محتويات المقال
ستات كتير عندها مشاكل وألم في العلاقة الحميمة وبتحاول تتأقلم عليها من غير ما المشكلة تتحل ودا بيحصل غالبا بسبب الإحراج من الكلام على المشكلات دي وفي أوقات تانية الستات أصلا بتبقى متصورة إن الآلام اللي بتعاني منها طبيعية ومفيش علاقة حميمية مفيهاش ألم.
جفاف المهبل أثناء العلاقة الحميمة من أهم أسباب الألم والمشاكل عند ستات كتير والنهاردة هنشرح لك أهم أسباب جفاف المهبل وطرق علاجه:
في تفكير شائع عند الناس إن جفاف المهبل بيحصل بعد التقدم في السن والوصول لسن اليأس وانقطاع الدورة الشهرية لأن هرمون الاستروجين بيقل بس في أسباب تانية لجفاف المهبل:
- الرضاعة الطبيعية.
- تدخين السجاير.
- الاكتئاب.
- الإصابة ببعض المشاكل في الجهاز المناعي.
- الولادة.
- ممارسة التمارين الرياضية بشكل عنيف.
- الخضوع لبعض علاجات السرطان.
- الخضوع لجراحة استئصال المبايض.
- تناول بعض أنواع الأدوية زي مضادات الاكتئاب وأدوية الرشح.
- الحساسية.
- عدم وجود مداعبة قبل العلاقة الحميمة.
- استخدام الدش المهبلي وبعض منتجات ومراهم المهبل.
إمتى تستشيري الدكتور؟
مشكلة جفاف المهبل مش بتحتاج تدخل طبي بشكل عام بس بننصحك إنك تروحي للدكتور المختص في الحالات دي :
- الاحساس بعدم الراحة في منطقة المهبل أكتر من يومين.
- الإحساس المستمر بالألم في العلاقة الحميمة.
- وجود نزيف مهبلي في غير معاد الدورة الشهرية.
إيه الآثار السلبية لجفاف المهبل:
جفاف المهبل أحيانا بيأدي لمضاعفات ممكن بعضها يأثر بشكل سلبي على حياة المرأة وحياتها الزوجية بشكل خاص ومنها :
- الحرقة في المهبل.
- انخفاض الرغبة الجنسية.
- وجود ألم في العلاقة الحميمة.
- نزيف بعد العلاقة الحميمة.
- تقرحات في منطقة المهبل.
- الإصابة بالتهاب المسالك البولية.
- حكة في المهبل.
أسباب جفاف المهبل عند السيدة الحامل:
- المهبل فيه طبقة مخاط رقيقة بتفرزها الأغشية المهبلية والطبقة دي بيتحافظ عليها عن طريق هرمون الاستروجين، اللي بيتولى مسؤولية ترطيب المهبل.
- أثناء فترة الحمل مستويات هرمون الاستروجين مش بتكون متوازنة فدا بيسبب قلة الترطيب اللي بتأدي لجفاف المهبل اللي هو حالة شائعة في فترة الحمل، خاصة في التلت الأول من الحمل اللي مستويات الاستروجين بتنزل بشكل كبير جدا.
- لو بقى عندك جفاف مهبل وحكة في فترة الحمل لازم تبلغي الدكتور عنها عشان يستبعد الأسباب التانية للجفاف ويختار لك العلاج المناسب.
وفي خطوات ممكن تاخديها تساعدك على علاج الجفاف:
- حاولي تتجنبي استخدام الصابون والمستحضرات المعطرة لتنضيف منطقة المهبل، وتجنبي حمامات الفقاعات والدوش والمستحضرات المعطرة.
- البسي ملابس داخلية قطنية فضفاضة وناعمة وقابلة للامتصاص، وابعدي عن الأقمشة الصناعية والملابس الداخلية الضيقة.
- حافظي على نظافة منطقة المهبل عن طريق الغسيل بصابون خفيف، بعدين جففيها كويس بمنشفة خاصة.
- حطي زيت فيتامين إي Vitamin E أو مرطب موصى به من قبل الأطباء في منطقة المهبل عشان تحافظي عليه رطب.
- اشربي ميه كتير طول اليوم، عشان المخاط بيحتوي على 90٪ من الميه فده هيساعد على ابقاء المنطقة دي رطبة.
علاجات أولية للجفاف المهبلي:
- المرطبات المهبلية (استروجلايد وغيرها):
المرطبات المائية ممكن تحافظ على رطوبة المهبل لساعات، اختاري المنتجات اللي مفيش في مكوناتها الجليسرين، وممكن تستعملي المرطب عن طريق وضعه على فتحة المهبل أو على قضيب الزوج قبل العلاقة الحميمة.
- المرطبات المهبلية (لوبرين، ريبلنس، وغيرها):
المنتجات دي بتحاول تكون زي المرطب المهبلي العادي وبتخفف من الجفاف لمدة تصل ل 3أيام باستعمال واحد، فاستخدمي المنتجات دي كوقاية مستمرة من هياج جفاف المهبل.
وطبعا قبل استعمال أي دوا لازم تستشيري الطبيب.
أحيانًا ممكن يكون جفاف المهبل العرضي أثناء العلاقة علامة على عدم استثارتك بدرجة كافية، خصصي وقت تكوني فيه أكثر قربًا في علاقتك الجنسية مع زوجك وأطلقي العنان لجسمك عشان يكون أكثر استثارة ورطوبة.
وتجنبي استخدام المنتجات دي لعلاج جفاف المهبل لأنها ممكن تهيج المهبل:
- الخل أو الزبادي أو أنواع الدش المهبلي.
- غسول اليد.
- الصابون المضاد للبكتيريا أو الصابون العطري.
- حمامات الفقاعات أو زيوت الاستحمام.
- ابعدي كمان عن استخدام المنتجات المعطرة، بما في ذلك ورق الحمام والمنظفات.
بنتمنالك الصحة والعافية وعلاقة زوجية سعيدة.
المصادر:
التعليق باستخدام حساب فيس بوك