في يوم المكرونة العالمي .. أسرع وأسهل وأطعم طبخة صديقة لكل أم راجعة من شغلها مستعجلة، معشوقة الكبار والصغيرين، المكرونة حبيبة الملايين اللي ما يعديش أسبوع من غير ما ناكلها. نجمتنا النهارده الباستا.
أكيد كان لازم يكون فيه يوم نحتفل فيه بالباستا لأنها حقيقي مش بس أكلة لذيذة في طعمها، لكن كمان مليانة مميزات لينا كأمهات، سريعة في تحضيرها وبتتحضر بأشكال متنوعة وصوصات مختلفة تناسب أذواق كتير وممكن نضيف لها بروتين وخضار وأعشاب ونخليها وجبة متكاملة.
يوم 25 أكتوبر بيوافق يوم المكرونة العالمي، World Pasta Day، وهنقولك أسرار و حاجات عن المكرونة لأول مرة تعرفيها.
* عمرك فكرتي فيه كام شكل للمكرونة؟ منظمة الباستا العالمية (آه والله، فيه منظمة عالمية للباستا) بتقول إن فيه حوالي 600 شكل للباستا حول العالم.
* مش أي شكل للباستا يتعمل مع أي صوص. الأشكال المتنوعة دي معمولة لسبب يعني! مثلًا، أشكال الباستا المسطحة الطويلة زي الفوتوتشيني بتناسب أكتر الصوصات الكريمية لكن الأشكال الأسطوانية أو اللي فيها تجويفات وتشكيلات زي مثلًا البينّا أو القواقع بتمشي أكتر مع الصوصات التقيلة الغنية اللي قوامها خشن وفيها قطع من الطماطم مثلًا أو اللحوم عشان التجويفات اللي في الباستا بيتغلغل فيها الصوص بكل ما فيه من مطيبات.
* الباستا لازم تتسلق في كمية كبيرة من المياه المملحة ولازم تكون مالحة بشكل كافي زي مياه البحر كدا. دي الطريقة الوحيدة اللي الباستا نفسها هتتملح بها. لازم كمان تكون المياه بتغلي كويس جدًا ما ينفعش أبدًا نحط الباستا في مياه دافية أو مش واصلة لدرجة الغليان. ممكن بعد ما نضيف الباستا للمياه نغطي الحلة لحد ما ترجع المياه تغلي تاني بقوة ونشيل الغطا ونسيبها تستوي.
طريقة عمل دونات العشر دقائق من غادة التلي
* إضافة زيت لمياه سلق الباستا مش هو أبدًا اللي هيمنع الباستا إنها تلزق في بعضها، لكن كل اللي هيعمله إنه مش هيخلّي الصوص يغلّف الباستا كويس، لإنه بيعمل زي عازل بين الباستا وبين الصوص. لكن اللي هيمنع إن الباستا تلزق هو إننا نقلّبها كل شوية أثناء السلق.
*Al dente- to the teeth (آلدينتي) بنسمعها كتير الكلمة دي ومعناها درجة تسوية الباستا اللي تخلي سنانك تحس بعضة لما تاكليها، يعني مش طرية، مش معجنة، ليها قوام ودا معناه إننا عمليًا هنشيل الباستا من على النار قبل تمام تسويتها بدرجة.
طب دا ليه؟
أولًا: عشان أحس بقوام المكرونة وإني مش باكل بس حاجة معجنة وخلاص.
ثانيًا: لأنها لسه هتكمل جزء بسيط من التسوية جوا الصوص.
ثالثًا ودا الأهم: علميًا الباستا آلديتني هتخليكي تشبعي أكتر ولمدة أطول. مش هتحسي بالجوع لأنها بتاخد وقت أطول في الهضم وما بترفعش سكر الدم. بالتالي، هناكل كمية أقل ومش هنتخن. كلي باستا كل يوم، المهم تسويها صح.
* حافظي دايمًا على مياه سلق الباستا لأنها مهمة جدًا. بتكون فيها نسبة نشا عالية من سلق الباستا. دايما احتفظي بكوباية منها، وأيًا كان الصوص اللي هتعمليه، ضيفي عليه كوباية مياه السلق. هتعزز القوام بتاعه وتربطه بشكل هايل.
* الباستا ما تتغسلش غير في حالة واحدة: لو هتستخدميها في سلطة. غير كدا لما بنغسلها بنضيع طعمها اللي اكتسبته من المياه المالحة اللي اتسلقت فيها. وكمان بنتخلص من الطبقة النشوية اللي مغلفاها واللي بتساعد على اندماجها مع الصوص اللي هتتحط فيه.
* تقليب الباستا مع الصوص من الخطوات المهمة جدًا لنجاح الباستا لأنه بيساعد على تجانسها مع الصوص بشكل هايل.
* كل ما تاكلي باستا هتحسي أكتر بالسعادة. دي حقيقة مش خيال! لأن الكربوهيدرات المرتفعة في الباستا هتزود إنتاج الجسم لمادة السيروتونين اللي بيسموها هرمون السعادة.
* الإيطاليين هم أكتر شعب بيستهلك مكرونة في العالم. بياكلوها كل يوم تقريبًا وأكتر شكل بيستهلكوه هو الإسباجيتي. الشخص الواحد بيستهلك حوالي 27 كجم من المكرونة في السنة. يعملوا كام كيس دول؟؟!!
المكرونة مع الخضروات والأفوكادو
وأخيرًا وليس آخرًا: الباستا ما يكفيهاش يوم واحد احتفال ولا مقال واحد نتكلم عنها فيه. الباستا عايزة مليون احتفال ومليون كتاب يتكلموا عنها وعن تفاصيلها. اطبخيها زي ما تحبيها وولادك يحبوها وجربي النصايح البسيطة دي واحكي لنا تجربتك.
التعليق باستخدام حساب فيس بوك