محتويات المقال
كتير بنلاقي ناس متجوزة مستمرة في علاقات زواج سامة وفيها إساءة، علاقات من اللي مافيهاش تواصل أو احترام أو حتى اشباع الاحتياجات العاطفية والنفسية والمادية. ورغم ده الجواز بيستمر بسبب عامل واحد بس هو العلاقة الحميمة الرائعة. علشان كده في الجزء ده هاسلط الضوء على الظاهرة دي وأشكالها وازاي نتعامل معاها.
الجنس الرائع ممكن يخليكي مش عارفة تفكري صح!
الجنس ممكن يلعب دور في إنك ماتقدريش تاخدي قرار حكيم في جوازك الفاشل! فيه دراسة اتعملت على عدد كبير من الأزواج واتنشرت نتائجها في The Archives of sexual Behavior 2016 . الدراسة وصلت لإيه؟ إن الشخص لما تزيد عنده الرغبة الجنسية بيفقد جزء كبير من حكمه المنطقي على الأمور وبيبدأ يشوف الأمور من منظور ضيق وأحادي لأن تفكيره بيكون منحصر بس في إنه يلاقي طريقة علشان يفرغ الشحنة الجنسية العالية.
إدمان الجنس
إدمان الجنس أو فرط الشهوة عند الراجل أو الست ممكن يلعب دور كبير في استمرار علاقة زوجية مؤذية. وده لإن إدمان الجنس ممكن يسبب نوع من الاعتمادية المرضية على الطرف الأخر كمصدر لتفريغ الشهوة. وزيادة الشهوة عند الستات اسمها nymphomania وعند الرجاله اسمها satyriasis فالشخص اللي عنده فرط شهوة جنسية بيكون مهووس بفكرة الجنس بس. وبتتحكم فيه رغباته الجنسية في أفكاره وتصرفاته مع شريك حياته. وده بيخليه يفقد السيطرة على سلوكياته وعلى قدرته على إنه ياخد قرارات مناسبه لحياته.
الجنس ممكن يكون طريقتك للهروب من واقع مؤلم
ممكن تكوني عارفة كويس قوي إنك في زواج سام. لكنك بتلجأي للهرب من إنك تلاقي حلول أو تاخدي قرارات مناسبة بسبب خوفك الجامد من التغيير أو علشان مش عارفة تاخدي قرار الانفصال. في الحالة دي ممكن ممارسة الجنس تلعب دور كطريقة تكيف مع كمية الألم اللي انتي حاسة بيه. الجنس في الحالة دي بيبقى زي الضمادة اللي بنحطها على جرح ملوث منغير ما تنضفه. بنحس بالاثارة ساعتها لكن تفضل المشاكل بينكم موجودة بدون حل.
الجنس طريقة تواصل لما تنقطع باقي الوسائل التانية
احنا دايمًا بندور على اشباع حاجاتنا المادية والنفسية. زي القبول والتقدير والقرب والدفء والانتماء، لما العلاقة مايبقاش فيها المعاني دي. ممكن نلجأ للجنس علشان نشعر بالأشباع المباشر للحاجات. لأنه بيملا – ولو بشكل مؤقت- الاحتياج للقرب والدفء وبيعطي للي بيعمل كده شعور زائف بإنه محبوب من شريكه.
عزيزتي.. لازم تعرفي إن العلاقات الناجحة مش بتقوم على الكيميا chemistry أو الانجذاب الجسدي بس، فيه عوامل تانية زي التوافق Compatibility في العادات والقيم وظروف الحياة. والتوافق المادي والاجتماعي. ووجود تواصل Communication والاستماع الكويس والمحاولة الصادقة للوصول لحلول وسط ترضي كل الأطراف.
السؤال هنا هل عندك التلات عوامل اللي بتنجح أي علاقة جواز؟ هل عندك التناغم والتوافق والتواصل؟ لأن التناغم أو الانجذاب الجسدي بس مش بيساعد على استمرارية علاقة. لازم التلات أركان تكون موجودة.
وأخيرا.. إذا كنا بنمارس جنس رائع جدا في علاقة جواز مش ناجحة. لازم نبدأ نشتغل على حل المشكلة دي من خلال الحوار والتفاهم ومحاولة أننا نشتغل على نجاح كل أركان العلاقة. وممكن نقرأ كتب متخصصة في العلاقات علشان تساعدنا. ولو مانفعتش الطريقة دي بننصحك بزيارة متخصص في العلاقات الزوجية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك