2020 لحد دلوقتي كانت سنة حافلة بكل مسببات الاكتئاب والتوتر. من أول ما عرفنا إن فيه فيروس كورونا اللي ممكن يصيب أي حد ومالهوش علاج وأعداد الإصابات والوفيات فيه بتزيد آلاف حول العالم كل يوم، واللي عشان نتقي شره، فضلنا محبوسين في البيت احنا وولادنا لحد ما تعبنا، لحاجات كتير مجرد التفكير فيها بيوتر. ولأن راحة البال مهمة جدًا لراحة بالي، عملنا حملة توعية بالصحة النفسية اسمها Ra7amental، وهي سلسلة من الفيديوهات من مختصين ومن أمهات زينا مروا بتجارب وبيحكوا لنا عنها.
بين يوم وليلة، كل أم لقت نفسها مع مسؤولياتها المعتادة من بيتها وأولادها وشغلها، مطلوب منها كمان تدرس للأولاد، وتتابع كل مادة، يعني بقت زوجة وأم وشيف ومدرسة وامرأة عاملة (أيًا كان شغلها اللي قبل الظرف الطارئ)، كتير قوي على أي إنسان يتحمله. وعشان كده، جات حملة راحة بالي للصحة النفسية طوق نجاة لكل أم. هدف الحملة زي ما قلت هو الوصول لراحة البال وسط كل الأخبار المزعجة وأحداث الحياة اللي مش راحمانا.
أول فيديو حابين نشاركه معاكي من الحملة هو فيديو ا. نهى النحاس مؤسسة مركز Heal للصحة النفسية، اللي بتوجه فيه رسالة إيجابية لكل حامل في ظل الظروف اللي بنمر بيها.
وفي الفيديو الجاي، ا. نهى بتكلمنا عن التعامل مع فك الحظر وإنهاء العزل المنزلي.
راحة بالي مش بس كلمت مختصين واهتمت تشاركك كلامهم المهم، كمان حبت تشارك معاكي تجارب لأمهات تانية كلهم ولدوا في ظل وجود فيروس كورونا عشان تديكي أمل وتحسسك إنك مش لوحدك، وإن حتى مع وجود الفيروس، سلامتك انتي وجنينك ممكنة جدًا. وبنشكر كل الأمهات الجميلة اللي حبت تدي أمل وإلهام لغيرها.
ودلوقتي هنشارك معاكم تجربة آلاء حداد ورحلتها مع اكتئاب ما بعد الولادة، وازاي بدأ وكان إيه رد فعل الناس، والغلطات اللي عملتها، وطرق العلاج، وازاي اتغلبت عليه. بنشكر آلاء على شجاعتها في حكي حكايتها مع الاكتئاب وازاي اتخلصت منه، عشان تساعد كل أم بتمر بالتجربة القاسية دي.
للمزيد من الفيديوهات، تابعوا صفحة راحة بالي على فيسبوك.
1 comment
Thank you Rahet bally