محتويات المقال
كل فصل في السنة وله طقوسه وأكلاته اللي بتميزه عن باقي الفصول. الشتا بالذات معروف جدًا طبعا بالأكل، وبأننا طول الشتا بناكل لحد ما نقيس الهدوم الصيفي ونلاقيها مش مقاسنا. فيه حاجات تانية أول ما الشتا بييجي بنلاقيها، وأول ما بنشوفها، بنعرف إن الشتا دق البيبان، وزقها برجله ودخل.
شوربة العدس
أول ما أي ماما تحس بأول لسعة برد في الهوا، لازم نلاقي طبق شوربة العدس على السفرة. وقتها بنعرف إن الشتا جه, وإن ماما استعدت للشتا أقصى استعداد.
الكاكاو والسحلب
زي ما شوربة العدس أكلة الشتاء، الكاكاو والسحلب مشروبات الشتا. معظم الوقت مش هتلاقي نفسك بتروحي ناحيتهم في الصيف. ويا سلام لو هتحطي على وش الهوت تشوكليت شوية مارشميللو.. ولا وش السحلب مكسرات.. تحفة!
شجرة الكريسماس
مصدر الصورة: مصر العربية
ادخلي أي مول أو امشي في أي شارع في وسط البلد، هتعرفي إن الشتا جه وراس السنة قربت لما تلاقي كل المحلات استعدت واشترت شجرة.. وخلي بالك سوف لن نشتري هذا العيد شجرة، لأنك انتِ الشجرة. Never gets old!
ميمز لبس الشتا وأسعارها
مصمم الميم غير معروف
قلّبي في فيسبوك وهتلاقي عدد لا نهائي من البوستات والميمز على أسعار لبس الشتا، وقد إيه الناس مش لاقية فلوس تشتري لبس الشتا. مش دي المشكلة.. المشكلة إنهم بيشتروا اللبس اللي ضحكوا على أسعاره ده.
اللكلوك
مصدر الصورة: يوتيوب
طبعا في الصيف، بنقضي الوقت كله بصنادل، ونسيب رجلنا للهوا، أما في الشتا، فأتخن شراب موجود أو اللكلوك هو صديقنا في البيت.
البوت
المصدر: موسوعة ويكيبيديا
بره البيت بقى مفيش لكلوك، فيه إيه يعوض؟ البوت. أشيك موضات الشتاء وكل شتاء.
البطانية على الكنبة
مصدر الصورة: purewow
طبعًا مفيش أحلى من قعدة الكنبة قدام التليفزيون في الشتا مع مج الهوت تشوكليت.. بس رجلينا البردانة دي نعمل فيها إيه؟ نجيب البطانية نتغطى بها فوق الكنبة.
الكرنبة
لا لا مش قصدي على الأكل، قصدي على ولادنا الصغيرين، لازم نلبسهم الدولاب كله لحد ما يبقوا شبه الكرنبة حرصًا على سلامتهم من سرسوب الهوا.
رموز الكريسماس على الهدوم
مصدر الصورة: Amazon
موسم البلوفر اللي مرسوم عليه reindeer وsnowflakes .. بس لسه ما عملوش هدوم على شكل بابا نويل، ولا عملوا؟
بوستات النوستالجيا
مصدر الصورة: موقع موضوع
عدد واحد بوست بصورة بنت باصة من الشباك وفيه مطر وعليها جملة من أغنية شتا حزينة. عدد اتنين شير للأغاني الحزينة نفسها. عدد من 5 لـ 6 بوستات عن الشتا والحزن والحنين والشجن .. والمشاعر اللي كلها شبه بعض دي.
التعليق باستخدام حساب فيس بوك