اخيرا هنرجع للنظام و الروتين بعد شهور كتير من الأونلان والاجازة والراحة، الأسبوع اللي فات كنت قاعدة مع إبني وأصحابه اللي عندهم 9 سنين وحبيت أسألهم عن إحساسهم وهما راجعين أخيرا للدراسة والمدرسة! لقيت معظمهم متحمس جدا بس لاحظت شكوي مشتركة بينهم إن يومهم بيبقي “زحمة جدا” بسبب المدرسة، واحد من الولاد قالي أكتر حاجة بتضايقني لما بروح البيت ومامتي بتفضل تقولي يللا بسرعة إتغدي عشان التمرين!
اللي إكتشتفته بعد كلام كتير معاهم هو إن الأطفال بتبقي مضغوطة في الدراسة زيهم زينا بالظبط، بالذات كل ما يكبروا والمطلوب منهم يكتر وتعامل اللي حواليهم يبقي فيه ضغط أكتر.
عشان كدة هقولكوا علي شوية حاجات نعملها كل يوم بعد رجوع الولاد من المدرسة تخفف عليهم ضغط اليوم و تساعدنا في تجنب سوء السلوك الناتج عن الطفل المضغوط او المجهد
- اول ما يدخلوا من باب البيت بيبقوا عاملين زي العصفور اللي كان في قفص و خرجته فجأة بيبقوا بيلفوا كدة في كل اتجاه، عشان كدة يفضل نسيبهم ربع ساعة بدون اوامر بدون روتين من غير ما نقول ( شيل شنطتك .. اغسلي ايدك .. غير هدومك). سيبوهم يلفوا في البيت يتكلموا لو بيحبوا يحكوا يطنطتوا يخرجوا الطاقة بالطريقة اللي تناسبهم قبل ما يبتدوا الروتين من تاني.
- ايام الحر حضريلهم اكله خفيفة تفوقهم مش لازم غدا علطول، ممكن ايس كريم فاكهة معمول في البيت ، سلطة فواكه ساقعة ، عصير فريش، هما بيبقوا تعبانين زينا بالظبط و احنا راجعين من الشغل ومحتاجين يهدوا جسمهم ويرتاحوا الأول.
- إستقبليهم علي الباب بحضن وكلمتين حلوين قبل أي كلام تاني عن المدرسة أو عن اللي وراكوا باقي اليوم.
- بلاش لو بيحكوا لك او بيشتكوا من مدرسين تقولي لهم جمل ( ليه انت عملت ايه خلاه يعاقبك ) او ( ما انت اكيد رديت عليها فعصبتها) ! بلاش اتهام او لوم وهجوم علي الولاد عشان مايبطلوش يتكلموا، ما تقطعيهمش و اسمعيهم للاخر و بيني تعاطفك معاهم قبل ما تتكلموا في المشكلة و حلها
- لو عايزين تعرفوا عملوا ايه في المدرسة متسألوش اسئلة مباشرة عشان بتعمل للعيال mental block ، ابدؤا الحوار بجمل زي ( ايه احلي حاجة حصلت لك النهاردة في المدرسة) او ابدإي احكي انتي الاول عن نفسك او حاجة مفرحاكي او مزعلاكي و خدي رأيهم.
- وقت المذاكرة سيبي لهم فرصة يتحركوا أو يقسموا اللي وراهم زي ما يرتاحوا، إديلهم فرصة يكونوا هما اللي مسؤلين وإنتي غدعميهم من بعيد.
و اخيرا اضحكي معاهم كتير زغزغيهم هزري و العبي معاهم، مش عايزين نسيب ضغط المدرسة و المذاكرة و الامتحانات يسرق مننا اوقات حلوة واحنا مش حاسين و يبقي ده الوقت اللي مربوط دايما بمشاعر سلبية، وانا بصفتي دكتورة جايالك من المستقبل بقولك كله بيعدي وكلنا بنتعلم.
التعليق باستخدام حساب فيس بوك