كل أم طفلها في نظرها أجمل طفل، وحقيقي كل الأطفال فعلًا حلوين، بس من الحاجات اللي أمهات كتير بتدور عليها هي ازاي تعمل على نمو و تكثيف شعر الأطفال الرضع وخصوصاً لو طفلها عمره أقل من سنة سواءً بنت أو ولد شعره خفيف وباين إن فيه فراغات في فروة الرأس.
عمومًا ما تقلقيش، الشعر حتى لو كان شعر طفل رضيع، بيحتاج رعاية وتغذية زينا بالظبط لما بنهتم بشعرنا شواء بالزيوت والشامبوهات وماسكات الشعر والتغذية السليمة كمان، وهو ده اللي هتعمليه مع طفلك علشان تقدري تتقلي أو تكثفي من شعره، هنقول لك على شوية نصائح أو روتين يومي وهنقول لك على شوية وصفات طبيعية تقدري تستخدميها من بعد الشهر التاني من عمر الطفل، فتعالي نشوف إيه هي:
طرق لنمو وتكثيف شعر الأطفال الرضع
- سرحي أو مشطي شعره دايمًا:
من الأدوات اللي لازم تجيبيها لطفلك لما تعرفي إنك حامل، وبتجهزي له حاجاته، إنك تشتري فرشاة ناعمة مخصصة للأطفال، المنتج متوفر جدًا في الأسواق وكلها بتتفق على إنها شعرها ناعم ومناسبة جدًا لاستخدامها على فروة راس الطفل، المميز في استخدامها إنها بتساعد على تنشيط الدورة الدموية اللي بدورها بتساعد على تحفيز وتغذية بوصيلات الشعر وبالتالي نمو وكثافة الشعر.
لو ولادك شعرهم كيرلي، اعرفي هنا روتين الشعر الكيرلي الأفضل للأطفال
- استخدمي شامبو أطفال:
من المهم جدًا إنك تسخدمي في غسيل شعر طفلك شامبو مخصص للأطفال، وتكوني متأكدة إنه خالي من السلفات وفي نفس الوقت مكوناته كلها طبيعية، وما تخافيش من جزئية الاستحمام المتكرر لطفلك، بعد الشهر التاني من عمر الرضيع بيُنصح إنه يستحمى من مرتين لتلات مرات في الأسبوع، الاستحمام المتكرر ده بيتضمن غسيل الشهر اللي في حد ذاته بيشيل الأتربة والبكتيريا اللي ممكن يكون لها سبب في ضعف نمو الشعر أو زيادة تساقطه.
- استخدمي البلسم:
من الحاجات اللي كتير الأمهات بتهملها إنها تشتري شامبو من غير بلسم وده هنعتبره خطأ شائع لأن علشان الفايدة تكون كاملة إنك تجيبي الإتنين مع بعض، هتلاحظي فرق كبير في النتيجة، لأن الحلو في النتيجة إنه بيرطب الشعر وبيمنع جفافه واللي في حد ذاته من عوامل تكثيف الشعر وتحفيز نموه.
- استخدمي فوطة ناعمة:
من الحاجات اللي مهمة لصحة الشعر، مش للأطفال بس لينا احنا كمان، هو استخدام الفوطة الصح لتنشيف الشعر، في الغالب كلنا بنستخدم الفوط الاعتيادية بتاعت الوجه لتنشيف الشعر، وده بيأثر على نمو الشعر، خصوصًا إن أكبر ضرر منها هو تقصيف الشعر. علشان كده، نصيحة ليكي ولطفلك: لازم تجيبي فوط ناعمة قطنية مخصصة لتجفيف الشعر بس، حقيقي هتفرق كتير معاكي ومع طفلك.
- دلكي فروة رأسك طفلك الرضيع:
دي برضه نصيحة ليكي ولطفلك ومن أفضل طرق طرق تكثيف شعر الأطفال الرضع، إنك تدليكي فروة الرأس، والفايدة هتكون أفضل إنك تعملي كدة بزيت مغذي زي مثلًا زيت السمسم أو جوز الهند الأورجانيك، النتيجة هتكون مبهرة في نمو شعر الرضيع، علشان تنشيط الدورة الدموية بيفرق بطريقة غير عادية في نمو الشعر، علشان كده، دلكي فروة راسك وراس طفلك.
- ما تربطيش شعر طفلك الرضيع جامد:
صحيح كلنا من أحلامنا إن شعر بناتنا يفضل ملموم ومتسرح، وده بيخلينا نجيب أنواع من التوك وربطات الشعر علشان نخضع شعر ولادنا، وأحيانًا بنعمل كده مع شعرنا احنا نفسنا، بس ده خطأ بشع بيتصنف كجريمة في الشعر. علشان كده، مهم ما تربطيش الشعر جامد علشان ما يتقطعش.
- قصي أطراف شعر الأطفال الرضع:
كل شهرين قصي اطراف شعر طفلك، الخطوة دي بتفرق قوي في زيادة طول الشعر وكثافته، قص أطراف الشعر مفيد جدًا في تجنب التقصف وضعف نمو الشعر.
كل اللي فات اعتبريه روتين لازم تلتزمي بيه في التعامل مع شعر طفلك، وكل ما تلتزمي بيه، هتلاقي النتيجة إيجابية جدًا، وخلال شهور بسيطة هتلاقي بجد نتيجة غير عادية وهتبسطك، بس الموضوع محتاج مساعدة في حاجتين الماسكات والتغذية فتعالي نشوف الماسكات إيه الأول.
ماسكات طبيعية لشعر الأطفال
ماسكات شعر الأطفال قائمة على حاجتين، الزيوت والفواكه هاقول لك ازاي:
- زيت جوز الهند: بيعمل على تغذية فروة الرأس، وبيساعد على إزالة البكتيريا من على الشعر، وبيعزز نمو الشعر.
- زيت اللوز: تقدري تستخدميه لفرد الشعر وتنعيمه.
- زيت الأرجان: أكتر حاجة بتساعد على رطوبة الشعر وقوته ده بجانب نعومته طبعًا.
- زيت الأفوكادو: بيساعد على نمو الشعر بشكل سريع جدًا وبينعمه قوي.
- زيت الجوجوبا: بيساعد على تعزيز نمو الشعر وترطيبه، وبيعالج مشكلة القشرة في فروة الرأس بشكل فعال لأنه مقاوم للبكتيريا.
- زيت الخروع: من أكتر الزيوت اللي بتساعد على تعزيز نمو الشعر وترطيبه وتقويته ومنع تساقطه.
- زيت الزيتون: يستخدم لتغذية الشعر ومعالجة تقصُّفه، وزيادة نعومته واستعادة لمعانه، وحيويته.
- الموز: من الماسكات اللي حقيقي مغذية جدًا هو ماسك الموز. لو هرستي موزة مع أي زيت من الزيوت اللي فوق وسبتيه على الشعر لحد ما بينشف وغسلتيه هتلاحظى اللمعان والترطيب من أول مرة.
- صبار الألوفيرا: من الحاجات اللي معروفة في صحة الشعر هو الألوفيرا، بس استخدميه لطفلك بعد السنة الأولى من عمره حطيه على الشهر بشكل مناسب واغسليه بعد نص ساعة، وممكن تضيفيه على الشامبو نفسه وهيفرق جدًا في نموه ولمعانه.
التغذية وتأثيرها على نمو شعر الأطفال الرضع
التغذية اللي بتوصل للرضع بتتقسم على مرحلتين:
- مرحلة ما قبل عمر الست شهور.
- مرحلة ما بعد الست شهور.
الفرق ما بين المرحلتين هو نوع التغذية اللي داخلة للطفل، قبل سن الست شهور الطفل بيعتمد بشكل أساسي على الرضاعة، لو طفلك بيرضع طبيعي يبقى إنتي مسؤولة عن وصول التغذية ليه من خلال تغذيتك إنتي، علشان كده، اعتمدي على وجود عناصر زي الزنك والحديد وفيتامين C.
في المرحلة اللي بعد سن ست شهور، هتبتدي تدخلي الأكل الصلب في تغذية الطفل بشكل تدريجي. علشان كده، اختاري أغذية فيها العناصر دي زي مثلًا القرع و الجزر والمانجا والبقوليات واللحوم والبيض والحبوب الكاملة والبطاطس والسبانخ.
بس مهم جدًا لما تيجي تدخلي أي أكل جديد على طفلك لازم تجربيها لمدة يومين، وتتاكدي إن طفلك ما عندهوش أي علامة من علامات التحسس اللي ممكن تظهر عليه من الأكل ده، زي مثلًا احمرار البشرة، أو ظهور التهابات على بشرته في منطقة الحفاضات.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك