محتويات المقال
تفسير الأحلام مش كله بيكون صح، على الرغم من إن عمر الأحلام هو بعمر الإنسانية فيحنما وجد الإنسان وجد معه الحلم. هل الأحلام إللي بنحلمها ليها معاني عميقة.. ناس كتاير قوي فاكرين إنه لو حلموا حلم يبقى ده هينعكس في الواقع 100 في المية بس الكلام ده مش حقيقي.
علماء النفس المشهورين زي فرويد وفروم وكارل يونج اتكلموا عن أهمية الأحلام وكل واحد كان ليه نظرية مختلفة شوية عن التاني لكن كلهم اجتمعوا إنه الأحلام مهمة وليها دلالة لا يمكن الإستهانة بيها. العالم النفسي سيجموند فرويد بيوصف الأحلام بإنها “الطريق الملكي” للاوعي أو العقل الباطن وده ممكن يخلينا نفهم حاجات كتير عن الإنسان.
عملوا استطلاع رأي في مجلة نيوزوييك لقوا إنه 43% من الأمريكان شايفيين إنه الأحلام بتعكس رغبات وأمنيات ومخاوف العقل الباطن.
تفسير الأحلام.. بين الواعي والعقل الباطن
تفسير الأحلام ومحاولة البحث وراها بقى شغف لناس كتير وناس كتير مهتمة بيها.. علشان كدة هنقول لكم على أشهر 9 أحلام ناس كتير بتحلمها وتحليلها النفسي في الكتب.
بحلم اني بقع من مكان عالي – حلم السقوط
حلم السقوط من مكان عالي حلم شائع جدا، وفيه إشاعة كبيرة قوي Myth إنك لو خبطتي في الأرض هتموتي بس ده أي كلام ومش حقيقي.
حسب ما بيقول خبراء الأحلام ووفقا لدراسة واحدة اتعلمت، لما بتحلمي إنك بتقعي من مكان عالي فده معناها إنه عندك مشكلة كبيرة في حياتك بتفكري فيها وممكن يكون معناها إنك محتارة في إتخاذ قرار.
وفقا لراسل جرانت مؤلف كتاب The Illustrated Dream Dictionary حلم السقوط بيرمز للخوف ومعناها إنك محتاجة تطمني نفسك أكتر.
بحلم إني “عارية” في مكان عام -حلم التعرّي
بيني بيرس، مؤلفة كتاب Dream Dictionary for Dummies بتقول إنه لما بتحلمي إنك عارية في مكان عام او جسمك مكشوف فده معنا ها إنك خايفة تكوني مزيفة أو حاسة إنك مزيفة Fake ومعناها إنه فيه حاجات كتير في شخصيتك خايفة الناس تشوفها.
بحلم إنه حد بيطاردني / بيجري ورايا – حلم المطاردة
من أكتر الأحلام المخيفة لما بنحلم إنه فيه حد بيجري ورانا وبيطاردنا خصوصا لو عايز يؤذينا. معظم خبراء الأحلام بيقولوا إنه الحلم ده معناه إنك بتحاولي تتجنبي حاجة في حياتك مخوفاكي وتقيلة قوي عليكي.
توني كرسب مؤلف كتاب Dream Dictionary بيتوقع إنه الحلم ده معناه إنك بتهربي من مواجهة مخاوفك أو رغباتك.. وبيقول كمان إنه لو وش الشخص إللي بيطاردك في الحلم مش ظاهر فده ممكن يكون علامة على وجود صدمة في الطفولة ولو كان الشخص ده راجل يبقى ممكن تكوني خايفة تسلمي قلبك للحب.
.
بحلم إني سنتي بتقع- حلم سقوط السنّة
بيني بيرس، مؤلفة كتاب Dream Dictionary for Dummies بتقول إنه الحلم ده ليه كذا تفسير: ممكن يكون معناه إنك قلقانة لحسن يكون شكلك مش جذاب وممكن يكون معناه إنك مكسوفة من حاجة قوليتها أو عملتيها وخايفة من التواصل. وبتضيف: ” لو سنتك وقعت في الحلم ممكن يكون معناها إنك بدأتي تخافي تفقدي قوتك الشخصية”.
بحلم إني بموت – حلم الموت
حلم الموت من الأحلام الشائعة إللي ناس كتير بتحلم بيها. ساعات الشخص بيحلم إنه هو بيموت وساعات بيحلم إنه حد تاني هو إللي بيموت وفي الحالتين معظم التفسيرات بتشير إلى القلق أو الخوف من المجهول.
بحلم إني بمتحن – حلم الإمتحان
على حسب كلام Craig Hamilton-Parker مؤلف كتاب The Hidden Meaning Of Dreams لو حلمتي إنك بتمتحني فده معناها إنك خايفة من الفشل وخايفة تواجهي مشاكل حياتك.
بحلم إنه جوزي بيخوني – حلم الخيانة
حلم مزعج جدًا طبعًا ومش ضروري خالص يكون بيعكس الحقيقة لكنه بالتأكيد بيعكس المخاوف إللي جواكي.
Eve Adamson و Gayle Williamson مؤلفا كتاب The Complete Idiot’s Guide Dream Dictionary شايفيين إنه الحلم ده بيعكس مشاكل في الثقة مع الشريك وبيعكس إحساس على بعدم الأمان.
وساعات الحلم ده بيبقى واحد من أحلام “ماذا لو” وإللي فيه بنختبر معاييرنا في الواقع..
بحلم إني بطير- حلم الطيران
حلم الطيران ده حلم ناس كتير بتحلمه وبتقوم من النوم سعيدة ومتحمسة وساعات بيبقى مخيف شوية لبعض الناس بالذات الناس إللي بتخاف من المرتفعات.. توني كرسب مؤلف كتاب “قاموس الأحلام” بيقول إنه الحلم ده ليه معنيين في تفسير الأحلام. المعنى الأول، بيمثل الإحساس بالحرية والاستقلالية، والمعنى التاني بيشير للرغبة في الهروب من الواقع. وساعات كمان الحلم ده بيشير للحرية الجنسية والاستقلالية في الجنس وكسر المألوف.
بحلم إني حامل – حلم الحمل
أحلام الحمل بتلخبط قوي لإنها ممكت تكون علامة على الإبداع والخروج برة الصندوق أو علامة على الخوف.. ديفيد لوف مؤلف كتاب “قاموس الأحلام” شايف إنه حلم الحمل ساعات بيكون معناه إنه الست خايفة تبقى أم غير صالحة. وساعات بيكون معناها إنه الشخص بيحاول يوطد علاقته بشريكه.. مفسر الأحلام راسل جرانت شايف إنه الحلم ده معناه إنه الست بتمر بوقت عصيب.
وفي النهاية قوليلنا هل حلمتي حلم من دول؟ وهل التفسير بتاعه منطقي بالنسبالك؟
المصدر
verywillmind
التعليق باستخدام حساب فيس بوك