عيد الأضجى المبارك 2021 قرب، وكل سنة وأنتم طيبين وبخير وبصحة وسعادة، وجه وقت زي كل سنة إنك تبدأي في استعدادات العيد واستقبال تلاجتك للحوم الأضحية، وطبعًا في الوقت الحالي ومع شدة حرارة الجو هتحتاجي إنك تبقي سريعة في عملية تفريز وحفظ وتخزين لحمة عيد الأضحى عشان ما تفسدش من حر الصيف.. في المقال ده هنساعدك في نصايح بسيطة لترتيب تلاجتك عشان تقدري تحفظي اللحوم بطريقة صحية وسليمة.
تعرفي على أسماء قطعيات اللحوم .. وما يناسب كل أكلة
خطوات تفريز وتخزين لحمة عيد الأضحى
تفريز وتخزين لحمة عيد الأضحى 2021
- الخطوة الأولى ودي في الحقيقة من أهم الخطوات وهي ترتيب وتنظيف تلاجتك قبل العيد. قبل العيد بكام يوم، خرجي كل اللي موجود جوه التلاجة والفريزر وافصلي عنهم الكهرباء وعقميها من جوه كويس باستخدام مطهر مخصوص لتنظيف التلاجة والفريزر وبعدين سيبيها تتهوى شوية وعيدي ترتيبها ورتبي الفريزر عشان تفضي مكان للحوم وممكن تستخدمي الأكلات الزيادة اللي مش محتاجاها في عمل وجبات وتوزيعها على المحتاجين.
- خطوة استقبال لحوم الأضحية بتبقى صعبة شوية عشان بتلاقي نفسك قدام كميات كبيرة. وبننصحك بدل ما تدخلي الفريزر اللحم وتجمدي اللي محتاجة توزعيه في وقت لاحق، حاولي توزعيه في نفس اليوم أو تاني يوم عشان ما يعملش زحمة ليكي في الفريزر، وممكن تحفظيه في التلاجة أفضل وتوزعيه تاني يوم على الأقارب والفقراء.
- اللحوم اللي هتبقى من نصيب أهل البيت، قسميها على حسب النوع سواء مفروم أو بفتيك أو كبدة وخلافه وحطي كل نوع مع بعض وقسميه على حسب كل أكلة أو ممكن تقسميه بالكيلو أو النص.
- حطي اللحمة اللي قسمتيها في أكياس حفظ الطعام واقفليها كويس، أو ممكن تحطيها في علب محكمة الغلق زي علب تابر ويرأو أطباق فوم زي اللي بيستخدمها الجزار وتلفيها كويس أوي بالكلينج فيلم، واكتبي عليها النوع عشان متتلخبطيش.
- ممكن تشيلي لجم مجهز للطبيخ في الفريزر زي اللحم المفروم ممكن تستخدميه في عمل العصاج أو البرجر والكفتة وده هيسهل عليكي كتير خطوة التخزين وكمان الطبخ لو إنتي في يوم مستعجلة وحبيتي تعملي أكلة سريعة.
- بعد ما تخلصي التوزيع والتقسيم متنسيش تعقمي رخام المطبخ والحوض بمطهر المطابخ عشان تتجنبي أي أمراض من اللحوم النية لا قدر الله.
هنا بقى دليلك لعمل أشهر تتبيلات اللحوم والفراخ والأسماك
ودي كانت نصايح بسيطة لتفريزر وتخزين لحوم الأضحية وبنتمنى إنها تكون فادتك وقللت من مجهودك السنة دي وعيد سعيد 🙂
لمسات العيد: ازاي تنضفي قبل العيد في 3 ساعات بس
What’s your Reaction?
التعليق باستخدام حساب فيس بوك