خلينا نعترف إننا لما نيجي نفرش بيتنا قبل الجواز، حماس البدايات بيعمي عينينا. بنعمل كل حاجة بكل رومانسية من غير أي تفكير في المستقبل القريب اللي بيحمل طفل هيجيب كل ديكورات البيت على الأرض، وحياتك هتبقى طواريء حماية. على عكس لو متجوزة من فترة وعندك أطفال، فإنتي هتغيري في بيتك بما يتناسب مع الوافدين الجدد. عمومًا خلينا نواجه الواقع ونشوف هنلم البيت ازاي علشان ابنك اللي بدأ يزحف (يحبي) يكتشف البيت زي ما هو عايز ويكون في أمان في نفس الوقت. هاديكي نصايح لترتيب البيت مع بداية حبو الطفل.
بداية حبو الطفل
على فكرة، الأطفال بتبدأ تتحرك من مكانها بعد سن ست شهور، وحركتهم عمومًا بتكون مختلفة عن بعض. يعني مش كلهم هيقوموا على إيديهم ورجليهم يزحفوا، أوقات بيمشوا على بطنهم زي الدودة، أو يقفوا على إيديهم ورجليهم بس من غير ما ياخدوا خطوة، عمومًا أي تحرك لهم من مكانهم اسمه زحف، مش ستايل حركة معين هو اللي اسمه زحف.
خطوات تأمين البيت
بصي خلينا نقسم البيت لأقسام، لأن كل جزء من البيت له طريقة حماية مختلفة.
غرفة المعيشة / الليفينج
حبو الأطفال وترتيب المنزل
- مهم جدًا في كل البيت تشتري الأغطية الخاصة بفيش الكهرباء، هاتيها كبيرة الحجم. علشان لو طفلك عرف يشيلها ما يعرفش يبلعها.
- لو طرابيزة التليفزيون بتاعتك قصيرة وحاطة عليها الشاشة، يبقى جه الوقت اللي تعلقي فيه الشاشة علشان تحمي طفلك إنها توقع عليه لا قدر الله.
- الترابيزة لو ليها حواف حادة، وده بيظهر أكتر في العفش المودرن، يبقى هتحتاجي تجيبي رول من الفوم بيتلزق داير ما يدور على الترابيزة، أو حواف سيليكون بتتحط على الجوانب الحادة فقط.
- هتضطري تستغني عن المفارش على الترابيزة لأنها ببساطة هتتشد وتوقع كل اللي عليها على الأرض، وده ممكن يعرّض طفلك للخطر.
- لو الليفينج عندك فيه بلكونة أو شباك، استخدمي القفل الخاص بيهم لو ألوميتال، لو مش نافع فيه أنواع أقفال بتتلزق على الأبواب والشبابيك بتمنع فتحها، بس طبعًا ركبيهم بعيد عن قدرة وصول طفلك ليها.
غرفة نومك
بداية حبو الأطفال
- لو أوضة النوم بتاعتك طبعًا زي ما احنا بخصوص الشبابيك أو البلكونات، وأي ترابيزات فيها حواف، وغالبًا ده بيكون الكومودينو.
- لو دولابك من النوع الجرار، فاللي هيحصل إنه سهل على طفلك إنه يفتحه وينزّل اللي كل فيه. ومش هنا الخطورة، الخطورة إنه ممكن يدخل يستخبى فيه وإنتي مش عارفة. علشان كده، مهم إنك تقفليه، عند النجارين أقفال مخصوصة للدواليب الجرارة.
- التسريحة والكومودينو والأدراج اللي فيهم ممكن تشكل نوعين من الخطر، أول خطر إن التسريحة أو الكومودينو نفسه يقع على الطفل لا قدر الله. علشان كده، فيه أقفال بحزام بتتركب ورا التسريحة أو الكومودينو بتمنع وقوعهم على الطفل بشكل عمودي.
- لو فيه إمكانية إنك تشتري حواجز لسريرك بحيث لو طفلك سيبتيه نايم على سريرك مش هيكون فيه خوف عليه لو اتقلب.
غرفة نوم طفلك
حبو الرضيع
- يمكن دي أكتر غرفة بتكوني مركزة في تأسيسها. بس على الرغم من كده، هنفضل متمسكين بخطوات الحماية الخاصة بالشبابيك والأبواب.
- لو فيه إمكانية إنك تخلي سرير طفلك على أدنى مستوى له، يكون أقرب ما يكون للأرض. بحيث يقدر طفلك ينزل منه من غير ما يتعرض لخطر الوقوع.
- في المكتبات الكبيرة، ومحلات الأطفال بتتباع مربعات فوم، دي بتكون اختيار كويس جدًا لطفلك لو سايباه على الأرض يلعب إنه لو وقع ما يحصلش أي ضرر عليه.
المطبخ
- لسبب استعصى على العلم الوصول له، الأطفال بتسيب كل الألعاب اللي بيتدفع فيها دم قلبنا دي، وبيقعد يلعب بالحلل والمعالق. عمومًا اللي هتحتاجي تشيليه في الأرفف العالية، هي كل حاجة تقيلة، وإزاز، وحادة.
- الدولاب اللي تحت الحوض أغلبنا بيتعامل معاه على إنه دولاب المنظفات، ده بقى من أخطر الحاجات في المطبخ، لخطورة وصول طفلك ليها. ممكن يحتك بيها بأي شكل خطر، علشان كده، اقفلي الدولاب ده بقفل، أو تشيلي المنظفات في رف علوي.
- الفرن لو مشغلاه لازم تبعدي طفلك من التواجد في المطبخ ساعتها حماية له من الحرارة، اقفلي دايمًا غطا البوتجاز، وافصلي الغاز والكهربا طالما مش بتستخدميه.
الحمام
الزحف عند الأطفال
- لو عندك غسالة أوتوماتيك تعبئة أمامية، فاعملي حسابك لو مش مقفولة كويس وعليها قفل، فإنتي ممكن تلاقي فيها حاجات غريبة جدًا ممكن تبوظها لو إنتي مش كل مرة تفحصيها وتتأكدي إن طفلك مش سايب حاجة جواها.
- لو فيه أي منظفات على الأرض لازم تتحفظ في مكان عالي.
- التواليت لازم يكون مقفول الغطا، لإن كل كوابيس رمي الموبايلات والمفاتيح بتتحقق، وأوقات بتلاقيه إتسد بلعب. وطبعًا مش محتاجة أدخل في تفاصيل شكل الحياة بتكون إيه لو التواليت إتسد.
- الحمام نفسه لازم يفضل مقفول الباب دايمًا.
الريسيبشن
حبو الأطفال
- الجزامة لو في الريسيبشن لازم تتقفل بقفل ويكون متين.
- اوعي تسيبي الأحذية جنب الباب وتكون سهل الوصول ليها من طفلك. الأحذية تتقلع برة البيت، وتتشال تتحط في مكانها محكم الإغلاق.
- لو عندك نيش فهو قنبلة موقوتة. لو مش بيتقفل، فإنتي يا تشتري قفل، يا تطلبي تركيب قفل من نجار.
- أي فازات هينتقل موقعها من على الترابيزة، لمكان أعلى، أو شيليهم خالص.
تقدري تقولي إن دي أهم النصايح اللي لو اتبعتيها هتقللي جدًا من حجم الحوادث الممكنة، وهتكوني فعليًا وفرتي بيئة آمنة جدًا لطفلك في المرحلة دي من حياته.
التعليق باستخدام حساب فيس بوك