محتويات المقال
حياة الأمهات عمرها ما كانت سهلة، صحيح الإحصاءات بتقول إن عمر الستات بيكون أطول من عمر الرجالة عمومًا، لكن ما ينفعش نتجاهل مجموعة من الحقايق الاجتماعية والصحية اللي بتخلي صحة الست تنهار مع الوقت، سواءً كانت الصحة النفسية، أو البدنية، وبدل ما تعيش عمرها بسعادة وتستمتع بسنينها بتعيشها في هم ونكد من التعب والمرض. طيب إيه الحل؟ الحل إنك كـست تعرفي مجموعة من الحقايق المهمة عن صحتك، عشان تقدري تتلافي الممكن منها عشان تعيشي بصحة وسعادة. في المقال ده، هاقول لك على أكتر 6 حاجات بتهدد صحة السيدات عمومًا.
التدخين بيزيد
معدلات التدخين بين الرجالة أعلى من الستات 10 مرات، لكن الخبر اللي لازم تاخدي بالك منه كويس إن معدلات استخدام التبغ بين الستات والبنات الصغيرة تحديدًا بتزيد بشكل كبير، ومحاولات التبطيل عادة بتفشل خاصة إن علاج آثار النيكوتين عند السيدات بتكون أقل فعالية!
اقرأي أيضا: أضرار التدخين على الحامل والجنين
العنف بيموّت
العنف بأنواعه مش بيسيب علامات على الجسم بس، للأسف علامات العنف النفسية غالبًا بتقوم سيدات كتير للوفاة، يكفي أقول لك إنه ما بين 15 لـ 71% من الستات بيتعرضوا للعنف سواءً كان جسدي أو جنسي، والأنواع دي من العنف توابعها الصحية عنيفة جدًا منها الاكتئاب وكتير من الأمراض المزمنة والمعدية اللي مش هتتخيلي إن سببها الرئيسي كان عنف اتعرضتي ليه وسكتي عنه.
الأذية مش بعيد
ضروري توعي بنتك كويس جدا عن التحرش والإساءات الجنسية في عمر مبكر بالطريقة اللي تناسب سنها، لأن الإحصاءات العالمية بتقول إن واحدة من كل خمس ستات اتعرضت لإساءة جنسية قبل سن الـ 15 سنة.. خدي بالك.
متابعة الحمل مش رفاهية
للأسف ستات كتير بتتعامل مع متابعة الحمل باعتبارها رفاهية وشيء اختياري، لكن اللي ماتعرفيهوش إن الزيارة اللي بتعمليها بشكل دوري حسب توصية الطبيب أثناء الحمل بتنقذ حياتك وحياة طفلك، في 1600 ست من كل 10 آلاف ست بتموت كل يوم في الدول النامية بسبب المضاعفات اللي بتحصل أثناء الحمل والولادة.
عينيكي راس مالك
آخر دكتور بنفكر نزوره هو دكتور العيون رغم إن الإحصاءات بتقول إن الستات أكتر عرضة للإصابة بضعف النظر في كل أنحاء العالم من الرجالة، عينيكي راس مالك في شغلك وبيتك ومع أولادك وفي كل تفاصيل حياتك، مش هتخسري حاجة لو روحتي لدكتور العيون أول ما تحسي إنك مش قادرة تتحققي من الحاجات زي الأول، دايمًا الحقي نفسك وخليكي في أحسن حال.
الطبخ في ظروف غلط، أحيانا بيموّت!
في معظم دول العالم الستات هي المسئولة عن الطبخ، المعلومة اللي تخوف فعلًا إن نص مليون ست بتموت سنويا بسبب دخان الطبخ! الستات أعلى عرضة للإصابة بالانسداد الرئوي من الرجال بنسبة 50% نتيجة تعرضهم للملوثات والدخان الناتج عن الطبخ بأدوات تقليدية زي الأفران البلدي والباجور في أماكن ما فيهاش تهوية كويسة. لو تعرفي ست في محيطك ظروفها المادية لسه بتجبرها تستخدم الأدوات دي، حاولي تساعديها لأنك بتنقذي حياتها.
المصدر
منظمة الصحة العالمية
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك