محتويات المقال
الحقيقة إن البيانات بتيجي وتروح، بس بتفوتنا كتير كأمهات وستات، لإننا مركزين مع وزير التعليم ووزيرة التضامن الاجتماعي بس، غير كده شكليات، وعلشان إحنا مش عاوزين حاجة تفوتك، هنقولك على كل الترندات اللي حصلت الإسبوع ده:
-
كيان محمد صلاح:
زي ما اتعودنا من مو صلاح دايمًا لما بيلاقي نفسه زهقان، بينزل صورة على السوشال ميديا من غير ما يعلق عليها، وده اللي حصل الليلة دي، نزل صورة له مع بنته كيان وهي لابسة فستان، ولا قال هو عيد ميلادها ولا ده لبس البيت بتاعها بس مدندش شوية.
-
برفيوم عمرو دياب:
برفيوم عمرو دياب
من فترة عرفنا إن عمرو دياب هينتج عطر خاص بيه، وناس كتير قال إن الخطوة دي جت متأخرة جدًا بالنسبة لمشوار الهضبة، وطبعًا كان التعليق السائد وقتها إن “أي حاجة تيجي من ريحة الحبايب” بس حرفيًا، وأخيرًا ظهر الإعلان للعطر ده، واللي جه مخيب للآمال بشكل كبير جدًا، لإنه اعتمد ستايل قديم و”مهروس” جدًا في الإعلانات، وحقيقي فكرني أنا شخصيًا بإعلان لصابون “كامي” في التسعينات، ده غير ظهورة بنفس الاستايل في حمام السباحة، محتاجين شوية كريتيفتي زيادة عن كده يا عموره.
-
عودة المدارس الدولية:
عقبال عند كل المدارس والجامعات يارب
-
الجزء التاني من “لؤلؤ”:
قالوا إن بعد النجاح الساحق اللي حققه المسلسل، حيث إنه حقق مليار مشاهدة يا مؤمن، فهيعملوا جزء تاني.
جزء تاني؟ هو قلبي لسا طاب من الأولاني؟
أسباب غريبة بتخلّي الأمهات تتفرج على مسلسل لؤلؤ
-
في ناس:
وأخيرًا حمزة نمرة كده يبقى نزل كل أغاني ألبومه الجديد، وكانت حركة دعائية حلوة منه إنه ينزل أغانيه كل يوم أربعاء على مدار أكتر من شهر، واللي خلى الناس تتابع وتستني وتحفظ الأغاني بشكل مذهل، وجدير بالذكر إن أغنيته “فاضي شوية” تصدرت قائمة الأغاني العربية على اليوتيوب وعلى تطبيقات الأغاني المختلفة.
وكل إسبوع وإنتي طيبة، وبنتمنى الإسبوع الجاي تكون كله أخبار مفرحة إن شاء الله.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك