محتويات المقال
اتعرضت حلقات من مسلسل “إلا أنا” واللي كانت بتقوم فيه جميلة عوض بدور فتاة مصابة بمرض البهاق، وحاز إعجاب المشاهدين، ومن أشهر ردود الفعل على الفكرة كان تعليق خبيرة التجميل “لوجينا صلاح” واللي بتعاني من البهاق من صغرها.
الناس أعجبت بالفكرة لأن العمل الفني ده وضح لنا أد إيه الناس “المختلفين” لأي سبب في مجتمعنا بيعانوا جدًا من التعليقات المتنمرة طول الوقت وخصوصًا لو مصابين من طفولتهم فبتكون المعاناة أعمق.
والحقيقة إن التنمر أو الخوف من المصابين بمرض البهاق بيكون منبعها خرافات منتشرة عن المرض،
علشان كده هنقولكم على أشهر 5 خرافات عن البهاق وتصحيحها:
البهاق مُعدي:
دي أكتر حاجة بتخلي الناس تتجنب المصاب بالبهاق، خاصةً إن المرض بيكون ظاهر في الإيدين والوجه، واللي بيكونوا منطقتين للتلامس بين الناس.
والحقيقة:
إن مرض البهاق سببه اضطراب بصبغة الميلانين في الجلد واللي بتسبب مظهر البقع أو اختلاف لون الجلد عن الطبيعي، فهو مرض مش بيتنقل أبدًا عن طريق التلامس أو استخدام الأغراض الشخصية أو حتى العلاقة الحميمة.
البهاق بيسبب سرطان الجلد:
كتير من الناس بتفتكر مادام سبب مرض البهاق اضطراب في بعض مكونات الجلد، يبقى بالضرورة هيتسبب في سرطان الجلد.
والحقيقة:
إن اضطراب صبغة الميلانين اللي بتسبب البهاق لا يمكن تؤدي لطفرات في الحمض النووي والخلايا اللي بيسبوا السرطان.
مأكولات معينة أو علاجات بتعالج البهاق تمامًا:
ناس كتير بتنصح المصاب بالبهاق بأكل بعض أنواع الأجبان أو أكل السمك وغيره، أو بتتخيل إن بعض العلاجات المتطورة بالليزر او زرع الخلايا الجزعية وغيرها بيعالج البهاق تمامًا.
والحقيقة:
إن البهاق مرض مزمن، ومفيش مأكولات بتعالجه طبعًا، وكل العلاجات المكتشفة لحد دلوقتي بتساعد على تخفيف اللون المختلف في الجلد أو بتوقف وتبطئ سرعة انتشار المرض على بقية الجلد، ولو خفّ اللون شوية مفيش دليل علمي إنه مش هيرجع تاني.
كبار السن أكثر عرضه للإصابة بالبهاق:
ده التخيل المنتشر عن المرض بين كتير من الناس.
والحقيقة:
إن نسبة انتشار المرض هي 1% بين مجموع السكان في جميع أنحاء العالم، وبيبدأ المرض عند أكثر من 50% من المصابين قبل سن الـ 20.
مريض البهاق فرصته في الاندماج مع المجتمع أقل:
بسبب الخوف من مظهره أو بسبب انتشار خرافات عن المرض أو جهل المحيطين بالمريض.
والحقيقة:
إن فيه مشاهير كتير واجهوا مرضهم ونجحوا وزادت شهرتهم رغم إن علامات المرض واضحة جدًا على بشرتهم، فالفكرة في تقبل المريض لشكله وفرض التقبل ده على المحيطين بيه.
زي خبيرة التجميل لوجينا صلاح، اللي كانت بتستخدم المكياج لإخفاء علامات البهاق وبعدها درست واتخصصت في التجميل:
وعارضة الأزياء شهد سليمان:
ورامي جمال:
مع تمنياتنا ليكي ولأسرتك بالصحة والعافية.
المصادر:
التعليق باستخدام حساب فيس بوك