محتويات المقال
ناس كتير ما كانتش تعرف يعني إيه أصلًا سترتش ماركس. لكن الشهر ده، عرفوا. بعد ما انتشر على فيسبوك سكرين شوت من تشات بين بنت وخطيبها بيقول لها فيها إنه لمح في جسمها “خطوط بيضا”. البنت ابتدت تشرح له هي إيه الخطوط البيضا وإنها سترتش ماركس. لحد هنا، عادي. اللي مش عادي، إنه راح دوّر على جوجل ولاقي إن مالهاش علاج، وقرر إنه مش هيكمل الجوازة وهو ده حاصل، وإنه هيديها مهلة ولو ما اتصرفتش، هيسيبها، لأنه محتاج يتجوز واحدة تملا عينه عشان ما يبصش بره. وطبعًا الراجل ده اتروق على السوشيال ميديا من كل الناس..
ساعات الأفلام الإباحية وأفلام السينما والكليبات بيكونوا هم أول طريق – وساعات الطريق الوحيد – لمعرفة الستات وأجسامهم، ولإن طبعًا الأفلام دي غير واقعية في أي شيء، فتصور النوع ده من الرجالة عن أجسام الستات وعن شكل ووتيرة العلاقة الحميمة بيكون ملوث ومش حقيقي بالمرة. وفهم ده كان أول خطوة ليا في تقبل السترتش ماركس اللي في جسمي ومحبتها فيما بعد.
إيه هي أصلًا السترتش ماركس Stretch Marks؟
سترتش ماركس – stretch marks
ببساطة شديدة، هي خطوط بيضا بتظهر في الجسم نتيجة تقلب الوزن أو الحمل. ده برضه سبب خلاني أحبها. التجارب اللي هي شايلاها لي.. بتفكرني باللي عديت به في حياتي. بتفكرني بالمرات اللي نفسيتي كانت وحشة جدًا لدرجة إني فضلت بالشهور ما باكلش كويس لحد ما اتعافيت من الصدمة النفسية العنيفة اللي اتعرضت لها واسترديت صحتي تاني. لما باشوفها، باشوف إني عديت، نجحت أتغلب على يأسي من الحياة واستمر فيها.
ليه السترتش ماركس وحشة؟
عشان عيادات التجميل ومجلات الفاشون والمجلات والمواقع الإباحية تعيش وتنتعش. تفتكري لو كل ست تقبلت شكل جسمها وحبته وكانت واثقة من نفسها، كل الصناعات دي (اللي قايمة بشكل كامل على كره الستات لجسمها ورغبتها في تغييره) هتستمر إزاي؟
إزاي تحبي السترتش ماركس؟
اقفي قدام المراية وبصي للسترتش ماركس بتاعتك، احكي لنفسك حكايتهم، هنا كان البيبي، هنا خسيت لما عملت دايت، هنا تخنت وأنا بارضع، وهكذا. المسيهم وطبطبي عليهم وقولي كلمات إيجابية لهم، زي انتم حلوين، انتم مني، أنا بحبكم. وبصي على نماذج من ستات حبت الخطوط دي في نفسها.
سترتش ماركس stretch marks
سترتش ماركس – stretch marks
التعليق باستخدام حساب فيس بوك