من ساعة ما سمعتي عن فيروس كورونا وانتي بتحسي إن نفسك ضيق وحرارتك عالية؟ بتقيسي حرارتك كل شوية؟ بتبلعي فيتامين سي بكميات واشتريتي مخزون من دوا زيثروماكس؟ اتطمني، انتي مش لوحدك. توهم الأعراض بيحصل عند كتير من الناس وبيكون ممتد مع بعض الناس طول عمرهم. وتوهم الأعراض هو جزء من اضطراب نفسي اسمه “توتر المرض، توهم مرضي، أو توتر صحي”.
أعراض توتر المرض وتوهم الأعراض
الأعراض بتشمل الانشغال الدائم بفكرة المرض، بفكرة إني عندي مرض خطير، بناء على إحساس في الجسم ممكن يكون طبيعي أو عرض بسيط جدًا من مرض زي مثلًا حكة بسيطة في الجلد أو حركة أمعاء صوتها عالي.
- انشغال بال دائم على الصحة وإن فيه مرض خطير هيواجهك
- قلق إن أبسط حاجة ممكن تحسي بيها في جسمك هي مرض خطير
- عدم الإحساس بالاطمئنان حتى لو طمنك الدكتور نفسه أو عملتي تحاليل وكانت سلبية
- القلق الزايد عن حالة صحية معينة هتجي لك لأنها منتشرة في العيلة أو في البلد اللي انتي فيها
- فحص جسمك كل شوية يمكن ظهر عليكي أعراض أي مرض
- تجنب ناس أو أماكن أو أنشطة معينة عشان احتمال تصيبك بمرض أو تنقل لك عدوى
- كلامك طول الوقت حوالين فكرة المرض عمومًا أو عن مرض بالتحديد
- بتسألي جوجل كل كام يوم عن مشكلة صحية جديدة
اتعرفي على فوايد التأمل من هنا
العلاج
غالبًا العلاج هيكون نفسي لإن القلق أو التوتر (anxiety) كمرض نفسي بيعمل أحيانًا أعراض جسدية زي الصداع والدوخة وبعض الاضطراب في الأمعاء. وعليه، فلازم العلاج يكون نفسي سلوكي. غالبًا هيلجأ المعالج النفسي لأسلوب العلاج السلوكي المعرفي، لأنه بيساعدك تتعلمي مهارات تسيطري بيها على التوتر. ممكن يساعدك في:
- التعرف على مخاوفك والأفكار/الاعتقاد اللي وراها.
- تعلم طرق بديلة لإحساسك بجسمك وبالحاجات اللي بتحصل فيه بدل إنك كل مرة تفكري إنك مريضة وده عرض.
- الوعي بسيطرة القلق أو تأثيره عليكي وعلى سلوكك
- تعلم مهارات إدارة القلق
- تقليل تجنبك للناس والمواقف والأنشطة اللي ممكن تسبب لك مرض
- تقليل سلوكيات الفحص الذاتي الكتير قوي اللي بتعمليه عشان تفتشي عن الأمراض في جسمك
- تحسين انتاجيتك في الشغل والبيت والعلاقات والمواقف الاجتماعية
نتمنى لك حياة خالية من القلق والتوتر والكورونا.
التعليق باستخدام حساب فيس بوك