أول سؤال بييجي على بال الزوجين في أول زيارة لطبيب النساء، بعد معرفة حمل الزوجة، هو: ينفع نمارس العلاقة الجنسية ولا لا؟ والحقيقة إن الإجابة العامة على السؤال ده، إن الجماع أثناء الحمل مسموح، إلا في حالات معينة تمنع ممارسة العلاقة الحميمة خلال الحمل والطبيب هو اللي بيقررها، هنا هتعرفي بالتفصيل حالات ممنوع فيها ممارسة العلاقة الزوجية وقت فترة الحمل
-
لو في نزيف مهبلي .. ممنوع ممارسة العلاقة الحميمة
وخصوصًا إذا كان النزيف ده بدون سبب واضح، فساعتها بتكون العلاقة الحميمة ممنوعة لحد ما الطبيب يقيم حالة الحامل ويرجع يسمح تاني بالعلاقة الزوجية.
-
تسرب السائل الأمينوسي .. تمنع ممارسة العلاقة الحميمة
وهو السائل اللي بيحيط بالجنين في الرحم، وبيتسمى السائل الأمينوسي ووجوده وكميته لها علاقة مباشرة بصحة الجنين وموعد الولادة، علشان كده تسرب السائل ده من العلامات الخطرة في الحمل، علشان كده لما بيحصل التسرب الأطباء بيمنعوا العلاقة الحميمة للحامل، علشان يحافظوا على صحة الحامل والجنين قدر الإمكان.
هنا ممكن تشوفي طرق طبيعية لزيادة السائل الأمينوسي حول الجنين
-
قصور في عنق الرحم .. يمنع العلاقة الجنسية
وده بيتسبب في فتح عنق الرحم قبل الآوان، ولو استمر ممكن يؤدي لولادة مبكرة، ولو في الشهور الأولى من الحمل ممكن يسبب الإجهاض، وفي الحالة دي بتتمنع العلاقة الحميمة بين الزوجين.
-
المشيمة المنزاحة .. ممنوع ممارسة العلاقة الجنسية
وبتتسمى كده في حالة إن وضع المشيمة بيكون مغطي عنق الرحم بشكل جزئي أو كلي، ودي حالة من أهم حالات منع الجنس للحامل.
-
إذا كان في تاريخ سابق للولادة المبكرة
سواء كانت الولادة المبكرة حصلت بالفعل قبل كده، أو حصل إجهاض أو علامات ولادة مبكرة، فدي من الحاجات اللي الأطباء بيكونوا حريصين فيها على تجنب الزوجين للعلاقة الجنسية، علشان ما تتكررش نفس الحالة.
وبنفكرك دايمًا بالمتابعة مع طبيبك، لإن هو الوحيد اللي هيقدر يشخص حالتك بالزبط، وهيقولك إذا كنتي بتعاني من الحالات اللي قولنا عليها أو حالات تانية تستدعي الامتناع عن العلاقة الجنسية أثناء الحمل.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
mayoclinic.org
webteb.com
التعليق باستخدام حساب فيس بوك