الولادة حدث طبي كبير، سواء كانت طبيعية أو قيصرية، فما ينفعش وانتي رايحة تولدي تعملي حاجات معينة لإنها هتأثر على نجاح الولادة وسلامتك وسلامة الجنين، علشان كده مهم جدًا تلتزمي بتعليمات دكتورك، ولو هتعملي حاجة مش متأكدة من صحتها، استشيري الطبيب الأول، ودلوقتي هنقولك على 5 حاجات ممنوع تعمليها وانتي رايحة تولدي:
-
تناول الأدوية
ماينفعش نهائيًا تاخدي أي أدوية قبل الولادة، سواء مسكنات أو أدوية ضغط أو تنظيم ضربات قلب، أو أي نوع من أنواع الأدوية، لإن ده ممكن يؤدي لمضاعفات خطيرة مع التخدير، ولو حصل وأخدتي أي دواء بالغلط، لازم تبلغي دكتورك وطبيب التخدير قبل الولادة بوقت كافي.
-
المكياج
ستات كتير بتحب تحط مكياج وهي رايحة تولد، علشان لما تطلع من الولادة تكون في مظهر كويس، لكن الحقيقة إن دكاترة كتير بينصحوا بعدم وضع المكياج في الولادة، علشان مهم للطبيب إنه يشوف اللون الطبيعي للوجه والشفايف أثناء الولادة، واللي طبعًا هيكونوا مستخبيين لو انتي حاطه مكياج، ولو انتي حريصة على مظهرك تقدري تعملي شعرك، وتخلي معاكي في شنطة الولادة أدوات تجميل خفيفة زي زبدة الكاكاو والكحل وكريمات الترطيب، وتستخدميهم بعد ما تقومي بالسلامة من الولادة.
-
الأكل
ممنوع الأكل قبل الولادة القيصرية بـ 8 ساعات، لإن الأكل قبل الولادة ممكين يسبب مضاعافات زي القيء أو يأثر على الرئة، لكن ممكن تشربي عصاير طبيعية فيها فيتامينات، وإذا كنتي هتولدي طبيعي فبرضه هتحتاجي تسألي دكتورك عن الأكل المسموح ليكي قبل الولادة الطبيعية.
-
التأخير في وصول المستشفى
مهم جدًا توصلي المستشفى قبل الولادة بكذا ساعة، علشان تختاري الغرفة المناسبة ويلحقوا الممرضات يجهزوكي بهدوء وبدون توتر واستعجال، وده هيفرق في حالتك النفسية جدًا، وهتقدري تتكلمي مع طبيبك، وده في حالة الولادة القيصرية، وفي حالة الولادة الطبيعية يُفضل إنك تروحي أول لما الدكتور يطلب منك، وما تستنيش على الآخر علشان البيبي يتولد في غرفة ولادة مجهزة.
-
التوتر والخوف
طبعًا ده ممكن يكون شكله طلب خيالي إنك متخافيش ولا تتوتري وانتي رايحة تولدي، بس اللي قصدي عليه التوتر والخوف المبالغ فيه اللي ممكن يأثر سلبًا على ولادتك، حاولي تقطعي على نفسك التفكير في الاحتمالات الأسوأ، وانسي كل القصص الصعبة اللي انتي قرأتيها على السوشال ميديا لإن كل حالة مختلفة عن التانية، وكل لما تلاقي نفسك خايفة ادعي طول الوقت بسلامتك وسلامة جنينك، وخلي حواليكي ناس تطمنك مش ناس تزيد توترك، وفكري في إن خلاص رحلة الحمل خلصت وأخيرًا هتشوفي طفلك وتلمسيه بعد كل الشهور دي.
وبنتمنى لك ولجنينك السلامة.
بالفيديو: الاستعداد للرضاعة الطبيعية قبل الولادة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك