كل حركة وهمسة بيعملها البيبي في السنة الأولي من عمره بتعتبر بالنسبة للأم إنجاز يستحق الإحتفال والتهليل والتبكير، وكمان كل حركة أو مهارة يتأخر فيها بالنسبة للأم هي مصدر كبير للتوتر ولازم نشوفلها حل. الحبو والزحف للطفل الرضيع هو مهارة من مهارات الحركة اللي كتير من الأمهات بتقلق لو الطفل إتأخر فيها وتبدأ تسمع تعليقات من القرب والغرب “هو ليه مش بيزحف لحد دلوقتي” ده إبن فلانة بدأ يجري وهو نازل من بطن امه!. الحبو او الزحف ممكن يبدأ من أول 3 شهور وممكن كمان الطفل يمشي علطول ومايلجأش للمهارة ده، فإنتي مرجعك الوحيد اللي محتاجاه في الفترة ده هو طبيب الأطفال وقراية كتب موثوقة عن التربية، وطبعا بفكرك لسلامتك النفسية ولسلامة طفلك إوعي تسمعي او تقارني طفلك بحد، لأن كل طفل فريد من نوعه ومختلف في كل حاجة. لكن مش هنسيبك كدة وهقولك في المقال ده طرق تعليم الحبو والزحف للطفل الرضيع.
طرق تعلم الحبو والزحف للطفل
-
زحف الطفل على بطنه:
من طرق تعليم الحبو والزحف للطفل إنك خصصي وقت كل يوم تحطي الطفل علي بطنه وهو بيلعب وتحطي قصاده لعبة بعيدة شوية عشان يحاول يتحرك ويجيبها، لأن ده بيساعد علي تقوية عضلات الطفل وبيشجعه كمان علي الحركة اللي تساعده يوصل للعبة، وطبعا في الوقت ده مهم تكوني جنبه ومتطمنه علي أمانه.
-
زودي وقت لعب على الأرض:
قللي الوقت اللي البيبي بيقعد فيه علي كرسيه أو مرسي الأكل، وزودي الوقت اللي بيلعب فيه لعب حر علي الأرض وقصاده مساحة واسعة من غير معوقات.
-
اعلم طفلي الحبو .. بإني اجرب معاه:
بما إن التقليد والمحاكاة هي الأساس أصلا في تعلم ولادنا الأشياء كلها، ففكرة إني أنزل جنب البيبي علي الأرض وأخليه يشوفني وأنا بستخدم إيدي ورجلي في الحركة ده هيشجعه يقلدني ويحاول أكتر.
-
اللعب مع المراية:
من أحد أكثر التمارين الي بجد مفيدة جدا، وده لأانهم يا حبايبي بيبقوا منبهرين بصورة انعكاسهم قدام المراية، ف فضولهم هيحمسهم إنهم يتحركوا ويزحفوا عشان يوصلوا للمراية ويلمسوا صورتهم اللي قصادهم.
وإنتي كمان قولي لنا ولادك عدوا بمرحلة الزحف ده واللا دخلوا علي المشي علطول؟
التعليق باستخدام حساب فيس بوك