جاءنا البيان التالي..علشان لو فاتك ترند الإسبوع ده

الإسبوع ده حافل بالأخبار والترندات، بس الحمدلله كلها -لحد دلوقتي- في السليم، يعني مفيش حاجة مأساوية ولا مقلقة، وزي ما “راحة بالي” عودتكم كل إسبوع تجمع لكم أهم الأحداث اللي حصلت علشان تكونوا متابعين أول بأول، النهاردة هنقولك ملخص أخبار الإسبوع ده:

نمبر وان

محمد رمضان – ترند الأسبوع – راحة بالي

لا مش الخبر الأول، الخبر عن محمد رمضان صاحب أغنية نمبر وان، واللي اتصور مع مغني اسرائيلي في دبي، وده أثار حفيظة أغلب متابعينه، واللي ما بيتابعهوش بردو، وتغريداته كانت مستفزه للناس أكتر من الحدث نفسه، وأصدرت نقابة المهن التمثيلية قرار بوقفه عن التمثيل، وده خلاه يرد ببوست طويل على قرار النقابة، وردود فعل الناس كانت متباينة ما بين مستفزة وشمتانة، وما بين تعاطف وأعذار، وكانت القصة دي ترند لأكتر من يوم في العالم العربي كله.

لا ده إنت تيجي تمسك الشيشة بقى.

هاني شاكر وأحمد سعد  .. يا بخته

فيديو هاني شاكر وأحمد سعد – ترند الأسبوع – راحة بالي

دويتو مفاجئ ما بين هاني شاكر وأحمد سعد، أهم ما فيه صور الفيديو وصور وفيديوهات الكواليس، اللي كان فيهم درجة سعادة مفرطة من الاتنين، لحد دلوقتي خبراء السوشال ميديا مش عارفين سببها.

عمرو دياب ودينا الشربيني

عمرو دياب ودينا الشربيني – ترند الأسبوع ده – راحة بالي

بعد ما قمره طلع واتشهر، الناس قلقت فعلا من الأخبار المتسربة عن احتمال انتهاء علاقتهم لأسباب منها المادي ومنها المعنوي..الله أعلم.

وقف الدراسة بسبب المطر

تعطيل الدراسة يوم الخميس بسبب المطر – ترند الأسبوع ده

الخبر ده سمعناه قبل كده في ظروف مش عاوزين نقولها، وبيسبب سرعة في نبضات القلب وربنا يستر يارب، بس احتياطي جهزي مخزون الدقيق والبيكنج باودر، وجددي باقة الانترنت.

وفاة مارادونا

وفاة مارادونا – ترند الأسبوع ده – راحة بالي

مات أسطورة كرة القدم الأرجنتيني، اللي أغلب جيلنا كان بيشوف ماتشاته وأهدافه وهي مبكسلة وكنا بنستمتع حقيقي، ومع إن زمان مكانش فيه لا سوشال ميديا ولا يوتيوب ولا حاجات توصل منها الصور والأخبار بسهولة زي دلوقتي، إلا إن أخبار مارادونا كانت موجودة في كل الجرايد والصفحات الرياضية، وكانت بوستراته بتتباع جنب كل صور الفنانين والمشاهير، وكروت صوره كانت ستيكرز على أغلب حاجات الشباب من دواليب لكراسات لأبواب الأوض، والحقيقة إن شهرته دي مجاتش من فراغ، لأنه كان موهوب جدًا ووصل بمنتخب بلده لبطولات رهيبة.

للتفاصيل عن مارادونا..ارجعي لجوزك.

ودي كانت أهم الترندات اللي حصلت الإسبوع ده، وإن شاء الله الإسبوع الجاي أحلى وأحلى.