محتويات المقال
كتير مننا مش متخيل خطورة وقوة تأثير كلامنا على شخصية ونفسية أطفالنا، الكلام اللي ولادنا بيسمعوه مننا كل يوم سواء إيجابي أو سلبي بيأثر على نفسيتهم وتطور شخصيتهم زيه زي طريقة تعاملنا معاهم بالظبط. الجمل اللي بنستخدمها واحنا بنتكلم مع ولادنا أو حتى بنتكلم حواليهم بتأثر بشكل مباشر على الاعتقاد اللي ولادنا بيكوّنوه عن نفسهم وعن الناس وعن العالم المحيط بيهم.
بناءً على دراسة أمريكية فالإيذاء النفسي واللفظي للأطفال ما يقلش ضرره أبدًا عن الأذى الجسدي وأكد المُشرف على الدراسة المدير التنفيذي لمركز الصدمات في معهد (غاستيس ريسورس) الأميركي “جوزيف سبينازولا” على التشابه بين الأعراض الناتجة من الأذى الجسدي وبين النفسي. عشان كده كل أم محتاجة تراقب الكلام اللي بتقوله لطفلها كويس وتبقى فاهمة أهمية وخطورة الرسايل اللي بتوصله من الجمل ده. في المقال ده، هاستعرض لك جمل بتدمر شخصية الطفل وسبب خطأ كل واحدة فيها عشان تفهمي ليه لازم تتفاديها.
1. انت مش هتبطل كسل/غباء/كذب/فشل أبدًا:
ولادنا بيشوفوا الدنيا في أول سنين حياتهم بعينينا احنا وبيصدّقوا كل كلمة بنقولها لهم عن نفسهم وبيبدأوا يتعاملوا على أساسها. فلما تفقدي أعصابك في لحظة غضب في موقف ورا التاني، وتكوني كل مرة بتأكدي بالجملة ده لطفلك إنه غبي أو كسول أو عنيد أو أي صفة سيئة، فانتي كده بتحفّيرها في عقله الباطن وبتوصلي له رسالة إنه يصدق إنه استحالة يقدر يغير الصفة دي فيه، وبدل ما تكوني بتساعدي طفلك يكون أحسن، فانتي بتهدمي من غير ما تحسي ثقته في نفسه وبتخليه يصدق عن نفسه حاجة مش حقيقية.
2. لو عملت كذا، مش هاحبك/محدش هيحبك:
الجملة دي بتلغي فكرة الحب المشروط اللي هو عكس فطرة الأم وعكس المطلوب عشان الطفل يكبر وهو عارف إنه مقبول ومحبوب ومتشاف من أقرب الناس ليه زي ما هو، حبنا لولادنا مش محتاج شرط عشان يوصل لهم أو يحسوا بيه. لو وصلنا لهم احنا بكلامنا إن مطلوب منه تصرفات معينة عشان يتحب، فده بيهدد إحساسه بالأهمية والقبول. ده غير إنه بيخلي الطفل يحس دايمًا إنه مطلوب منه يرضي غيره عشان يفضل يحبه وراضي عنه حتى لو على حساب نفسه وده ممكن يخليه فريسة سهلة للإبتزاز العاطفي.
3. شايف أخوك شاطر إزاي؟ حاول تبقي زيه!:
المقارنة بين الأخوات من أكبر الأخطاء اللي بنقع فيها واحنا متخيلين إننا كده بنشجعهم يكونوا أحسن مع إن على أرض الواقع العكس هو اللي بيحصل. المقارنة بتسبب الإحباط وإحساس العجز للطفل وتكبّر إحساس الغيرة والحقد بين الأخوات.
4. لو ما بطلتش عياط، هانزلك من العربية:
الجملة اللي نص أمهات مصر قالوها من غير ما يعرفوا خطورتها أو حتى اتقالت لهم وهم اطفال. تهديد الطفل بإنك هتمشي وتسيبيه لأي سبب ده بيهدد إحساس الأمان والانتماء عنده. يعني بدل ما يكون متطمن بوجودك جنبه وفي ضهره تحت أي ظرف، الجملة دي هتخليه يصدق إنك ممكن تسيبيه عادي لو اتصرف غلط أو لو زعلتي منه. فتخيلي إن إنسان يكبر وهو حاسس بعدم أمان هتكون إيه الصورة اللي هيكوّنها عن نفسه وعن العالم من حواليه!
5. ربنا هيزعل منك ويدخلك النار:
الطفل في أول سنين حياته فكرة وجود ربنا بتكون مشوشة ومجهولة وغير مفهومة بالنسبة له. وخبراء التربية بينصحوا إن أي كلام عن ربنا في أول سنين يكون كلام إيجابي بس عن الجنة والنعيم اللي فيها. لما الأم تهدد الطفل بوجود ربنا وبالعقاب والنار، ده مش مفيد بأي طريقة غير إنه بيخوف الطفل وبيوتره من وجود ربنا.
6. بتعيط ليه؟ الراجل ما بيعيطش:
بيوصل للطفل من الجملة دي إنه مش مفروض يعبر عن مشاعره عشان هو راجل، ومش مسموح يعيط عشان عيب، فبتتحول المشاعر دي لطاقة غضب مدفونة جوه الطفل وتبني في النهاية راجل بينكر مشاعره وبيكبتها عشان المفهوم الغلط إن المشاعر دي ضعف وما يصحش نعبر عنها.
7. انت أحسن وأشطر واحد في الدنيا:
كتير من الأمهات بيقولوا الجملة ده بغرض تشجيع وتحفيز الطفل وتعزيز ثقته بنفسه، لكن اللي كتير ما يعرفهوش إن الجمل دي ممكن تؤثر سلبيًا على الطفل، لأنه في وقت من الأوقات هيصطدم بالواقع وهيكتشف أنه مش أحسن واحد ولا أشطر واحد في الدنيا وإن طبيعي يكون فيه ناس أحسن منه. وبتنصح جين نيلسن في كتابها Positive Discipline A-Z إن تشجيع الطفل يكون على الفعل نفسه مش على شخص الطفل.
وفي النهاية بافكرك إن ولادنا مراية لينا وإن كل كلامنا وتصرفاتنا بيتحفروا جواهم وبيحددوا طريقة تعاملهم مع الحياة بيتصرفوا على أساسها.
التعليق باستخدام حساب فيس بوك