محتويات المقال
” جوزي مش متحمل المسئولية معايا أعمل إيه؟ ” أو ” تخلي الزوج عن مسؤولياته ” أو ” زوجي يحملني مسؤولية كل شي ” دي من أكتر الأسئلة اللي بتيجي في الاعترافات لراحة بالي، وكمان الأسئلة المجهولة على مجموعتنا، الزوج عديم المسئولية، الشخص اللي كأنه لا اتجوز ولا خلف، حياته كلها حولين نفسه والحاجات اللي بتسعده وبس، وطز في أي حاجة أو حد تاني.
تعرفي الزوج عديم المسئولية إزاي؟
وأنا بقرأ رواية الفيل الأزرق لأحمد مارد كان في مقطع معبر جدا عن شخصية الإنسان عديم المسئولية، بيوصفها الروائي الموهوب بطريقته وبيقول ” ضَيّق الخُلُق, مُتبلِّد الإحساس جانح للوحدة، فاقد للثقة فيمن حولي، نابذ للارتباط، مَذعور من المسئولية تجاه أي شخص أو كائن، ولا استثناء للنبات، كسول، يائس بإيجابية، أضيق كثيرا بمن يحاول قراءتي رغم ولعي بقراءة الأخرين” الشخصية دي هتلاقيها عمدة كده في نفسها، تتابع شئون الناس وتتابع ده وده لكن بدون تدخل حقيقي ومؤثر في حياتهم، هياكل دماغك بس بدون ما يكون ليه تأثير حقيقي في حياتك، مش هايوصلك وانتوا راجعين متأخر بدعوى إنه عنده شغل، مش هايشيل عنك الشنط التقيلة وانتو ماشيين، لما تتصلي هايرد عادي مش هايكنسل ويتصل هو، ولما تتجوزوا، لو حصل، انتي مش هتكوني في الحسابات وولادك بعد كده، الكلام ده هايبقى ماديا ومعنويا، يعني هتلاقيه في العالم بتاعه كده، مالهوش علاقة بيكم، خرجتو جيتوا، جعانين شبعانين، احتياجتكم مش على الخريطة وبالتالي انتو نفسكم مش على الخريطة.. شخصية ماتعرفش تاخد بالها من قطة !
لو جوزك راقي .. إديله فرصة يتعلم تحمل المسئولية
لكل ست بتشتكي ” جوزي مش متحمل المسئولية معايا ” مش عيب يكون جوزك عنده مشكلة في تحمل المسئولية، العيب إنكم تعطلوا عند النقطة دي بالذات، لو شايفة في جوزك “شوية رقي” يبقى في أمل كبير إنه يتصلح، لكن لو هو إنسان عموما مش راقي وتصرفاته كلها قايمة على مصالحه الشخصية فده تسيبيه فورا لأنه مفيش منه أمل.
الشخصية الراقية وصفتها الدكتورة نوال السعدواي في كتابها “ملك وامرأة وإله” لما قالت: “يتميز الإنسان الراقى بالقدرة على تغليب المسئولية الفردية والجماعية على شهوة الأكل والجنس والتسلط، الإنسان الراقى ليس هو المكبوت المُطيع للقوة المستبدة فى الدولة والأسرة، بل القادر على تحمُل المسئولية بإرادته الحرة وإختياره وحبه للعدل والكرامة والحُرية والمساواة بين البشر، الإنسان الراقى هو الذى يحترم الصدق أكثر من الورقة، الإنسان الراقى يصنع الشعب الراقى القادر على الثورة ضد السُلطة المُطلقة فى البيت والدولة، وضد المظاهر المزيفة للحقيقة”.
نحل إزاي مشكلة الزوج عديم المسئولية؟
لو انتي في علاقة عاطفية مع شخص عديم المسئولية تأكدي إنكم هتفضلوا طول الوقت في اختبارات، لحبكم وتماسك علاقتكم، إما يختارك ويختار يتغير مع الوقت أو يختار نفسه ويرحل مع ألف سلامة ليه وفي الحالة دي بيكون أحسن ليكي ولكل الأطراف إنك تتخلصي من العلاقة السامة دي فورا لأنه في الحالة دي هستنزفك وهتكوني انتي الطرف الوحيد اللي متمسك، أما لو هو متمسك بيكي بنفس الدرجة وبينكم أطفال هتحتاجي تعملي شوية حاجات عشان تعودي جوزك يتحمل المسئولية زي:
- “زوجي يحملني مسؤولية كل شي” ماتشيليش شيلته، ماتعمليش حاجة تاني بالنيابة عنه، في الحالة دي هتحتاجي تمشي معاه بالمثل الشهير “ريحه يتعبك اتعبه يريحك”
- اتصارحوا، لما يكون في اتفاق واضح من الطرفين إن في مشكلة فعلية ومحتاجة حل، في الحالة دي بتكون النقطة على الحروف وبتبتدأ رحلة الحل.. الاعتراف بالمشكلة نص الحل ولو معترفش مش هتتحل
- عاقبيه.. العقاب مش ضرب بس، العقاب أحيانا بيكون بنظرة او بتصرف أو بابتسامة مش موجودة، ضروري يعرف إن انعدام مسئوليته في موقف معين خذلك وبالتالي يبتدي يتدارك ده.
- التدرج شيء مهم، مفيش شيء بيحصل بين يوم وليلة، لو قررتوا تكملوا مع بعض فانتي أصبحتي ملزمة بإنك تحتملي الوقت والمجهود اللي هاتاخده عملية التحول، التكرار بيعود، خاصة لو استمر لفترة طويلة.
- سقفيله، أو تجاهليه، انتي الأقدر على التحديد، أيوة زي الأطفال، في منهم لما يعمل حاجة كويسة وتهللي يتمرع ومايعملهاش تاني وفي منهم اللي لما تشجعيه بيستمر، حددي جوزك من أنهي نوع لو بييجي بالتشيجع يبقى اشكريه بشدة وهللي لما يعمل تصرف من نفسه في ه تحمل للمسئولية مكنش بيعمله قبل كده، والعكس صحيح، لو بييجي بالتجاهل، حسسيه إن ده العادي ومش هشكرك في كل مرة تعمل فيها حاجة كويسة لأن ده المفروض أصلا
عموما مفيش إنسانية كامل 100%، الإنسان شروة يا تقبله بمميزاته وتحاول تهندل عيوبه يا تسيبه مادام العلاقة مش متماسكة وفتقدة للرقي والاحترام الكافي اللي يخليكم تكملوا.
التعليق باستخدام حساب فيس بوك