أي أم عندها ولد بتحلم تشوف فيه الراجل اللي بجد الحنين المسؤول الجدع الطيب. وكل يوم الابن ده بيكبر فيه، بنسأل نفسنا يا ترى اللي باعلّمه لابني ده، هو فعلًا اللي هيطلعه راجل بجد؟ وكلنا في السنين الأخيرة، بقينا شايفين رجالة كتير للأسف فاهمين الرجولة غلط. وفي نفس الوقت، الستات بقت هي اللي تنزل وتشتغل وتتحمل المسؤولية بشكل أكبر. عشان كده، هنقول لك في المقال ده حاجات تعمليها مع ابنك عشان يطلع راجل بجد.
10 حاجات تعلميها لابنك
- علميه ينضف مكانه زي إنه يغسل طبقه بعد ما ياكل، يرتب سريره، ..إلخ. ده غير إنه يشارك في المهام والمسؤوليات في البيت زيه زي أخته، لإن ده هيعوّده على المشاركة وتحمل المسؤولية، وهيعرّفه إن خدمة أهل بيته حاجة فرض على كل اللي عايشين في البيت ومش عيب.
- علميه إنه هو اللي يشيل الأكياس والشنظ التقيلة. ما يسيبكيش انتي أو أخته تعملوا كده وهو موجود.
- علميه إنه ممنوع يستخدم قوته في الضرب وإنه ما يستخدمش قوته العضلية غير في الدفاع عن نفسه ووقف الأذى بس. وإنه ما ينفعش يتريق أو يسخر من أو يشتم أي بنت.
- علميه يقول الحقيقة حتى لو مش في مصلحته، ويبقي قد كلمته وما يخلفش وعوده مهما حصل.
- علميه يشيل مسؤولية أفعاله ويصلّح أخطاؤه، بدعم منك بس من غير إنقاذ وإنه مش محتاج يهرب من الغلط اللي عمله أو يشيّل حد تاني ذنبه لإن الأخطاء فرصة هايلة نتعلم منها.
- علميه يهتم بالمجاملات العائلية وبمناسبات أفراد عيلته ويهتم يجيب لهم هدايا وورد ويفرحهم.
- علميه يعبّر عن مشاعره من غير كسوف أو خوف على شكله ويتعود يقول اللي في قلبه. واسمعيه كويس وتعاطفي مع المشاعر دي. وعرفيه إن الراجل ممكن يعيط عادي لو احتاج، وده مش عيب ولا ضعف.
- علميه يكون له دور في قرارات البيت، وخدي رأيه واساليه عن اقتراحاته في حل المشاكل اللي بتقابل أفراد بيتكم.
- علميه إنه المسؤول عن التعامل مع الصنايعية والديليفري والمكوجي. وإن لو مفيش غير وسيلة انتقال واحدة في البيت، فالطبيعي إن البنت هي اللي تستخدمها.
- علميه إن الرجولة مش صوت عالي وعند وتسلط ورأيي اللي لازم يتنفذ. الرجولة جدعنة وطيبة ورعاية وخدمة وحنان. الرجولة أخلاق راقية ومسؤولية.
انتي كمان شاركينا في التعليقات بتحاولي تعلمي ابنك إيه أو علمتيه إيه حسيتي إنه فرق في شخصيته، وساب أثر بطريقة إيجابية معاه.
التعليق باستخدام حساب فيس بوك