بصي خلينا نعترف بينا وبين نفسنا إن فيه أجزاء من المطبخ لو متضبطة إحنا بنحس بإنتصار خفي مجهول السبب، من ضمنهم التلاجة، بجد مين فينا مش بتتكسف أوقات يعني إن حد يفتح يشوف تلاجتها؟ تحسي إن لما حد يفتحها كانه فتح دولابك، حقيقي تنظيف التلاجة وترتيبها التلاجة ليه جانب إقتصادي مهم، هو إنك هتعرفي إيه اللي موجود فيها والأهم شيفاه وده هيقلل جدا الهدر اللي بيحصل لما تكتشفي إن في جانب مظلم منها تحت أنقاض الاكياس والعلب فيه اتنين كيلو طماطم تعفنوا للأسف وإنتي نسيتي وجودهم أصلا وروحتي اشتريتي 4 كيلو غيرهم أصلا وهما موجودين جوة ونسياهم أو مش شايفاهم.
التلاجة المترتبة بتحافظ أصلا على التلاجة النفسها وبتزود من عمرها الإفتراضي، لأن طول ما هي مترتبة فقدرتها على التبريد وتوزيع البرودة بيكون أعلى ده طبعا غير إنك بتقللي من المجهود اللي التلاجة نفسها بتبذله علشان تبرد كل العناصر اللي فيها.
ترتيب التلاجة بيطول عمر العناصر اللي فيها، وده لسبب بسيط، طول ما التلاجة مترتبة ومتنضفة فهي كبيئة مقفولة مش هينموا فيها أي بكتريا أو فطر بيسبب لفساد الخضار واللحوم فيها بشكل أفضل.
إيه رأيك تشوفي 12 حيلة مطبخية مهمة لكل ست بيت
وقبل ما نقولك على الدليل السريع لتنظيف التلاجة فيه كان نقطة مهمة لازم تعرفيها
شوفي هنا بالفيديو: طريقة تنظيف الثلاجة في 10 دقائق
نصائح هامة للحفاظ على الثلاجة
- لازم تقري كويس كتالوج تلاجتك، التلاجات بتختلف من نوع للتاني، والكتالوج ده مش موجود من باب الواجب، هو دليل تعامل مع الجهاز ده، حتى لو عند مامتك نفس التلاجة دي في بيتكم زمان لازم يكون كتالوج تلاجتك قريب منك.
- جزئية تزين التلاجة، فيه فرق ما بين التلاج اللي الرفوف بتاعتها زجاجية ، واللي الرفوف بتاعتها حديد، كتير مننا بيحب يفرش مفارش في التلاجة من باب الزينة، الخطوة دي تنفع جدا مع التلاجات اللي الأرفف بتاعتها زجاجية لأنها مصممة لتوزيع التبريد كل رف بشكل منفصل عن التاني فبالتالي مفرش التلاجة البلاستيك مش هيكون له تأثير سلبي، على كس التلاجات صاحبة الأرفف الحديد المفرغة، دي تصميم التبريد بتاعها توزيع دائري لو حطيتي مفرش في الرف الأول هتعطلي وصول التبريد للرف التاني وده هيسبب إن التلاجة تبذل مجهود أكبر في التبريد وبالتالي إستهلاك أعلى للطاقة وعمر افتراضي أقصر.
- متحطيش ابدا في التلاجة لا طبق سخن ولا حلة سخنة، ده بيخلي التلاجة تستهلك طاقة اكبر في التبريد، استني دايما الحاجة تبرد وبعد كدة حطيها في التلاجة.
- التلاجة لازم تكون بعيد عن البوتجاز على الأقل بتفصل بينهم وحدة أدراج، التلاجات مش بتأدي أفضل أداء ليها ودرجة حرارتها عالية وكونها لازقة في البوتجاز ده هيأثر على عمرها الإفتراضي وهيأثر فعلا بالسلب.
- هاتي قاعدة للتلاجة، ميزتها إنها بتحفظها من أي تسرب للمياة على الأرض وبالتالي تحفظها من أي صدأ، والتنضيف تحتيها بيكون سهل.
وطبعا مش هننضف التلاجة بس نقدر ندي المطبخ بصة إهتمام في حيل وأفكار لترتيب وتنظيم المطبخ
دليل تنظيف التلاجة
- فيه ناس بتحب تنضف تلاجتها كل أسبوع، وممكن لو قولنا لك كدة هيكون شيء مرهق وسخيف وإنتي مش بتحبيه ولا أنا بصراحة، علشان كدة مرتين في الشهر معدل منطقي.
- هاتي دايما كرسي تقعدي بيه قدام التلاجة وإنتي تنضفي وجنبك باسكت القمامة، أولا هتكوني قاعدة مرتاحة، متحكمة، وبتتخلصي من أي حاجة زيادة أو بايظة بكل سهولة في لحظتها.
- هاتي حاجة بيتك بالأسبوع فيما يخص الخضروات بالذات لأنها سريعة التلف عموما، وخليها في درجها الشفاف.
- خلي دايما عندك بخاخ فيه مياة وخل وبيكربونات، ده خليط سحري لتنضيف التلاجة، فعال جدا في إزالة البقع، بيطهر، ومافيش أي أثر كيميائي ممكن يأثر على الأكل لما تيجي تحطيه تاني.
- حطي على التلاجة بمغناطيس تاريخ الحاجات اللي زي الألبان والخضار خصوصا الورقية والفواكه علشان تعرفي إنها موجودة وتتخلصي منها قبل التلف علشان تجنبي نفسك الروائح الكريهة.
- فاكرة لما قولت لك خلي كتالوج التلاجة قريب منك، وده بسبب إن في الكتالوج هتلاقي مكتوب إذا كان تلاجتك فيها فيلتر، يتفك إزاي، ويتركب إزاي، ومهم أوي يتركب إزاي، علشان عندنا إدمان نفك علشان ننضف وكارثة مش عارفة أركب بعد ما نضفت.
- التلاجة تتنضف دايما بمناديل المطبخ، أسهل وصحية اكثر من لو إستخدمتي فوطة من فوط المطبخ.
- إستخدمي العلب الزجاجية محكمة الغلق لأنها بتقي إن التلاجة ريحتها تقلب.
- حطي مكعب فحم في التلاجة ده هيمتص أي روائح غير محببة حتى لو تلاجتك فيها الميزة دي.
تقدري تقولي دي أهم النصائح بخصوص تنظيف التلاجة السريع، تقدري مرة في الشهر تنضفي التلاجة بشكل عميق إنك تخرجي كل الأرفف في التلاجة والفريزر وتستخدمي منظف مخصص للتلاجة، وهتلاقي منتجات كتير في أي هايبر ماركت مخصص للمهمة دي، ترتيبك للتلاجة وتنظيفها مش بس هدفها الحفاظ عليها، إنما كمان الحفاظ على صحتكم وتقليل المهدور والفاقد ماديا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك