فيه إشاعة مغرضة إن الستات نكدية، ودي طبعًا إشاعة طلعها الرجالة عشان يداروا على غيطان النكد اللي بيجروا فيها ليل نهار، وأمطار القمص والنكد اللي بينكدوه علينا لما يقلبوا بوزهم. سواء جوزك برج السرطان أو هو عمومًا نكدي وقمًاص خلقة، هاقول لك تعملي إيه وانتي بتتعاملي مع نكد الزوج المصري الجميل. خاصةً لو نكدي معاكي ومقضيها هيء وميء برا.
أسباب نكد الزوج
- ضغوطات الحياة
- مش مرتاح في البيت
- زعلان من حاجة بس مش بيقول
- هو خلقته كده
ضغوطات الحياة
ممكن يكون جوزك تحت ضغط كبير، خاصة لو مسؤول عن المصاريف بالكامل لوحده. هيبقى غالبًا طول الوقت متأثر بفكرة الأسعار والالتزامات وغيره، فممكن تلاقيه معظم الوقت شارد ومتضايق، وأول ما تكلميه، غالبًا بيفتح فيكي ويزعق ويتعصب.
مش مرتاح في البيت
لو انتي عاملة في البيت معسكر مذاكرة، فيه ثانوية عامة، عندكم مثلًا زيارة عائلية مطولة من حد من أفراد عيلتك، ممكن تكون دي أسباب لنكد الزوج لإنه مش مرتاح في البيت. كمان لو البيت مكدس بأي حاجة، هتلاقي إن نفسيتك انتي وهو مش مظبوطة. اعتمدي طريقة المينيماليزم واتخلصي من الكراكيب لراحة نفسية أكبر في بيتك.
العقاب الصامت
لو برج السرطان، للأسف هيتعبك قوي في النقطة دي! عادةً بيكون زعل من حاجة حتى لو صغيرة، بس عمره ما بيقول. يقلب وشه، وانتي لو جدعة بقى، افهمي لوحدك، وراجعي شريط حياتك كله من ساعة ما اتولدتي عشان تعرفي انتي غلطتي في إيه.
هو أصلًا نكدي
دي بقى مالناش يد فيها، ولا هو له يد فيها. هو بيبقى خلقته كده، بوزه مقلوب by default، اتولد وعاش وترترع كده! وده اللي هتلاقيه ما بيتغيرش. يعني من وانتم مخطوبين، كان نكدي مش موضوع ضغوطات. كان نكدي والبيت رايق، وبيبقى نكدي برا البيت ومع أصحابه برضه.
كيفية التعامل مع نكد الزوج
ده يعتمد على السبب اللي بيخليه نكدي أصلًا. لو فيه ضغوطات أو أسباب لها علاقة بالبيت، سهل تتحل بالتواصل أو حتى بزيارة استشاري علاقات زوجية. أما لو ده طبع، فتعالي أقول لك شوية نصايح في التعامل.
- هنفاضل بين الكويس والنكدي.
- هنطاطي للعاصفة لحد ما تعدي.
- برضه هنتكلم ونتواصل ونحاول نلاقي حل.
- هنفرفش احنا لوحدنا.
الخطوة الأولى
بينك وبين نفسك، هاتي ورقة وقلم وشوفي الحلو والوحش. يعني هو نكدي، تمام، مش هنعرف نغير ده، بس مفيش بني آدم ما فيهوش عيب، فهل عيبه هو النكد؟ وهل مميزاته تغفر له ده؟ ولا انتي أولويتك الأولى هي الزوج الفرفوش، حتى لو هيكون بخيل أو عينه زايغة؟ فكرّي كويس، وانتي هادية، عشان ده هيترتب عليه قرار مهم.
الخطوة التانية
لو هو بس بينكد في أوقات معينة أو في ظروف معينة، هنسيب الفترة دي تعدي، واعتبريها كإنها “بيريود” وهتخلص. بس طبعًا ما تقولي لهش كده عشان ما يقتلكيش وييجي يقتلني أنا كمان.
الخطوة التالتة
هناخد هدنة صغيرة كده، حتى لو ساعة، هنقعد لوحدنا نشرب حاجة ونتنفس كويس، وبعدين هنطلب منه نتكلم سوا. هنتكلم إن الطبع ده احنا مش قادرين قوي نتعامل معاه، وإننا نفضّل لو يفك شوية ويبقى ألطف من كده في التعامل. وإن لو فيه حاجة مضايقاه، يا ريت يقولها على طول من غير ما ينكد على نفسه وعلينا.
احنا فريش وفرافيش
خلاص استنفذنا كل الحلول؟ سيبيه يعيش نكده ومالكيش انتي دعوة. شغلي مسلسلك، أو فيلمك، أو مزيكتك. اقري الكتاب اللي نفسك فيه، قومي ارقصي، اعملي اللي انتي عايزاه. ولو شكله مضايقك، ما تقعديش في نفس المكان معاه. خليه يخلص أحزانه براحته ويرجع لك.
التعليق باستخدام حساب فيس بوك