اللمة في شهر رمضان الكريم شيء جميل جدًا وعظيم جدًا، لكن العبء بالكامل تقريبًا بيقع عليكي انتي من ترتيب للعزومة ولحد تنضيف وترتيب البيت. العبء ده ممكن يخليكي تكرهي فكرة العزايم في مرحلة معينة. لكن لأن اللمة هي أجمل حاجة في رمضان، فدي خطوات تنظيف المنزل بعد عزومة رمضان وترتيبه عشان ما تحسيش بالإرهاق.
البداية من غرفة نومك
بداية غريبة صح؟ الحقيقة إن دي البداية الكلاسيكية للستات اللي بييجي لها عادة بانيك أتاك من النعكشة والفوضى. لو كنتي نسيتي ترتبي غرفتك، فانصحك تبدأي بيها ترتيب وتنظيف سطحي سريع، وتبدأي تلبسي هدوم مريحة. وفي نفس الوقت، ما تخافيش لو اتبقعت أو جه عليها مياه عشان لما تبدأي التنظيف ما تكونيش متوترة.
لفة سريعة في الحمام
حمامك لفة سريعة في الحمام، نشفيه لو اتبل وبليفة صغيرة بسرعة صبني الحوض، وامسحي أخيرًا بفوطة مع ديتول عشان تتأكدي إن الدنيا تمام.
مكنستك في إيدك
المكنسة هي أول حل سحري هنلجأ له عشان نحس بالإنجاز في تنظيف المنزل بعد عزومة رمضان، لفة سريعة على السجاد وأرضية المطبخ هتلم كل الفتافيت وبواقي الأكل اللي وقعت بالغلط، ومدخل الشقة عشان أي تراب أو حاجة تكون حصلت.
فوطتك هي سلاحك
طبعًا هنلم كل الكوبايات والأطباق والأزايز والمعالق وأي حاجة بره المطبخ، وندخلهم جوه، وبعدين هنجيب بخاخة فيها ملمع أو خلطة كربونات وخل، وليفة فيها صابون وفوطة، وامسحي السفرة وأي سطح عدى عليه الضيوف. الدنيا هتلمع.
على الغسالة
هنلم المفارش والمناديل وأي حاجة اتوسخت بعد الزيارة وعلى غسالة الهدوم دور نقع محترم عشان لو في بقع تطلع.
ليفل الوحش
ندخل بقى على ليفل الوحش.. المطبخ، لو عندك غسالة أطباق المهمة هتكون أسهل، هتحتاجي تشطفي الأطباق من بواقي الأكل وتبدأي ترصي الأطباق والمعالق والكوبايات في الأول. بعد كده، تشطفي الحلل وتجهزيها للدورة اللي بعدها أو نفس الدورة لو في مكان.
لو ما عندكيش غسالة أطباق مفيش مشكلة، هنرتب المهام، نغسل الكوبايات الأول عشان الزفارة، وبعدها نغسل أطباق ونوسع لنفسنا، وآخر مرحلة خالص الحلل والحاجات الكبيرة. هنرمي الزبالة طبعًا عشان ما نحسش بأي ريحة وحشة، ونرش معطر جوه الباسكت ونحط كيس جديد.
المسحة السحرية
بعد ما نخلص تنضيف، هنبدأ نروق المطبخ أي أكياس نشيلها علب التوابل مسحة سريعة وترجع على مكانها، باختصار كل حاجة مش في مكانها هترجع لنفس النقطة، وأخيرًا المسحة الجميلة بالخل والكربونات لكل الأسطح في المطبخ، ونصبّن الحوض بضمير عشان يبات بيبرق.
التعليق باستخدام حساب فيس بوك