نتأكد إننا بنبني ذكريات ومشاعر حلوة تتحفر جواهم وتتربط بوجود الشهر الكريم، نزين البيت مع بعض ونعمل فوانيس رمضان مع بعض ونملا البيت بجو فرحة ونشرك الولاد في كل حاجة معانا عشان يتعلقوا بالشهر الكريم ويستنوه من السنة للسنة.
إيه السن المناسب لـ تعليم الأطفال الصيام؟
بالنسبة للسن، مفيش غلط أو صح في السن المناسب اللي نبدأ فيه نعلّم ولادنا علي الصيام، نبدأ لما نحس إن الطفل مستعد وقادر جسمانيًا و نفسيًا ومتشجع عليه. وفي نفس الوقت، ما ينفعش نستنى لحد ما الطفل يكون مكلّف بالصيام ووقتها نفاجئه إنه مطلوب منه يصوم لمدة 16 ساعة وهو مش متدرب قبل كده بالتدريج. عشان كده بنبدأ نمرّنه لمدة سنين زي الصلاة.
وبعد سؤالي لطبيب الأطفال، كانت إجابته إن الطفل اللي مش بيعاني من أي مشاكل أو أمراض ممكن يبدأ يتدرب على الصوم من سن سبع أو تمن سنين بالتدريج. ده غير التاكيد على إنه مهم جدًا نهتم بتقديم أكل متوازن مليان فاكهة وخضار وطبعًا شرب المياه والعصير بكمية كبيرة في الوقت اللي الأطفال مش صايمين فيه.
صيام الأطفال لأول مرة
• طيب نبدأ منين ونحبّبهم في الصيام إزاي؟
- الولاد اللي بيتعلموا الصيام لأول مرة الأحسن ليهم يصوموا مع آذان العصر لحد المغرب، ده أحسن بكتير ليهم من الصيام بدري والفطار لوحده على الضهر أو العصر. ده غير إن فيه أولاد كتير بيروحوا المدرسة فالأم بتتخيل إنه كده هيتلهي وهو مع أصحابه. بس بالعكس، هو هيعطش جدًا بسبب اللعب والحر، مش هيقدر يكمل أو هيكمل ويتعب.
- الأحسن ياكلوا ويشربوا ونصلّي العصر مع بعض جماعة ويبدأوا يصوموا معانا لحد آذان المغرب. وقتها هيحسّوا بفرحة الإفطار وتجمعهم معانا على السفرة اللي بقينا نتحرم منه معظم أوقات السنة. ولما يتعودوا، نزوّد وقت الصيام شوية نخليه من الضهر للمغرب وهكذا.
- فيه فكرة عملتها مع ابني وهي إنه يبدأ يصوم الأول في الوقت اللي محددينه سوا عن الأكل بس ويشرب مياه عادي وقت الصيام. ولما يتعود شوية، نبدأ نقلل المياه لحد ما جسمه يقدر يتقبل إنه يصوم عن الأكل والمياه.
- اتكلمي كتير مع ولادك عن فايدة الصيام على الجسم وعلى تحسين الصحة وإنه من أكتر العبادات اللي ربنا بيحبها مننا وحسناتها قد إيه كبيرة.
- ويا سلام بقى لو أخدناهم في حضننا عشر دقايق قبل الفطار وهمّ عطشانين وجعانين كده وقلنا لهم ده وقت الدعاء ونقعد ندعي كلنا وسمعناهم كمان دعائنا ليهم وشكرنا لربنا على نعمة وجودهم في حياتنا وقد إيه احنا مبسوطين إنهم ولادنا، وكل واحد يطلب ويتمني اللي نفسه فيه من ربنا.
- فيه حاجة شايفاها منتشرة على الفيس بوك فكرة الهدايا والمكافآت عن كل يوم صيام هي حاجة حلوة أكيد، بس هي حلوة على “المدي القصير” لأنه هيتحمس قوي ويفرح بس هترتبط العلاقة الروحانية بربنا بالهدايا الوقتية وده حاجة قيمة جدًا إنها تتربط بالثواب المباشر. والمشكلة إن اللي احنا بنعمله معاهم دلوقتي ده اللي بيتحفر جواهم بعد كده ولو اتحرموا منها في أي وقت لأي سبب، هتولّد عندهم غضب وممكن يقول لك مش صايم أصلًا، غير إن طريقة الهدايا دي بتطلّع إنسان مادي على “المدي البعيد” مش بيقدّم حاجة بدون ما ياخد مقابلها حالًا.
• طب نشجعهم ازاي؟
الأحلي والأفيد إننا نشتغل معاهم على الجانب النفسي والمعنوي ونعرّفهم قد إيه اللي بيعملوه ده عظيم ونشجعهم ونهيص لهم طول الوقت ونحسسهم بالإنجاز ويبقى نهار رمضان في بيتنا وقت هادي ومريح وممتع لهم عشان يتحفر في قلبهم وعقلهم حلاوة الشهر الكريم. مش شرط بهدايا مادية إلا كل فين وفين وتبقى مفاجأة مش مستنينها كتقدير منكم على مجهودهم من غير ما الموضوع يكون “كمل صيامك عشان أجيب لك هدية”.
افرحوا وفرّحوا الولاد برمضان وانتهزوه فرصة عشان تقربوا منهم وتقضوا معاهم وقت أطول وتكبّروهم وهم بيحبوا الصيام وبيستنوا رمضان من السنة للسنة.
كل سنة وأنتم طيبين
التعليق باستخدام حساب فيس بوك