محتويات المقال
خزين رمضان هو الشغل الشاغل لكل الأمهات قبل رمضان بشهور كتير، بس مفكرناش إيه هي أهم حاجات في تلاجتك في رمضان، علشان كده حابين نفكرك إن الأكل في رمضان زي أي شهر تاني، مش شرط نجيب منه كميات ضخمة، بل العكس مفروض يكون أقل وأبسط، وإن العبرة مش في خزين رمضان 2021 اللي بعض الناس بتصرف عليه مبالغ وهمية، لكن المهم فعلًا إن الأساسيات تكون موجودة عشان وقتك غالي. في المقال ده، هاقول لك على 10 حاجات أساسية لازم يكونوا في تلاجتك باستمرار طوال شهر رمضان، ضمن سلسلة مقالاتنا عن أفكار للمطبخ واللي فيها هتلاقي نصائح طبخ وتجهيز عمرك ما تستغني عنها أبدًا.
اقرأي أيضًا: بالفيديو طريقة تنظيف الثلاجة في 10 دقائق
عصير طماطم
المنقذة بجد، تخيلي الوقت اللي بتختصريه لما تخرّجي كيس طماطم جاهزة تفضيه في حلة فيها بصلة متشوحة وعليهم الخضار ودمتم، سواءً كان الهدف صلصة مكرونة، أو تسبيكة خضار، الطماطم الجاهزة هي الحاجة رقم واحد اللي بانصحك تستثمري فيها وقتك قبل رمضان ومش هتاخد منك حاجة.
أنا باحضرها على طريقتي، باشتري كمية الطماطم اللي محتاجة أخزنها، وباغسله كويس جدًا بمياه وخل، وأقطّعها، تاخد كام غلوة ولما تبرد، أضربها في الخلاط وأصفيها وأفرزنها كل كيس على قد أكلة واحدة.
لحمة مفرومة
لما باشوف كمية المجهود اللي بيروح في تفريز أكل قبل رمضان، باقول في سري أمال اللحمة المفرومة قصرت في إيه؟ طبق يخرج مباشرة من الفريزر على التسوية. عصاج ماشي هيديك أجمل صينية معتبرة، سواءً كانت مكرونة بشاميل أو كوسة، أو خضار باللحمة المفرومة، كفتة مش بيقول لأ، سواءً كانت داوود باشا، أو كفتة رز أو كفتة حاتي، بولونيز ما تقولش لأ.
اقرأي أيضا: الطرق السليمة لتخزين وحفظ الأطعمة المختلفة
فراخ فيليه
أطباق الفراخ الفيلية مظلومة معانا، الناس حصرتها في دور البانيه بس، جنب طبق المكرونة، لكن في الواقع هو له استخدامات كتير جدًا وبرضه مش محتاج مجهود قبلها، يخرج يتمرمغ جوا صينية نجرسكو، يتّبل ساعتين ويبقى شاورمة عبقرية، يتروق ويبقى كوردون بلو، حاجة كدا عبقرية حتى لو اتشوح في نقطة زيت مع ليمون وملح وفلفل هيطلع ما لهوش حل.
خضرة مغسولة وحاجة سلطة
أهه دي أكتر حاجة بننساها وأكتر حاجة بتنقذنا بجد وكل الناس محتاجاها، طبق السلطة هو طوق النجاة لأي شخص في الحياة وسط كميات الدهون والنشويات والأكل إللي مش مفيد، طبق السلطة هو أكتر حاجة صح بنعملها واحنا بناكل على السفرة، بس في زحمة تحضيرات الفطار بننساه رغم أهميته، شوية لإن غسيل الخضار بياخد وقت وشوية لإننا نسينا أصلا نشتري حاجة السلطة، لذلك بنفكرك توفري على نفسك وتجيبي خضرة وخيار وجزر وفلفل بكمية كفاية، تغسلي الخضرة غسلة محترمة بمياه وخل وتشطفيهم كويس، وتصفيهم تمامًا ودي كلمة السر إللي هتخليها تقعد في تلاجتك أسبوع ما تدبلش، خضرة متصفية ومتغطية، نضيفة على التقطيع على طول وممكن في علبة تقشري كمية خيار وجزر ومعاهم فلفل مغسول، كده السلطة مش هتاخد وقت يذكر وهتستمتعي بوجبة صحية وضمير مرتاح.
شربات جاهز
مع ضيق الوقت، وجود الشربات في التلاجة، بنوعيه التقيل والخفيف، هيخلي مهمة الحلويات من أسهل ما يمكن، شوية زبدة على شوية كنافة أو سميد وشوية حاجات بسيطة تانية سريعة فانيليا على سكر على ما يستجد، وهوب في الفرن، الريحة تفحفح يطلع تسقيه شربات ويحلفوا بجمال أكلك وسرعته.
خضار متفرز
صديق الأمهات اللي بيتمنوا لأولادهم ياكلوا أكل صحي، مفيش سفرة بتخلى من الخضار، والخضار المتفرز هو منقذك الحقيقي بعد أكياس الصلصة إللي اتكلمنا عنها في أول المقال، لو ما عندكيش وقت تفرزني ما تحسيش بالذنب واشتري جاهز مش هيقول لأ، وهينقذك برضه، كمية كافية من الملوخية والبامية والقلقاس وشوربة الخضار هتنقذك فعلًا.
شوربة
خليكي حريصة إنك في كل مرة تعملي شورية تشيلي على جنب كبشتين تلاتة لأنك هتحتاجهم في أقرب خضار هتطبخيه خاصةً لو البروتين اللي معاه سواءً لحمة أو فراخ مش مسلوقين، ساعتها الشوربة بتكون عملة نادرة بجد.
فول
مش كل الناس بتحب فول الشارع، والواقع إنه مش موثوق قوي زي فول البيت، قدرة فول بيتي قبل رمضان أو في أوله تتقسم على أكياس هتكفيكم وتفيض، فول بيتي متفرز بنضافة، الكيس على قد أكلة السحور بطعم ولا أجمل ولا أضمن. اعرفي من هنا طريقة عمل الفول المدمس في البيت.
سمنة بلدي أو زبدة صفرا
أكتر حاجة هتدي أكلك ريحة وطعم لذيذ، باتكلم عن السمنة والزبدة الطبيعيين، واللي كمان استخدامهم صحي بعكس ما ناس كتير فاكرين، وجودهم في التلاجة متقسمين مكعبات هينقذ حياتك حرفيًا.
اللبن والكريمة اللباني
اتنين كيلو لبن في الفريزر هيمنعوا عنك بلاوي كتير جدًا، وهينفعوكي في زنقات ما تتخيليهاش، بشاميل، صوص أبيض، ولأن الشيء لزوم الشيء هيكون مهم جدًا إن يكون معاكي كريمة لباني عشان أطباقك تتمتع بطعم رائع وغني.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك