المطبخ تقريبًا من أكتر الأماكن اللي بنقضي فيها وقت، سواءً في الطبخ أو حتى في الفطار والغدا والعشا، وعشان بنقضي فيه وقت كبير وولادنا كمان بياكلوا أو يستخدموا أدواته، لازم تهتمي جدًا بتعقيم وتنظيف أدوات المطبخ وخاصة بعد تنظيف الفراخ وتقطيع اللحوم عشان تتفادي الأمراض المعدية اللي بتتنقل من اللحوم النية زي السالمونيلا. وفي المقال ده، هنقول لك على طرق سهلة عشان تعقمي بيها أدوات المطبخ.
هنا ممكن تشوفي بالتفصيل طريقة تنظيف التلاجة
طرق تنظيف أدوات المطبخ بعد غسل الدجاج واللحوم
- التخلص من الفضلات: أول خطوة هي التخلص من الفضلات بعد التنظيف ومن أفضل الطرق هي إنك تجيبي كيس فاضي وتحطي فيه الفضلات دي وتربطيها كويس وترميها في الباسكت عشان الباسكت ميتلوثش وريحته متبقاش كريهة، واحرصي إنك تغسلي الغطا الخارجي اللي بتلمسيه بالخل.
- غسيل وتنظيف أدوات المطبخ: كل الأدوات اللي استخدمتيها في التقطيع والتنظيف لازم تغسليها منفصلة في الحوض، يعني مينفعش تحطي السكينة اللي قطعتي بيها الفراخ مع أطباق الأولاد اللي بياكلوا فيها في الحوض، خلي الحوض فاضي واغسلي فيه الأدوات دي باستخدام الخل والصابون وبعدين عقمي الأسفنجة كويس بنقعها في ميه مغلية وخل مركز.
- تعقيم الأدوات: كل اللي استخدمتيه في التقطيع والتنظيف حطيه في حلة كبيرة فيها ميه مغلية على النار ومعاهم معلقة كبيرة من صابون المواعين وغطي عليهم وسيبيهم يغلوا ربع ساعة وبعدين طلعيهم ينشفوا، بس خلي بالك من البخار والميه الساخنة عشان الحروق لا قدر الله.
- تعقيم الأسطح: الأماكن اللي كنتي حاطة عليهم أطباق التقطيع برضو هتحتاجي تغقميها كويس زي رخام المطبخ وألواح التقطيع، هاتي سبراي رشاش طبيعي اصنعيه بنفسك من الخل والليمون ورشيه وسيبيه شوية وبعدين امسحيه، وممكن تستخدمي للرخامة رشاش مطهر زي كلوروكس وديتول.
اعرفي من هنا أدوات الطهي غير الصحية وتجنبي وجودها داخل مطبخك وكمان روتين تنظيف الحمام خطوة بخطوة هيختصر عليكي الوقت والمجهود
نصايح مهمة عند تنظيف أدوات المطبخ بعد غسل الفراخ واللحوم
- يفضل إنك تستخدمي قفازات بلاستيك قابلة للرمي عند التنظيف أو التقطيع عشان تقدري ترميه بسهولة بعد ما تخلصي عشان متضطريش تغسلي القفاز العادي.
- الخل من أفضل المطهرات الطبيعية اللي ممكن تستخدميه بعد التنظيف أو التقطيع في تطهير الأماكن المختلفة زي أكر دواليب المطبخ وغسيل ألواح التقطيع.
- ممكن تستخدمي غسالة الأطباق في التعقيم بس احرصي على شطف الأدوات اللي استخدمتيها كويس في التقطيع قبل ما تدخليها غسالة الأطباق.
- يفضل إنك تعملي ألواح تقطيع مخصوصة منفصلة، يعني خلي لوح تقطيع الفراخ غير لوح تقطيع الخضروات والفواكه.
- طهري السفنجة اللي غسلتي بيها أدوات التنظيف ويفضل إن السفنجة دي تغيريها بشكل دوري عشان البكتيريا والفيروسات.
What’s your Reaction?
التعليق باستخدام حساب فيس بوك