كونك أم ده يخليكي تعدي بأصعب المشاعر الإنسانية اللي ممكن أي بني أدميعدي بيها، خليط من كل حاجة في نفس الوقت بس اللي لاحظته من تعاملي مع الأمهات في الإستشارات هو إن الغالب علي كتير اوي مننا هو إنهم “ناسيين نفسهم”، ناسيين كانوا بيحبوا إيه وبيتبسطوا إزاي من غير أطفال قبل دور الأمومة.
وبالتالي بلاقي كتير أوي أمهات مش سعيدة، بتفني نفسها ومش مرتاحة ومش راضية برده عن نفسها وعايشين في صراع نفسي مش قادرين يخرجوا منه.
إنتي مش لازم تكوني شمعة بتحترق عشان تكوني أم كويسة، مش لازم تنسي نفسك عشان عندك ولادك أهم، مش لازم تدي لولادك كل حب الدنيا وتحرميه علي نفسك.
حبنا لنفسنا كأمهات وإهتمامنا بإحتياجتنا النفسية والجسدية والروحانية ده مش أنانية أو تقصير مننا، لكن بالعكس هو أول طريق لأطفال مرتاحة وبيت سعيد.
حبك وتقديرك لنفسك بيتدي بإنك تحطي أولوياتك في اول الليست إنتي كمان مش بس اولويات جوزك وولادك وبيتك، لإن إنتي لو شحنك خلص مش هتقدري تدي أي حاجة لأي حد بتحبيه.
عشان كدة هقولك علي شوية أفكار بسيطة ومش مكلفة وكمان ما تاخدش منك وقت طويل بس تخليكي تقدري تهتمي بنفسك:
- ربع ساعة في اليوم هتغير حياتك، ما تتنازليش أبدا عن وقتك لنفسك خليه أولوية زيه زي كل حاجة بتخص ولادك، تعملي فيه اي حاجة بتحبيها حتي لو هتقعدي ساكتة بلا هدف لو ده هيريحك.
- قسمي المهام اللي وراكي كل يوم لحاجات لازم تعمليها وحاجات ممكن تتأجل وحاجات تالتة عادي لو إتلغت أو ماتعملتش عشان يكون في وقت في يومك للراحة.
- أطلبي المساعدة من جوزك أو لو متاح يكون في حد بيساعدك في اللي تقدري عليه، وتوفري طاقتك ومجهودك للحاجات اللي مفيش غيرك يقدر يعملها.
- دلعي نفسك بخروجة أو بهدية أول كل شهر وخللي التحويش ليها أولوية.
- إعملي meditation أو ممارسة التأمل وهتلاقي فيديوهات كتير منها للمبتدإين علي اليوتيوب.
- خدي كورس اونلاين لأي حاجة عايزة تتعلميها أو تطوري فيها من نفسك وخصصيلها وقت قراية او مذاكرة يومي.
- اتمشي \ إلعبي رياضة\ إرقصي\ إسمعي مزيكا\ إنزلي إفطري برة وإدخلي سينما “حتي لو لوحدك”.
الأفكار كتيير بجد جدا وما بتخلصش بس أهم حاجة فيها هي إنك تبقي مقتنعة إن من حقك كأم تكوني سعيدة، وكم حقك كأم تعيشي كبني أدم مستقل له إهتماماته اللي مش كلها متعلقة بولادك، وإن دورك هو غنك تدولري علي سعادتك بنفسك ماتستنيش حد يسعدك، دوري علي اللي بيخليكي نفسيا مبسوطة وراضية عن نفسك وشكلك وحياتك وإعمليه من غير ما تحسي بالذنب او عدم الإستحقاق، لأنك تستاهلي تبقي مبسوطة عشان تعرفي تبسطي حبايبك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك