محتويات المقال
الحمد لله الإسبوع ده عدى خفيف ولطيف، بس ده ما يمنعش إن حصل فيه أحداث وترندات، هنفكرك بيهم لو ما كنتيش لحقتي تتابعي الأخبار أثناء الإسبوع:
مطر في يوم مشمس:
الأمهات وهما مستنيين المطر
يوم الثلاثاء بالليل صدر قرار بتعطيل الدراسة يوم الأربعاء، بسبب سوء الأحوال الجوية، وطبعًا إحنا كأمهات مثاليات بلغنا أطفالنا بالخبر ده وفهمناهم سبب غيابهم من الحضانة والمدرسة.
نصحى الصبح، أن أن أن آآآآآآآآآآآن، الشمس منورة ما شاء الله، ورقبتنا بقت أد السمسمة قدام ولادنا، وبقينا -ولأول مرة- نستنى الشوارع تغرق، طب رعد، طب أي برق طاه، مفيش.
والأصعب من ده كله إننا افتكرنا ذكريات الحجر الصحي في الموجة الأولى للكورونا، بس الحمد لله اليوم عدى، واحنا عادي عادي عادي أهو.
فيلم مصري سجل إيرادات غير مسبوقة:
صفر إيرادات
طبعًا انتو مستنيين تشوفوا رقم قدامه أصفار كتير وكده، بس الحقيقة إن فيه صفر واحد، بس صفر سادة مش جنب أي رقم تاني، آه والله زمبؤلك كده.
مأساة نيللي كريم:
مأساااااااااااة
أنا مش قادرة أكتب الخبر ده من كتر ما هو مؤثر، كل الدعم يا نيللي والله.
تقدروا تشوفوا تفاصيل المأساة دي من هنا
بريطانيا فتحت باب الهجرة بنظام النقاط:
إيه يعني 70 نقطة
-كام نقطة يعني؟
-70
-طيب بسيطة ده أنا شنطتي جاهزة.
-بص بصة عالمصادر كده وقل لي هتنول شرف الهجرة ولا إيه.
مولود سنة 80:
ألبوم حمزة نمرة
ده كان اسم الألبوم الجديد لـ “حمزة نمرة”، كنا كلنا خايفين بعد ما نسمع الأغنية نضرب نفسنا بالجنازير، بس الحمد لله جت سليمة، لما نشوف باقي أغاني الألبوم مودها إيه.
راحة بالي بتنقل لمقر جديد:
وده مسك الختام، بعد سنين في مقر هادي ورايق، راحة بالي كبرت وأسرتها انضم لها أفراد كتير، فهيروحوا لسحابة أكبر، بس حتى لو المقر اتغير، هتفضل راحة بالي مصدر للدعم والراحة لكل الأمهات والسيدات.
مستنيين التفاصيل؟ استنونا الإسبوع الجاي.
لو فاتكم تريندات الأسابيع اللي فاتت، تقدروا دايمًا تدخلوا على Momsmag وتدوروا بعنوان المقال: جاءنا البيان التالي.
التعليق باستخدام حساب فيس بوك