المطبخ الخشب من المطابخ الكلاسيكية اللي لسا في ناس كتير بتحبها، مهما ظهرت ستايلات جديدة من الخامات، بس بيفضل المطبخ الخشب راقي وشيك وله فخامته، بس المهم في تنظيف المطبخ تراعي الحفاظ عليه والعناية بيه، لإنه لازم تتعاملي عليه بطريقة معينة علشان تحافظي عليه، والحفاظ عليه ده بياخد نوعين، التنضيف العام والتنضيف العميق، والنصايح العامة للحفاظ عليه في الاستخدام:
-
تنظيف المطابخ الخشب (تنظيف عام)
الخل هو كلمة السر في تنضيف المطابخ، وميزته إنه رخيص ومتواجد في بيتك على طول.
طريقة استخدامه: اخلطي كمية متساوية من الخل والمياه الدافية في بخاخ، ورشيه على دواليب المطبخ وسيبيه شوية، بعدين امسحيه بفوطة نضيفة، ولو المطبخ متوسخ زيادة، تقدري تحطي كمية بسيطة من منظف الأطباق في خليط الخل والمياه، وتستخدميه بنفس الطريقة.
-
تنظيف المطابخ الخشب ( تنظيف عميق)
بدل ما تخففي الخل بالمياه، اعملي عجينة من الخل والمياه، وحطي فيها فرشاة أسنان وامشي بيها على أماكن الدهون في المطبخ، بس ما تستخدميش ليفة خشنة أو سلك مواعين، علشان ما تخدشيش خشب المطبخ.
-
نصايح عامة للحفاظ على مطبخك الخشب
- مهما استخدمتي مياه في التنضيف، لازن تجففيها كويس بفوطة نضيفة بعدها.
- لو هتستخدمي منظفات جاهزة ومصنعة، لازم تتإكدي إنها مناسبة للخشب.
- جربي أي منتج تنضيف على منطقة صغيرة من المطبخ وما تكونش في واجهة المطبخ، قبل ما تستخدميه على بقية دواليب المطبخ، لحد ما تتإكدي إنه مناسب.
- سواء هتستخدمي الخل والمنتجات الطبيعية في التنضيف، أو المنتجات الجاهزة، ماتسيبيهاش على الخشب مدة طويلة، أقصى حاجة دقايق بس، لو المطبخ شديد الاتساخ، وامسحيها على طول.
- حافظي على المناطق اللي تحت حوض المطبخ وحواليه من المياه، وجففيها أول بأول، ولو في تسريب مياه من الحوض والصرف أو الغسالات، عالجيه بأسرع وقت.
- نضفي الأماكن المعرضة كتير للدهون، زي اللي حوالين البوتاجاز، أول بأول، علشان ما تضطريش تستخدمي منظفات قوية معاها لو اتراكمت.
- لو في واحدة بتساعدك في تنضيف البيت، اشرفي عليها وهي بتنضف المطبخ، علشان تلتزم بطريقة التنضيف المناسبة لمطبخك الخشب.
ودي مقالات تانية عن المطابخ تقدري تستفيدي منها:
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك