تنظيف الببرونة أو زجاجة الرضاعة الخاصة بطفلك موضوع في غاية الأهمية وله طرق معينة، بجانب إن فيه فرق بين التنظيف والتعقيم: التنظيف هو إنك تشيلي أي أثر للبن أو بقع من اليد ممكن تكون وصلت للببرونة، لكن التعقيم بيستهدف القضاء على البكتيريا اللي ممكن تكون وصلت لها.
للأسف من شدة توتر الأمهات ورغبتهم في توفير أعلى درجات النظافة والتعقيم بيستخدموا مواد كيميائية في تنظيف الببرونة وبيكون بشكل خاطيء ممكن فعلًا يعرض حياة أطفالهم الرضع للخطر ومن ضمن المواد دي هي الكلور.
صحيح الكلور معروف عنه قدرته العالية جدًا في التنظيف والتطهير على مختلف الأسطح، بس حتى ده له قواعد، ما ينفعش نستخدم نفس المنتج بنفس الطريقة على كافة الأسطح، كل حاجة ليها طريقتها الصحيحة، بس النهارده مجال كلامنا على استخدام الكلور مع الببرونة أو زجاجة رضاعة الطفل.
أولًا الكلور لا يستخدم في التنظيف لكن بيستخدم في التعقيم، من المهم أن يكون تنظيف الببرونة بشكل كويس جدًا وفك الحلمة البلاستيكية وتنضيفها منفردة علشان تتأكدي إن مافيش أي لبن تسرب تحتيها ممكن يفسد ويشكل خطر في الاستخدام اللي جاي.
يبقى ييجي هنا السؤال:
ازاي أستخدم الكلور صح في تنظيف الببرونة؟
الطريقة سهلة جدًا وبسيطة، كل اللي هتحتاجي له هو 2 لتر مياه سبق غليها مع إضافة معلقة طعام واحدة فقط من الكلور، هتقومي بغسيل الببرونة بالشكل الاعتيادي وتغطسيها في المحلول ده لمدة دقيقتين فقط لا غير، وعلشان تطمني أكتر بعد ما تخرجيها من المحلول ده اشطفيها بمياه دافية، الكلور مادة طيّارة ومش ممكن تلتصق بسطح الببرونة وخصوصًا وهي مخففة بالشكل ده، وبعد كده سيبيها تنشف بالشكل الاعتيادي.
ولادنا مش بس حبايبنا إنما كمان أمانة عندنا، ودورنا الحقيقي هو بذل كل المجهود والبحث عن المعلومة الصحيحة والعلمية اللي بتصب في مصلحة صحتهم وتطورهم الصحي.
وآخر كلمة ليكي، ما تخليش خوفك من الفيروسات والبكتيريا مبرر للاستخدام المبالغ فيه للمطهرات والكيماويات اللي بدورها بيكون لها أثر شديد الخطورة على حياتك انتي وكل أفراد أسرتك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك